სკანდალი ძიუდოში - ვრცელი ანალიზი: ყრილობა, არეულობა და ახალი ბრალდებები

გუშინ სასტუმრო "ბილტმორში" ძიუდოს ფედერაციის შეპირებული რიგგარეშე ყრილობა კი გაიმართა, მაგრამ ის რომ ქართულ ძიუდოში მიმდინარე მორიგ სკანდალს ვერ ჩააცხრობდა, დილითვე გაცხადდა.

ჯერ იყო და აბუნტებულთა ლიდერმა ვალერი ლიპარტელიანმა გააკეთა განცხადება, რომ ისინი არ აპირებდნენ ყრილობაზე დასწრებას, რადგან ფედერაციის პრეზიდენტი დავით ქევხიშვილი მას საკუთარ ბენეფისად აქცევდა და მისვლას აზრი არ ჰქონდა.

დაახლოებით მაშინვე გაცხადდა, რომ ყრილობის დაწყებამდე სპეციალურ განცხადებას გააკეთებდა ევროპიდან ახალდაბრუნებული კულტურისა და სპორტის მინისტრი მიხეილ გიორგაძე.

მან მართლაც გააკეთა ეს განცხადება, სადაც დააანონსა სამთავრობო კომისიის შექმნა სპორტის სამინისტროს, სპორტის საპარლამენტო კომიტეტისა და საქართველოს ეროვნული ოლიმპიური კომიტეტის ხელმძღვანელთა ბაზაზე.

მისი მიზანი იქნება ფედერაციის აუდიტი, მისი საქმიანობის დეტალური შესწავლა. თან მინისტრმა იქვე დადო პირობა, რომ ისინი ობიექტურნი იქნებიან. ამ განცხადებით უკვე ნათელი გახდა, რომ ყრილობის გადაწყვეტილებაზე მეტი ფასი სწორედ ამ კომისიის საბოლოო დასკვნას ექნებოდა და ის განსაზღვრავდა ძალიან ბევრ რამეს.

მინისტრმა იქვე ერთი საგულისხმო ფრაზაც ბრძანა: ნურავინ ეცდება სამართლებრივი ჩარჩოებიდან გასვლასო. დაგვეთანხმებით, ეს პირდაპირი თითის დაქნევა იყო ორივე მხარის მისამართით, ხოლო თუ გავითვალისწინებთ, რომ ქევხიშვილი და ფედერაცია არც აქტიურობენ და მათგან კანონის ფარგლებს გარეთ გასვლა არცაა მოსალოდნელი, ნაკლებად სავარაუდოა, გიორგაძე მათ გულისხმობდა.

ყრილობა

...ყრილობა დათქმულ დროს დაიწყო, თუმცა იქ მისულ ჟურნალისტებს სიურპრიზი დაგვხვდა - სხდომა დახურული იყო და დარბაზში არ გვიშვებდნენ. ერთი საათიც არ იქნებოდა გასული, ლიფტის კარი ხმაურით გაიღო და ძიუდოისტები ფოიეში გამოიჭრნენ.

ისინი პირდაპირ დაცვას მიადგნენ და შიგ შეშვებას ითხოვდნენ, რასაც მცირეხნიანი ხმამაღალი ლაპარაკის შემდეგ მიაღწიეს კიდეც. 10-ოდე წუთიც არ იქნებოდა გასული, ახლა უკვე დარბაზის კარი გაიღო ხმაურით და ძიუდოისტები ახლა იქიდან გამოცვივდნენ ხმამაღალი ლაპარაკით.

ოღონდ მედიასთან კომენტარისთვის არ გაჩერდნენ და პირდაპირ ლიფტს მიაშურეს. ლიპარტელიანი ყვიროდა, ასე გაგრძელდება მთელი ცხოვრებაო, თუმცა, ვერ გეტყვით, რას გულისხმობდა.

მოგვიანებით სხდომიდან სპორტის საპარლამენტო კომიტეტის თავმჯდომარე მიხეილ ყაველაშვილი გამოვიდა და მედიასთან პირველი ვრცელი კომენტარიც მან გააკეთა. ყაველაშვილმა ისევ გაიმეორა ადრინდელი ნათქვამი, ქევხიშვილი არჩეული პრეზიდენტია და არ უნდა გადადგესო.

