სკანდალი ოქროს ბურთის დაჯილდოვების შემდეგ! რატომ გამოლანძღა რონალდოს დამ ვან დეიკი?

ართალია, "ოქროს ბურთის" დაჯილდოვების ცერემონიალი დასრულდა, მაგრამ სკანდალები არ წყდება. ახლა ყველა ლაპარაკობს კონფლიქტზე, რომლის მთავარი გმირები არიან "ლივერპულის" მცველი ვირჯილ ვან დეიკი და კრიშტიანო რონალდოს და - კატია ავეირუ. სკანდალი გვარიანი გამოდის და იმდენად მძაფრია, ძალიან საეჭვოა, მალე ჩაქრეს ვნებათაღელვა...

მოგეხსენებათ, თავად კრიშტიანო რონალდო ცერემონიას არ დაესწრო. ბევრმა ექსპერტმა ეს შემდეგნაირად ახსნა: რონალდომ იმთავითვე იცოდა, რომ გამარჯვება მას არ დარჩებოდა და თავი აარიდა ზედმეტ წვალებას. ოფიციალური ვერსია, თუ რატომ არ დაესწრო ის დაჯილდოვების ცერემონიალს, ამ დრომდე არ ხმაურდება.

დაჯილდოვების დაწყებამდე ჟურნალისტებმა ვირჯილ ვან დეიკს ჰკითხეს: "როგორც უკვე ვიცით, კრიშტიანო რონალდო არ დაესწრება დაჯილდოვების ცერემონიალს. ნიშნავს ეს თუ არა იმას, რომ ერთი კონკურენტი უკვე ჩამოგშორდათ"? - ამ კითხვას ჰოლანდიელმა იუმორნარევი პასუხი გასცა: "რა, ის მართლა იყო კონკურენტი"?

ყველა, ან თითქმის ყველა, მიხვდა, რომ ამ შემთხვევაში ვან დეიკმა იხუმრა. არადა, მის ვრცელ ინტერვიუში სწორედ ეს ფრაზა მოექცა მთელი მსოფლიოსა და ჟურნალისტების ყურადღების ქვეშ. დანარჩენი ყველამ გაატარა.

ნებისმიერი ადამიანი უნდა მიმხვდარიყო, რომ ეს სიტყვები ვან დეიკმა იუმორით თქვა. ზოგადად, ვან დეიკი დაკვირვებული ადამიანია და საერთოდ არ ეხვევა სკანდალებში, მაგრამ, როგორც ჩანს, როცა საქმე რონალდოს ეხება, იუმორის გამოვლინებასაც უნდა მოერიდო.

განსაკუთრებით მძაფრი რეაქცია ჰქონდათ კრიშტიანოს თაყვანისმცემლებს, მის თავგადაკლულ ფანებს. სოციალური ქსელი, ამ სიტყვის სრული მნიშვნელობით, აფეთქდა. მათ შორის დისკუსიაში ჩაებნენ საქვეყნოდ ცნობილი ჩვენი კოლეგები.

ინგლისელმა ჟურნალისტმა პირს მორგანმა კრიტიკის ქარ-ცეცხლში გაატარა ვან დეიკი. მან საკუთარ "ტვიტერზე" ჯერ ჰოლანდიელი მცველის მიერ ნათქვამი ფრაზა მოიყვანა, მერე კი საკუთარი კომენტარი მიაწერა: "არა, რონალდო გაცილებით დიდი ფეხბურთელია. შენ მის ლიგაში არ თამაშობ".

არ დააყოვნა ვან დეიკის პასუხმა: "გამარჯობა, პირს! შენ რომ მხოლოდ მყვირალა სათაურებით არ იყო დაინტერესებული, შენ რომ მთელი ინტერვიუ წაგეკითხა, მიხდებოდი, რომ ეს მხოლოდ ხუმრობაა და მეტი არაფერი. მაშინ შენ იმასაც გაიგებდი, რომ მესისა და რონალდოს მიმართ მე მაქვს ერთადერთი გრძნობა და ეს გრძნობა არის ძაიან დიდი პატივისცემა", - დაწერა ვან დეიკმა სოცქსელში.

რა თქმა უნდა, იმავე ქსელის მეშვეობით ჩვენ შეგვიძლია გავარკვიოთ, ვისი პასუხი უფრო მოეწონა საზოგადოებას. უნდა ითქვას, რომ ამ შემთხვევაში ხალხი ჰოლანდიელი მცველის მხარეს იყო.

ვან დეიკი რომ ნამდვილად ხუმრობდა, ამის თაობაზე ნათლად მეტყველებს ერთი ნაწყვეტი მისი ინტერვიუდან: "როცა ხარ "ოქროს ბურთის" ნომინანტებს შორის, ეს მართლაც უდიდესი პატივია და ამისთვის ღირდა ის დიდი შრომა, რაც ფეხბურთში ჩავდე. აქ არის გამარჯვებული, მაგრამ არ არსებობენ დამარცხებულები. ჩვენ ყველანი გამარჯვებულები ვართ", - თქვა ვან დეიკმა.

ახლა ვნახოთ, რა თქვა მან კონკრეტულად ლიონელ მესისა და რონალდოს თაობაზე. "ძალიან რთულია, მოიგო "ოქროს ბურთი" მანამ, ვიდრე მესი და რონალდო თამაშობენ ფეხბურთს".

