სკანდალი მშვილდოსნობაში: ფედერაციის პრეზიდენტი მოკვეთეს - დისკვალიფიკაცია ნარიმანიძეს

ანთალიაში გუშინ ჰიუნდაის მშვილდოსანთა მსოფლიოს თასის მეორე ეტაპზე პლეი ოფი დაიწყო.

ამ ეტაპზე ჩვენი 6 მონაწილიდან 5 იყო გასული, იმათგანაც პირველი წრე მხოლოდ ერთმა გადალახა - ფედერაციის პრეზიდენტმა ხათუნა ნარიმანიძემ, თუმცა მეორე წრეში ისიც და მისი მეტოქეც, ჩინელი იჩაი ჭენი ჩვენთვის გაურკვეველი მიზეზით, დისკვალიფიკაციით დასაჯეს და შეჯიბრებიდან მოხსნეს, შედეგად კი ინდოელმა პრომილა დაიმარიმ უბრძოლველად მიიღო მერვედფინალის საგზური.

ნარიმანიძემ ფრანგი ნოემიე ბრიანი გადასროლაში 7:7, საერთო ანგარიშით 6:5 დაამარცხა. არადა, ნარიმანიძეს დამატებით სერიაშივე შეეძლო გამარჯვება, მეხუთე სეტი 26:27 რომ არ წაეგო.

ის თავიდან დაწინაურდა - 27:26, მაგრამ შემდეგ 25:27 წააგო, რასაც ძირითადი სერიის ბოლო სეტში ფრე მოჰყვა: 27:27 და საერთო ანგარიშიც საყაიმო დარჩა: 3:3.

მეოთხე სეტში ნარიმანიძემ უნაკლოდ ისროლა, სამივე ისარი 10-იანში გაარტყა და 30:27 მოიგო, თუმცა, როგორც გითხარით, მეხუთე წააგო და საერთო ანგარიში 5:5 გახდა.

გადასროლაში ორივეს დაბალი, მაგრამ ერთნაირი შედეგი ჰქონდა, თუმცა ჩვენებურის ისარი ცენტრთან უფრო ახლოს იყო და გამარჯვებაც მას დარჩა.

მსოფლიოსა და ევროპის ვიცე-ჩემპიონმა ქრისტინე ესებუამ პირველივე ბრძოლა 4:6 დათმო ინდოელ დევი ბომბაილა ლაიშრამთან. ესებუამ მოიგო პირველი სეტი - 29:27, დანარჩენები კი ასე დასრულდა: 29:29; 26:28; 24:28 და 28:28.

ციკო ფუტკარაძე საწყის ეტაპზე ასევე 4:6 დამარცხდა ტაივანელ ჰსიაო-იუან ლოსთან. პირველ სეტში მარცხის შემდეგ (23:26), ჩვენებურმა მომდევნო ორი მოიგო და 4:2 დაწინაურდა: 26:25; 28:27. თუმცა, სამწუხაროდ, უპირატესობა ვერ შეინარჩუნა და დამატებით სერიებში 26:28 და 25:27 დამარცხდა.

ვაჟებში ლაშა ფხაკაძემ 0:6 დათმო ბრიტანელ პატრიკ ჰიუსტონთან (28:30; 27:28; 25:28). ზურაბ მესტვირიშვილმა პირველი სეტი კი მოუგო ჰოლანდიელ იან ვან ტონგერენს - 28:27, თუმცა დანარჩენები წააგო: 24:28; 25:29; 27:28.

სამაგიეროდ, ჩვენმა ქალებმა გუშინ გუნდურ ტურნირში იმარჯვეს - პლეი ოფის პირველ წრეში ყაზახეთს 5:1 მოუგეს. მათ იმარჯვეს თავიდან ორ სეტში - 55:45; 54:48, ბოლო კი ფრედ დასრულდა - 55:55. დღეს ჩვენი ნაკრები ტაივანის ძლიერ გუნდს ხვდება.

ყოველდღიური სპორტული გაზეთი "ლელო"
3059
მკითხველის კომენტარები / 1 /
მშვილდოსანი
0
რატომ იწყებთ გაშუქებას "ფლეი ოფებიდან"? გაამახვილეთ ყურადღება იმაზეც, რონ საკვალიფიკაციო ეტაპზე ქალები განლაგდნენ 44 დან 70 ადგილებზე.
და თუ გვაცნობებთ დისკვალიფიკაციაზე, კარგი იქნებოდა, რომ მიზეზიც გაგეგოთ!
მსგავსი ამბები
რუბრიკის სხვა სიახლეები
;