თან დაამატა, რომ პრეზიდენტმა ყველა ბრალდებაზე საბუთები წარმოადგინა, ძიუდოისტთა მისამართით კი განაცხადა, მათთვის აზრის გამოთქმა არავის დაუშლიაო, დანარჩენი კი თავად იხილეთ მის სიტყვებში:

- ძიუდოისტები დაგვიანებით მოვიდნენ ყრილობაზე და ითხოვეს დასწრება, რაზეც მიიღეს თანხმობა. ჩვენი თხოვნა იყო, დამსხდარიყვნენ და კონსტრუქციულ რეჟიმში განეცხადებინათ თავიანთი პრეტენზიები. სამწუხაროდ, მათ ეს არ სურდათ, სხვა ფორმატში უნდოდათ საუბარი. მათ გააკეთეს განცხადება, დასვეს რამდენიმე კითხვა, მაგრამ პასუხებს არ დაელოდნენ, ისე დატოვეს დარბაზი.

ყრილობა ამის შემდეგაც საკმაო ხანს გაგრძელდა, თუმცა ექსცესების გარეშე დასრულდა. როგორც გავიგეთ, ქევხიშვილმა მონაწილეებს ანგარიში წარუდგინა თავისი მუშაობის შესახებ, რასაც არავინ შეწინააღმდეგებია, ამის შემდეგ კი იმსჯელეს შექმნილ ვითარებაზე.

ატკატები

ყრილობის შემდეგ მედიასთან ვრცელი კომენტარი გააკეთა ქევხიშვილმა, რომელსაც ბოლოს შემოგთავაზებთ, მანამ კი მოვლენათა განვითარებას მივყვეთ.

ძიუდოისტები დღის განმავლობაში კიდევ რომ გეგმავდნენ განცხადების გაკეთებას, ეს ადრევე დააანონსეს და ნაშუადღევს მცხეთიდან მორიგი სატელევიზიო ჩართვა გააკეთეს, სადაც განცხადება ისევ ლიპარტელიანმა გააკეთა.

ამჯერად მან გაცილებით უფრო კონკრეტული, 17-პუნქტიანი ბრალდებები წარმოადგინა, რომელთა უმეტესობა ფინანსური ხასიათისაა. ბუნებრივია, ამ ბრალდებებზე ფედერაციის ნაცვლად ვერ ვისაუბრებთ, მაგრამ ჩვენი ყურადღება ერთმა გარემოებამ მიიქცია:

ფინანსურ ბრალდებებს შორის ნაწილი ეხება მწვრთნელთა ხელფასებისა და პრემიების 10 პროცენტს, რომელიც, ამ განცხადების თანახმად, თურმე "ატკატების" სახით ბრუნდება ფედერაციაში.

საკითხავია, რატომ არ განაცხადეს ამის შესახებ თავად მწვრთნელებმა, ნუთუ ისინი სპორტსმენებს იყენებენ (დღის ბოლოს ამაზე მხოლოდ ლევან ციგრიაშვილმა ისაუბრა)? რატომ არ თქვეს ამის შესახებ მათ და რატომ დაანებეს ამ თემის გაჟღერება სპორტსმენებს?

ვიმედოვნებთ, ქართულ ძიუდოში ერთხელ და სამუდამოდ დამყარდება სიმშვიდე და ნაკრები გააგრძელებს მსოფლიოს ჩემპიონატისთვის მზადებას.

ქევხიშვილი არ გადადგება

დავით ქევხიშვილი (ძიუდოს ფედერაციის პრეზიდენტი):
- მათ არანაირი ისეთი კითხვები არ ჰქონდათ, რომელზეც შეიძლებოდა პასუხის გაცემა. უბრალოდ, ეს იყო მცდელობა იმისი, საზოგადოებისთვის ამ ფორმატში დაენახვებინათ, რომ ფედერაციაში პრობლემებია.

