[სკანდალი] პრემიერლიგაში დაბრუნებულ შეფილდ იუნაიტედს #1 ტერორისტის ბინ ლადენის ოჯახი აფინანსებდა  

12-წლიანი პაუზის შემდეგ "შეფილდ იუნაიტედი" პრემიერლიგაში დაბრუნდა და სამხრეთ იორკშირის ერთ ნაწილში დიდი ზეიმია.

თუმცა ბოლო დღეებში ამ კლუბთან დაკავშირებით ისეთმა ფაქტმა წამოყო თავი, წმინდა საფეხბურთო თემებმა უკანა პლანზე გადაიწია...

უმაღლეს სასამართლოში დაიწყო მოსმენები "შეფილდ იუნაიტედის" მეპატრონეთა შორის დავაზე. სწორედ ამ მოსმენების დროს გაირკვა, რომ 2017 წელს კლუბმა 3 მილიონი ფუნტის ინვესტიცია მიიღო... მსოფლიოს ნომერ პირველი ტერორისტის, უსამა ბინ ლადენის ოჯახისგან.

"ალ ქაედას" დამაარსებელი ბინ ლადენი, რომლის სახელსაც უკავშირდება 2001 წლის 11 სექტემბრის ტერაქტი, 2011 წელს სპეცოპერაციის დროს მოკლეს.

მიუხედავად ამისა, მისი სახელის ხსენება რაიმე ტიპის ინვესტიციასთან მიმართებაში, უმალ წარმოშობს ეჭვებს, რომ ეს არის "ფულის გათეთრება" (თუ "გარეცხვა") ისევ და ისევ ტერორიზმის შემდგომი დაფინანსებისთვის.

დღესდღეობით, "შეფილდ იუნაიტედის" აქციების 50 პროცენტს კლუბის ძველი მხარდამჭერი და დიდი ხნის თავმჯდომარე კევინ მაკქეიბი ფლობს.

დანარჩენი 50 პროცენტი მან 2013 წელს 10 მილიონ ფუნტად მიჰყიდა საუდის არაბეთის პრინცს აბდულა ბინ მოსაად ბინ აბდულაზიზ ალ საუდს.

კევინ მაკქეიბი და აბდულა ბინ მოსაად ბინ აბდულაზიზ ალ საუდი


სიამტკბილობაში დაწყებულ ურთიერთობას წყალი 2017 წლის თებერვალში შეუდგა, როცა "შეფილდ იუნაიტედმა" 3 მილიონი ფუნტი მიიღო ვინმე რაკან ალ ჰართისგან, რომელიც წარმოადგენდა კომპანია "ჩერველ ინვესტმენტ ლიმითედს".

არაბული მხარე ამტკიცებს, რომ ეს თანხა, როგორც ერთჯერადი უპროცენტო დახმარება, უკან უნდა დაბრუნებულიყო, რასაც კატეგორიულად უარყოფს 50 პროცენტის მფლობელი მაკქეიბი - მსგავსი შეთანხმება არ ყოფილაო.

თუმცა აქ მთავარი ეს არის. როგორც ირკვევა, ზემოთ ხსენებული რაკან ალ ჰართი ბინ ლადენის ოჯახის წევრია. გაზეთი "შეფილდ სტარი" პრინცის ადვოკატ ანდრეას გლედჰილზე დაყრდნობით ამტკიცებს, მაკქეიბიმ კარგად იცოდა ამ ფულის წარმომავლობა.

ამის გარკვეული მტკიცებულებაც არსებობს. ეს არის მიმოწერა მაკქეიბსა და "შეფილდ იუნაიტედის" დირექტორატის წევრ ჯერემი ტეტონს შორის. ტეტონი 2017 წლის შემდეგ აღარ არის "შეფილდში".

ის სწერს მაკქეიბს: "ძალიან არ მინდა, გაზეთებში წავიკითხო ასეთ სათაური - "შეფილდ იუნაიტედი" ფულს "რეცხავს" ტერორისტებისთვის".

მაკქეიბის თქმით, ეს იყო ჩვეულებრივი ხუმრობა, თუმცა, დიდი ალბათობით, სწორედ ეს 3 მილიონი ფუნტი გახდა მასსა და ტეტონს შორის განხეთქილებისა და დირექტორატიდან ტეტონის წასვლის მიზეზი.

"შეფილდ იუნაიტედმა" გაავრცელა განცხადება, სადაც უსამა ბინ ლადენის ოჯახთან კავშირსა და, მით უმეტეს, ამ ოჯახისგან დაფინანსება კატეგორიულად უარყო.

სასამართლოში ამ საქმესთან დაკავშირებით მოსმენები კიდევ რამდენიმე კვირა გაგრძელდება და არ არის გამორიცხული, უფრო სკანდალური დეტალებიც ამოტივტივდეს.

ყოველდღიური სპორტული გაზეთი "ლელო"
4036
მკითხველის კომენტარები / 0 /
მსგავსი ამბები
რუბრიკის სხვა სიახლეები
;