სკაუდრა აძურას გასაჭირი - შვედეთთან პლეი ოფის წინ იტალიის ნაკრებს გამოკვეთილ ფავორიტად არ მიიჩნევენ

ფეხბურთის ქომაგი მუნდიალზე გასასვლელი პლეი ოფების მოლოდინშია.

ბოლო დროს იშვიათად ხდება, რომელიმე გრანდი ხათაბალაში არ გაებას. მსოფლიოს ჩემპიონატი ჰოლანდიის ნაკრების გარეშე ჩაივლის. ამას უკვე შევეგუეთ.

რა ეშველება იტალიის ეროვნულ გუნდს? ეს კითხვა აღელვებს ახლა "სკუადრა აძურას" მილიონობით გულშემატკივარს. ჯამპიერო ვენტურას გუნდს გადამწყვეტი ორრაუნდიანი ჯახი ელის შვედეთთან და ამ ჯახში, როგორც იტალიელი ექსპერტები წერენ, მათი საყვარელი ნაკრები სულაც არ არის გამოკვეთილი ფავორიტი...

არის თუ არა ეს კრიზისი?
რა თქმა უნდა, ეს კრიზისია. საქმე მხოლოდ შედეგებში როდია. ჩვენ გვახსოვს იტალიის სხვა ფორმაციის ნაკრებებიც, რომლებიც პლეი ოფით გასულან მსოფლიოს ჩემპიონატზე.

ბევრის აზრით, იტალიამ არა მარტო უღალატა თავის ჩვეულ სტილს, არამედ გუნდი არც კი ცდილობს თანამედროვე ფეხბურთის თამაშს. ამ დროს კი შვედეთის ნაკრები ძალიან აწყობილი და შეკრული გუნდია. ამიტომაც ჩნდება ეჭვები, შეძლებენ კი იტალიელები შვედების დამარცხებას?

რა არის ცუდი თამაშის მიზეზი?
როგორც წესი, როცა საქმე ეხება ეროვნულ ნაკრებს და შედეგები სასურველი არ არის, მწვრთნელს ორ მთავარ პრეტენზიას უყენებენ. პირველი, ესაა არასწორად შერჩეული ტაქტიკა, მეორე კი არასწორად შერჩეული საკადრო რესურსი.

მხოლოდ გულშემატკივრის აზრი აქ არაფერ შუაშია. ჩვენ თავისუფლად შეგვიძლია, ჯან პიერო ვენტურას "ორიანი" დავუწეროთ როგორც ერთ, ისე მეორე კომპონენტში.

მთავარი შეცდომა
მწვრთნელი იყენებს 4-2-4 ტაქტიკურ სქემას, რომელიც ხშირად გადადის 4-4-2 განლაგებაში. საინტერესოა, რომ იტალიის ყველა ასაკობრივი ნაკრები 4-3-3-ით სქემით თამაშობს. აქედან გამომდინარე, ფეხბურთელები მთავარ ნაკრებში მისვლისას აბსოლუტურად მოუმზადებლები ხვდებიან ვენტურასეულ სქემას.

თვით ლუიჯი დელ ნერი, არიგო საკის სამწვრთნელო სკოლის ბოლო რაინდიც კი, დიდი ხანია, საბოლოოდ გაემიჯნა 4-4-2-ს. კოვერჩანოში მისვლისას ფეხბურთელები ვერ ასწრებენ ვენტურას მოთხოვნების შეთვისებას და მათზე გადაწყობას. ეს შეეძლო ანტონიო კონტეს, მაგრამ ამ შემთხვევაში საქმეში ერთვებოდა მწვრთნელის ხასიათი. ფეხბურთელები მზად იყვნენ, მწვრთნელისთვის მინდორზე მომკვდარიყვნენ. შეიძლება, ტაქტიკური ნიუანსები ბოლომდე არც მათ ესმოდათ, მაგრამ ისინი ამის კომპენსირებას უდიდესი თავდადებით ახდენდნენ.

საინტერესოა, რატომ უჭირთ ნახევარმცველებს 4-4-2 სქემასთან შეგუება? ამ შემთხვევაში, მოწინააღმდეგე თითქმის სულ იღებს რიცხობრივ მეტობას, მით უმეტეს, იმ შემთხვევაში, თუ ფლანგის ნახევარმცველები ოდნავ მაინც აგვიანებენ უკან ჩასვლას. კი, ბატონო, მარკო ვერატის კარგად ამოაქვს ბურთი, მაგრამ ამის შემდეგ იწყება პრობლემები.

სქემას, რომელსაც მისდევს ვენტურა, ძალიან სჭირდება უნივერსალი ფეხბურთელები. ასეთებს კი იტალიის ნაკრების ნახევარდაცვა აშკარად მოკლებულია. შედარებით უკეთესი ფლანგების პირობებში მათი როლი გუნდის თამაშში დაკნინებულია.

ვენტურას კიდევ ერთი შეცდომა
რამდენიმე ფეხბურთელს ვენტურა, რბილად რომ ვთქვათ, ცუდად იყენებს. მაგალითად, ლორენცო ინსინიე "ნაპოლიში" ფლანგის ფორვარდს თამაშობს. ის მიჩვეულია, რომ მას აზღვევს არა მხოლოდ ფლანგელი მცველი, არამედ, ძალიან ხშირად თვით მარეკ ჰამშიკიც. ნაკრებში კი ინსინიე იძულებულია, ბოლომდე ჩავიდეს უკან.

იტალიელი ჟურნალისტების აზრით, სწორედ ეს უშლის მას ხელს იმაში, რომ თავისი შესაძლებლობები ბოლომდე აჩვენოს.