კითხვებს რაც შეეხება, ამ სამი დღის განმავლობაში მე ყველაფერი დავაჯამე, შევაჯამე და მოვიწვიე ყრილობა, ვის წინაშეც, უპირველესად, ვარ პასუხისმგებელი. ბუნებრივია, მივესალმები სამინისტროს, სპორტის საპარლამენტო კომიტეტის პოზიციას, რომ შექმნეს კომისია და ამ ფორმატში ორივე მხარეს მოგვეცემა ჩვენი კითხვა-პასუხების წარდგენის საშუალება, თუმცა, უპირველესად, ეს ყველაფერი ყრილობის წინაშე განვაცხადე.

მათ დოკუმენტალურად თუ შინარსობრივად ავუხსენი არსებულ ვითარებასთან დაკავშირებით და, რეალურად. ყველანი ვთანხმდებით, რომ ეს პროცესები არაა ის, რაც ასე უნდა გაგრძელდეს ანუ სპორტსმენები არ არიან ის კომპეტენტური პირები, რომლებიც ასეთ ფორმატში უნდა ითხოვდნენ ფედერაციის პრეზიდენტის გადაყენებას.

ამ შემთხვევაში მე არ ვიცავ დავით ქევხიშვილს, როგორც - ფედერაციის პრეზიდენტს, ამ შემთხვევაში მე ვიცავ ფედერაციის პრეზიდენტს, როგორც - ინსტიტუტს, რაც ძალიან მნიშვნელოვანია, რომ მომავალში აღარ განმეორდეს ეს პროცესები.

ვფიქრობ, დღეს საერთო ენა მაინც გამოინახება. მით უფრო ამ ბიჭების უმრავლესობიდან პირად საუბრებში არც მათ აქვთ ჩემთან რამე მოთხოვნები და არც - პირიქით.

როცა მათთან ვსაუბრობ, ამბობენ, რომ პირადად ჩემთან პრეტენზიები არ აქვთ, მაგრამ გუნდია და ერთად სურთ ყოფნა. კი ბატონო - მესმის მათი, ვალერი ლიპარტელიანს კი მინდა მივმართო, რომ მასზე წინ მეც ვიყავი გუნდის კაპიტანი ოთხი წელიწადი. მაშინაც გვქონდა ანალოგიური პრობლემები ნაკრებში - 2009 წელს, მაგრამ არასოდეს არ გამოვსულვარ და ამ პრობლემებზე არ მილაპარაკია საჯაროდ.

ფედერაციის პრეზიდენტთანაც კი არ მისაუბრია, მხოლოდ მთავარ მწვრთნელთან მისვლა და საუბარი ჩავთვალე საჭიროდ. არც ერთი შეკრებისა თუ შეჯიბრებისთვის ბოიკოტი არ გამომიცხადებია, თუ არადა, აგერ, ჰკითხეთ შოთა ხაბარელს. ყველა დაგეგმილ ღონისძიებაში მივიღე მონაწილეობა და როცა დრო მოვიდა, გავუყევი ჩემს გზას. არ შეიძლება, კაპიტანი ასე პროვოცირებდეს და ბიჭებს ამ გზაზე აყენებდეს.

ეს არაა სწორი საქციელი. კიდევ ვამბობ - ამ პროცესის უკან დგანან რაღაც ჯგუფები, თუმცა ამ თემის დეტალურად ჩაღრმავება არაა მიზანშეწონილი. მით უფრო, მთავარი პრობლემა კიდევ უფრო სხვაა. ლიპარტელიანს კიდევ ერთხელ მოვუწოდებ, როგორც გუნდის კაპიტანს, ის უნდა მოიქცეს ისე, როგორც გუნდის კაპიტანი.

ვფიქრობ, შესაძლებელია, ამ ყველაფრის მაგიდის ფორმატში გადატანა. მზად ვარ, ნებისმიერ კითხვაზე გავცე მათ პასუხი. ყრილობას რომც ჩაეთვალა საჭიროდ, თითქოს ჩემს ქმედებებში იყო ხელის შემშლელი ფაქტორები, მე მზად ვარ წავიდე, მაგრამ არაფერი მსგავსი არ ყოფილა და ამის გამო მე რომ წავიდე, რეალურად, საფრთხე შეექმნება ფედერაციის პრეზიდენტს, როგორც ინსტიტუტს.