დაჯილდოვების ცერემონიის შემდეგ ვან დეიკმა ინტერვიუ მისცა ჟურნალისტებს, სადაც თქვა: "ყველა დანარჩენისთვის, სამწუხაროდ, დღეს ფეხბურთში არის განსაკუთრებული ნიჭით დაჯილდოვებული ორი ფეხბურთელი. მე ძალიან ვამაყობ იმით, რაც გავაკეთე ერთი წლის განმავლობაში, მაგრამ ჩვენ ანგარიში უნდა გავუწიოთ სხვათა დიდებასაც. მე ძალიან ბევრს ვეცადე, მაგრამ გამოჩნდა ისეთი მოთამაშე, ვინც ჩემზე ოდნავ უკეთესი იყო. ისეთ შედეგებს, როგორიც აქვს მესის, დაფასება სჭირდება. ექვსი "ოქროს ბურთის" მოგება დიდებული და მესი სწორედ ასეთი ფეხბურთელია. ამ საკითხს ზედმეტი განხილვა არ სჭირდება".

თითქოს ყველაფერი ჩაწყნარდა, მაგრამ თურმე, სად ხარ?! სწორედ ამ დროს გამოჩნდა ასპარეზზე კრიშტიანოს და - კატია ავეირუ. მან სოციალურ ქსელში გამოაქვეყნა ვრცელი და ძალიან სკანდალური წერილი, რომელსაც აქვე გთავაზობთ:

"ზოგიერთ ადამიანს არ შეუძლია, იმედგაცრუებას შეურიგდეს. ის, რაც ვირჯილ ვან დეიკმა უპასუხა ჟურნალისტს, არის საკუთარ თავში ზედმეტად დარწმუნებული ადამიანის საუბარი და მეტი არაფერი. თავიდანვე იყო ცნობილი, რომ ჩემი ძმა ვერ მოიგებდა "ოქროს ბურთს". ეს, მიუხედავად იმისა, რომ მან მოიგო ძალიან მნიშვნელოვანი გუნდური ჯილდოები. ეს სულ სხვა თემაა და კიდევ გასარკვევია, სად არის აქ სიმართლის გზა? ძვირფასო ვირჯილ, სადაც შენ ახლა მოხვდი, იქ კრიშტიანო უკვე ათასჯერ იყო. ის არის იმ ქვეყნის სამგზის ჩემპიონი, სადაც შენ თამაშობ წლების განმავლობაში.

ის იყო იმ ქვეყნის საუკეთესო ფეხბურთელი და ჩემპიონი, სადაც შენ თამაშობ. მაშინ, სხვათა შორის, ძვირფასო ვირჯილ, ის შენზე გაცილებით პატარა იყო. მერე ის სხვა ქვეყანაში წავიდა სათამაშოდ და "რეალის" ისტორიაში საუკეთესო ფეხბურთელი გახდა. ეს სახელი, ნეტავ, რამეს გეუბნება? ეს ის კლუბია, რომლის შემადგენლობაშიც შენ კრიშტიანომ ფინალი მოგიგო.

სხვათა შორის, რონალდომ ხუთჯერ მოიგო ჩემპიონთა ლიგა! არც ის უნდა დაგავიწყდეს, რომ ნაკრებში თანაგუნდელებთან ერთად სწორედ კრიშტიანომ გაჭყლიტა შენი "ფორთოხალი" ერთა ლიგის ფინალში. ალბათ, გაგიჭირდა, ძალიან გაგიჭირდა! რონალდომ ამ სეზონშიც კი შენზე მეტი ტიტული მოიგო. სეზონში, რომელიც საუკეთესოდ ითვლება შენს კარიერაში. ასე რომ, ძვირფასო ვირჯილ, წადი და ჯერ რამდენიმე ისეთი ტიტული მოიგე, რომელიც რაღაცას ნიშნავს. მხოლოდ ამის შემდეგ შეგვიძლია ჩვენ, თანაბრად დავდგეთ და ვილაპარაკოთ.

ჯერ ამის გაკეთება ადრეა. მხოლოდ ამის შემდეგ შეგიძლია, კრიშტიანოსთან ერთ მაგიდასთან დაჯდე!.. შენ კი, კრიშტიანო, ჩემთვის მუდამ იქნები მსოფლიოს საუკეთესო ფეხბურთელი. ვინც ასე არ თვლის, შეუძლია, ცირკში სცადოს ბედი - ასე ამბობენ ჩვენს პატარა ქვეყანაში, რომელსაც ბევრი მიიჩნევს პატარად, მაგრამ მან მსოფლიოს არაერთი დიდებული ადამიანი აჩუქა".

აქ დასრულდა კატია ავეირუს წერილი. ვნახოთ, უპასუხებს თუ არა მას ვირჯილ ვან დეიკი. ჯერჯერობით, ჰოლანდიელი ვარსკვლავი დუმს. ვნახოთ, რამდენ ხანს გაგრძელდება ეს დუმილი. იქნებ, "ლივერპულის" საქმეებით გადატვირთულმა ვან დეიკმა ვერც კი მოიცალოს პასუხისთვის...

3842
მკითხველის კომენტარები / 2 /
კაიას
0
ეჰ რონალდუს და რა გაყეყეჩებულუა, აშკარად ასტრალში.
რეზო
0
რბილი "ლ" და ნარცისიზმი.
მსგავსი ამბები
რუბრიკის სხვა სიახლეები
;