შეტევაში ვენტურა ჩირო იმობილესა და ანდრეა ბელოტის დუეტს იყენებს. რა თქმა უნდა, ეს ძალიან კარგი წყვილია, მაგრამ აქ არის ერთი ძალიან მნიშვნელოვანი "მაგრამ". ბელოტიცა და იმობილეც თავიანთ კლუბებში ეულ, გამოკვეთილ ფორვარდებს თამაშობენ და მიჩვეულნი არ არიან ორფორვარდიანი სქემით თამაშს.

საკადრო გაუგებრობები
არავინ იცის, რატომ არ ეძახდნენ ნაკრებში ადრე ჟორჟინიოს, ვინც უკვე თამაშობდა იტალიის ასაკობრივ ნაკრებში და ახლა კინაღამ ბრაზილიაში გაიქცა. მას ეროვნულ გუნდში მხოლოდ პლეი ოფისთვის დაუძახეს. არადა, ვინ იტყვის, რომ "ნაპოლის" ერთ-ერთი ლიდერი ზედმეტი იქნება "სკუადრა აძურასთვის"?!

ვენტურამ უცბად და ხელაღებით უარყო გრაციანო პელე, ვინც წინა შესარჩევ ციკლში ძალიან ბევრი გააკეთა ნაკრებისთვის. პელეს ერთ-ერთი შეხვედრის შემდეგ კონფლიქტი მოუვიდა სამწვრთნელო შტაბთან, მაგრამ სწრაფადვე მოიხადა ბოდიში და თქვა, რომ ეს თემა დაიხურა. როგორც ჩანს, დაიხურა მხოლოდ მისთვის...

კიდევ ერთი შეცდომაა სიმონე ძაძას უგულებელყოფა. ის ახლა "ვალენსიაში" ბრწყინავს. ძაძას მთავარი პლუსი ისაა, რომ შესანიშნავად ესმის იმობილესი. კონტე ამ ძალიან კარგ წყვილს შესანიშნავად იყენებდა.

ვენტურას არ ახსოვს სებასტიან ჯოვინკო, არ ახსოვს ემანუელე ჯაკერინი, მარიო ბალოტელი, ვინც ბევრი ცუდიც გააკეთა ნაკრებში, მაგრამ არც იმის დავიწყება შეიძლება, რამდენჯერ გაახარა "აძურას" ქომაგი...

ეს თაობა ყველაზე სუსტია?
რა თქმა უნდა, ასეა. ალბათ, იტალიის ნაკრების ამჟამინდელ ფეხბურთელებს ძალიან ეწყინებათ, მაგრამ ჯანლუიჯი ბუფონის, ჯორჯო კიელინისა და ლეონარდო ბონუჩის გარდა (არადა, ბოლო ორმა აშკარად მოუკლო), გუნდში არ არის მსოფლიო დონის არც ერთი ვარსკვლავი. არადა, ასეთები იტალიას სულ ჰყავდა...

არის თუ არა ეს ფეხბურთის ფედერაციის ბრალი?
კარლო ტავეკიოს ყველაფერზე მოუწევს პასუხის გაცემა, მაგრამ აქ მისი პირდაპირი ბრალეულობა ნაკლებად იკვეთება. როცა ვენტურა ნაკრებში ინიშნებოდა, გადაწყვეტილი იყო, რომ ეროვნული გუნდის ტექნიკური დირექტორი მარჩელო ლიპი უნდა ყოფილიყო. ლიპი ჩინოვნიკებს ეჩხუბა და ეს გეგმა ჩაიშალა.

არის ასეთი აზრი იტალიაში - როცა ფეხბურთის ფედერაციის პრეზიდენტი ნაკრებისთვის მწვრთნელს არჩევდა, ის ბევრად უფრო დაკვირვებული უნდა ყოფილიყო. სამართლიანობა მოითხოვს, აღინიშნოს, რომ ტავეკიოს მაინცდამაინც დიდი არჩევანი არ ჰქონდა. იყო რობერტო მანჩინის ვარიანტი, მაგრამ მან გაცილებით დიდი ხელფასი მოითხოვა, ვიდრე ვენტურამ.

არის შვედეთი ფავორიტი?
არა, ფავორიტი მაინც იტალიაა, ოღონდ, არა - უპირობო. ზლატან იბრაჰიმოვიჩი რომ ნაკრებში იყოს, შეიძლება, სხვანაირად გვეფიქრა. ახლა კი ფავორიტის მანტია მაინც "აძურას" უნდა მოვასხათ.

რა უნდა ქნას ვენტურამ?
1. მაქსიმალურად გამოიყენოს კლუბში გამოცდილი წყვილები. მაგალითად, მარჯვენა ფლანგზე დანილო დ'ამბროზიოსა და ანტონიო კანდრევას ინტერული დუეტი.

2. მოთამაშეები შეარჩიოს არა ზოგადი სტატუსის, არამედ მათი ამჟამინდელი სათამაშო კონდიციების მიხედვით.

იქნება თუ არა ტრაგედია ფიასკო?
არა, არ იქნება! იტალიაში ფეხბურთისადმი მიდგომა ისეთია, რომ მნიშვნელოვანი მხოლოდ და მხოლოდ მსოფლიოს ჩემპიონობაა. ამის შანსი, ჯერჯერობით მაინც, არ არსებობს არც ვენტურასთან ერთად და არც მის გარეშე. თავის დროზე, საფრანგეთმა გვარიანად დაისვენა მუნდიალებისგან, მერე კი მსოფლიოს ჩემპიონი გახდა...

ყოველდღიური სპორტული გაზეთი "ლელო"
1228
მკითხველის კომენტარები / 0 /
მსგავსი ამბები
რუბრიკის სხვა სიახლეები
;