ჩემთვის მთავარია ყრილობის გადაწყვეტილებები - რასაც ის მიიღებს, მე ვემორჩილები. ერთხელ და სამუდამოდ უნდა ვისწავლოთ წესების ფორმატში მოქმედება და არა რამდენიმე სპორტსმენს რომ მოუნდეს, გამოვიდეს და რომელიმე კონკრეტული პიროვნების გადაყენება მოითხოვოს. ამაზეა საუბარი, თორემ თანამდებობას არავინ მისტირის.

სულაც არ გამოვრიცხავ ჩვენი ერთად მუშაობის შესაძლებლობას. თუ ვინმეს არ უნდა ძიუდოს გაგრძელება, ეს სხვა თემაა, მაგრამ დავით ქევხიშვილი თუ არ გადადგება, მე არ ვიქნებიო, ეს არაა ლოგიკური და სწორი. ყველა საშუალება არსებობს იმისთვის, რომ მათ წარმატებას მიაღწიონ, ხოლო თუ ვინმეს თავის დანებება უნდა, ეს მათი საქმეა.

კონკრეტული შეჯიბრების შედეგთან მიმართებაში მწვრთნელთა საბჭოს აქვს თავისი პასუხისმგებლობა, რომელიც უკვე აღებულია. ცხადია, მეც მაქვს ჩემი პასუხისმგებლობა, მაგრამ თურმე ყველა პირობა მაქვს შექმნილი, რომ სპორტსმენი კარგად მოემზადოს, მე რატომ უნდა ავიღო პასუხისმგებლობა?

კიდევ ერთხელ ვაცხადებ სრული პასუხისმგებლობით: ნაკრების არც ერთი წევრი ანუ ისინი, რომლებიც ევროპისა და მსოფლიოს ჩემპიონატებისთვის ემზადებიან, არასოდეს არსად არ წასულან თავისი ხარჯით.

ლიპარტელიანმა ზაგრებში წასვლის სურვილი გვიან განაცხადა, თორემ იმავე შეჯიბრებაზე პაპინაშვილზე თუ მოვითხოვეთ და წავიდა, მასზე რატომ არ მოვითხოვდით? თუ პაპინაშვილმა იპოვა მწვრთნელი და დარეგისტრირდა, ლიპარტელიანმა რატომ ვერ იპოვა? ეს თითიდან გამოწოვილი ბრალდებებია. ის 29-ში წავიდა შეჯიბრებაზე, მისთვის 25-ში გვაქვს ფული მოთხოვნილი სამინისტროდან და 29-შია გადარიცხული სასტუმროს ფულიც და ყოველდღიური სახარჯოც.

ფედერაცია ვთხოვდით ბილეთსაც, თუ სად იყიდა, მაგრამ თვე და ათი დღის შემდეგ მოიტანა და ჩვენც მაშინ ავუნაზღაურეთ. განა ეს ნიშნავს, რომ საკუთარი ფულით დადიან? როცა ამბობენ, რომ თითქოს ვერევი ნაკრების დაკომპლექტებაში, მე მწვრთნელებს რეკომენდაციის სახით ვურჩევდი, რომ არ წაეყვანათ მარგიანი და ღვინიაშვილი, რადგან ტრავმები ჰქონდათ და არ იყვნენ ფორმაში, თუმცა მაინც წაიყვანეს;

მარგიანს ცალკეც ვთხოვე, არ წახვიდე და ეს ტრავმა ბოლომდე მოიშუშე-მეთქი; ასევე არ მეგონა, პაპინაშვილს თუ პირველ ნომრად წაიყვანდნენ და კირაკოზაშვილს დატოვებდნენ, ამაზე პაპინაშვილის პირად მწვრთნელსაც ვესაუბრე, მაგრამ მაინც წაიყვანეს.

ყოველდღიური სპორტული გაზეთი "ლელო"
2396
მკითხველის კომენტარები / 3 /
სოსო
0
შეიძლება პრეზიდენტი მართალიცაა,მაგრამ თუ მოჭიდავე შენთან არაა,ვინღა ოხრის პრეზიდენტი გამოდიხარ?იჭიდავეთ შენ და შენმა მოადგილემ.არ გამოვა ასე არაფერი.
,,
0
,,,
მსგავსი ამბები
რუბრიკის სხვა სიახლეები
;