სკანდალის გაგრძელება - მოკვეთეთ იოზილი და გიუნდოგანი! პეტიციაზე უკვე 30 ათასი ხელმოწერაა

გერმანიის ნაკრების გულშემატკივრები ბუნდესგუნდიდან მესუთ იოზილისა და ილქაი გიუნდოგანის მოკვეთას ითხოვენ.

პეტიციაზე უკვე 30 ათასი ხელმოწერაა. საქმე ისაა, რომ იოზილი და გიუნდოგანი ("ევერტონის" თურქ შემტევ ჩენკ თოსუნთან ერთად) შეხვდნენ ინგლისში ვიზიტით მყოფ თურქეთის პრეზიდენტ რეჯებ თაიიპ ერდოღანს, მასთან ერთად სამახსოვრო ფოტოები გადაიღეს და თავიანთი კლუბების მაისურებიც აჩუქეს.

ერდოღანის მიმართ ევროპაში და, კონკრეტულად, გერმანიაში არსებული ნეგატიური განწყობიდან გამომდინარე, თურქული ფესვების მქონე იოზილისა და გიუნდოგანის ჟესტმა გულშემატკივარში უკმაყოფილება გამოიწვია. ფოტოსთან დაკავშირებით კრიტიკული კომენტარი გააკეთა თვით გერმანიის კანცლერმა ანგელა მერკელმაც.

ამ დროისთვის, გერმანიის ნაკრების მთავარ მწვრთნელ იოახიმ ლიოვს დასახელებული აქვს სამუნდიალე გაფართოებული შემადგენლობა. 27-კაციანი სიიდან მას 4 ფეხბურთელის შინ დატოვება მოუწევს. ფანების მოთხოვნა კატეგორიულია: 4-დან 2 ზედმეტი იოზილი და გიუნდოგანი უნდა იყოს.

"ჩვენ ამას არ ვგეგმავთ იმ შემთხვევაშიც კი, თუ ფანების რეაქცია კიდევ უფრო ხისტი იქნება", - თქვა ლიოვმა.

"ჩვენი მიზანი არ იყო ის, რომ ვინმესთვის რაიმე პოლიტიკური მესიჯი გაგვეგზავნა. ჩვენ ფეხბურთელები ვართ და არ ვერევით პოლიტიკაში. არ მესმის, რატომ უნდა გაგვეკეთებინა იგნორირება იმ ქვეყნის პრეზიდენტისთვის, საიდანაც მოდის ჩვენი ფესვები და რომელიც ჩვენი დედ-მამისა და წინაპრების სამშობლოა", - ეს კი გიუნდოგანის სიტყვებია.



ყოველდღიური სპორტული გაზეთი "ლელო"
1361
მკითხველის კომენტარები / 0 /
მსგავსი ამბები
რუბრიკის სხვა სიახლეები