სკანდალია. ვინ და რატომ უთვალთვალებდა 'დერბი ქაუნთის' ფეხბურთელებს? პოჩეტინოც გაეხვა

ინგლისურ ფეხბურთში სკანდალია. „ლიდსისა“ და „დერბის“ შორის ჩემპიონშიფის პარასკევის მატჩი მასპინძელთა გამარჯვებით 2:0 დასრულდა.

მარსელო ბიელსას გუნდი უფრო ძლიერი აღმოჩნდა, ვიდრე ფრენკ ლემპარდის კრებული. შესაბამისად, იორკშირელები სატურნირო ცხრილის სათავეში რჩებიან. თუმცა რის ხარჯზე მიაღწია კონკრეტულად ამ გამარჯვებას ბიელსას „ლიდსმა“, ეს ცალკე საკითხია - უშუალოდ საფეხბურთო მეთოდებით, თუ კიდევ რაღაც (თუ ვიღაც) „სხვა ფაქტორებიც“ იყო ჩარეული...

როგორც ირკვევა, „დერბი ქაუნთის“ ფეხბურთელებს მატჩისწინა ვარჯიშის დროს უთვალთვალებდნენ. 10 იანვარს დერბიშირის პოლიციამ დააკავა ახალგაზრდა მამაკაცი ბინოკლით და... ბრტყელტუჩათი. თუ პოლიციას დავუჯერებთ, დაკავებული შპიონაჟით იყო დაკავებული ლემპარდისა და მისი მოთამაშეების წინააღმდეგ.

ბაზის გარშემო ღობის დათვალიერებისას ის დაუზიანებელი აღმოჩნდა. გამოდის, რომ შპიონს ბაზაზე არ შეუღწევია, გარედან უთვალთვალებდა „დერბის“ ვარჯიშს. დაკავებული გაათავისუფლეს, თუმცა ლემპარდი იძულებელი გახდა, ვარჯიში შეეწყვიტა.

„ჩვენ დაგვიდასტურეს, რომ დაკავებული მამაკაცი „ლიდსის“ თანამშრომელია. ჩვენ ვაწარმოებთ მოლაპარაკებებს ამ სიტუაციასთან დაკავშირებით. განცხადებებს შემდგომ გავაკეთებთ“, - უთხრა მედიას „დერბის“ ერთ-ერთმა ოფიციალურმა პირმა.

თითქოს დიდი არაფერი, მაგრამ ინგლისის საფეხბურთო ლიგა მაინც ნერვიულობამ შეიპყრო: „ჩვენ შეშფოთებულები ვართ იმ ცნობების გამო, რაც „დერბი ქაუნთის“ ბაზაზე მომხდართან დაკავშირებით გვესმის. ახლა ყველაფერი სწორედ „დერბიზეა“ დამოკიდებული - მისცემენ თუ არა საქმეს შემდგომ მსვლელობას. პრემიერლიგის სახელზე ჯერჯერობით არანაირი საჩივარი არ შემოსულა“, - ნათქვამია ოფიციალურ წერილში.

„ლიდსი“ და უშუალოდ ბიელსა დიდხანს იყვნენ ჩუმად. მოულოდნელად, ამ თემაზე კომენტარი გააკეთა მაურისიო პოჩეტინომ.

„ტოტენჰემის“ თავკაცი ბიელსას არა მხოლოდ თანამემამულე და კარგი ნაცნობი, არამედ, ყოფილი მოწაფეა. პოჩეტინო აღიარებს, რომ მისგან ბევრი კარგი ისწავლა და ზოგიც არც ისე კარგი:

„არა მგონია, რაიმე ცუდი იყოს იმაში, რომ მეტოქეზე რაც შეიძლება მეტი ინფორმაცია მიიღო. ბიელსასგან მეც ვისწავლე ბევრი კარგი რამ და ბევრიც - არც ისე კარგი. 17 წლის ვიყავი მაშინ და კარგად მახსოვს, ყველა არგენტინული გუნდის მწვრთნელი ვიღაცას აგზავნიდა მეტოქის ვარჯიშის საყურებლად. მესმის, რომ ინგლისში ეს უჩვეულო ფაქტია, მაგრამ არგენტინაში პირიქით - ამ მეთოდს ყველა მწვრთნელი მიმართავდა. არა მგონია, რომ ეს სკანდალის მიზეზად უნდა იქცეს“, - ამბობს პოჩეტინო.

საინტერესოა იმ ახალგაზრდა მამაკაცის ისტორია, ვისაც შპიონაჟზე წაასწრეს. პაკი, როგორც მას ეძახიან, ბიელსას ქალიშვილის მეგობარია. თავის დროზე მარსელომ ის სამსახურში აიყვანა მას მერე, რაც მძიმე გამოცდა მოუწყო იმაზე, თუ როგორ ერკვევა უმცირეს სათამაშო ნიუანსებში. რამდენიმესაათიანი „დაკითხვის“ შემდეგ, ბიელსა ახალგაზრდის საფეხბურთო ერუდიციით აღფრთოვანებული დარჩა და მას მერე სწორედ მისგან იღებს ინფორმაციებს მეტოქე გუნდებზე, ფეხბურთელებსა და სხვა დეტალებზე...

„პაკი“ - დღეს არის ფრანსისკო მენეგინი, უკვე სერიოზული მწვრთნელი, რომელიც არგენტინის ნაკრების შტაბში იყო მსოფლიოს ჩემპიონატის დროს, ნოემბერში კი ჩილეს გუნდი „უნიონ ლა კალერა“ ჩაიბარა. ჯერჯერობით ის თავისუფალია და ბიელსას ეხმარება იმ საქმეში, რაც კარგად ეხერხება. ყოველ შემთხვევაში, ამ კონკრეტულ სიტუაციაში მისმა ინფორმაციამ კარგად იმუშავა - როგორც ზემოთ გითხარით, „ლიდსმა“ 2:0 მოუგო „დერბის“...

ყოველდღიური სპორტული გაზეთი "ლელო"
1037
მკითხველის კომენტარები / 0 /
მსგავსი ამბები
რუბრიკის სხვა სიახლეები
;