ტარიელ ხეჩიკაშვილი: თავისთვის ვერ მიპატიებია, ხალხს რა ტკივილიც მივაყენეთ, მაგრამ ასეთი შეურაცხყოფა და ცილისწამება?!

საჭირო და დროული გამოხმაურება იყო. ხალხს მსხვერპლი უყვარს – 14 აგვისტოს შემდეგ სამსხვერპლო მოძებნილია – წელს ბოღმას "საბურთალოს" ვანთხევთ. 14 აგვისტოს წაგება ყველასთვის უდიდესი თავსლაფის დასხმა იყო, მაგრამ საზოგადოების ნაწილი იმდენად დარწმუნებულია, რომ "საბურთალომ" თამაში გაყიდა, საწინააღმდეგოში ვერც დაარწმუნებ.

ვინ ვის და რაში გაურიგდა – ეს ტოტალიზატორში მოთამაშეთა ბუნებაა. მაგრამ ვარაუდებზე საზოგადოებრივი აზრის შექმნა დანაშაული და საზოგადოების ნაწილის ბულინგია საზოგადოების სახელით, სადაც არგუმენტები მხოლოდ ვარაუდებს ეყრდნობა, რის გამოც "საბურთალოს" პრეზიდენტი ფეხბურთიდან წასვლას აპირებს.

იმიტომ, რომ ის ჩანაფიქრი, რის გამოც გუნდის აშენება სურდა, წაგებამ და მას შემდეგ აგორებულმა ზღვარსაგადასულმა ცილისწამებებმა წყალში ჩაუყარა. ვინც ამ ტალახს ისვრის, დარწმუნებვულია შეთქმულების თეორიაში, რომ ქართული ფეხბურთი მხოლოდ ბინძურებისაა, რომლებიც ბნელ ოთახში თამაშების გაყიდვაზე ფიქრობს – მხოლოდ და მხოლოდ ამაზე.

ესაა სწორედ უბედურება, რომ ყველას შეუძლიათ ტალახი ესროლონ. ილია კოკაია "ზესტაფონიდან" წავიდა, ახლა "საბურთალოს" პრეზიდენტი ტარიელ ხეჩიკაშვილიც იგივეზე ფიქრობს. ის, რომ სლოვაკეთსა და ესპანეთში გუნდების შესყიდვის ნაცვლად "საბურთალოს" და ქართული ფეხბურთის სამსახური გადაწყვიტა, სადაც საქართველოს ეროვნულ და ასაკობრივ ნაკრებებს არაერთი მოთამაშე გაუზარდეს, თურმე, არაფერია. არც ის, თამაშის შემდეგ ეს კაცი თვალზე ცრემლმორეული რომ იყო.

"ამ წაგებამ გამანადგურა. თავისთვის ვერ მიპატიებია, ხალხს რა ტკივილიც მივაყენეთ. მაგრამ ასეთი შეურაცხყოფა და ცილისწამება?! ყველაზე მეტად იმის ატანაა შეუძლებელი, ჩემს წესიერებაში ეჭვი რომ შეაქვთ. 14 აგვისტოს შემდეგ ნორმალურად არ დამიძინია. ფეხბურთი უზომოდ მიყვარს, მაგრამ არა იმდენად, ცილისწამება და მეტოქესთან შეკვრაზე ლამის გადაწყვეტილად ლაპარაკი რომ ავიტანო" – ამბობს ხეჩიკაშვილი.

საღად მოაზროვნე ადამიანმა ცილისწამებასა და მწარე რეალობას შორის საზღვარი უნდა გაავლოს. წაგება ყველამ მტკივნეულად მივიღეთ, მაგრამ ეს ზღვარსაგადსული ცილისწამებები უნდა შეჩერდეს. მით უფრო, რუსული გვერდის, ODDS.RU-ს მთავარ რედაქტორის, არტემ ჰარუთიანის ვარაუდებზე დაყრდნობით.

ესეც ერთი უბედურებაა, ჩვენიანზე მეტად რუსული საიტის რედაქტორის რომ გვჯერა. მაგრამ ჩვენ ხომ პერიოდულად მსხვერპლს ვეძებთ და ვიღაც უნდა ჩავქოლოთ. მერამდენე უნდა ვაცვათ ჯვარს? რიგში კიდევ ვიღაცაა, ვისაც ქართული ფეხბურთის უბედურება დაბრალდება. მაგრამ მერე, როდესაც "საბურთალოც" "ზესტაფონივით" მოგვენატრება, გვიანი იქნება, ამ საზოგადოებრივი ბულინგის ავტორები კი არავის ემახსოვრება.

არანაკლებ მტკივნეული საშინაო წაგების შემდეგ "არარატ-არმენიას" გულშემატკივრები სხვაგვარად მოიქცნენ. გუნდს მხარდამჭერთა საკმაოდ დიდი ჯგუფი ჩამოყვა – მათ თავის წაგებულებს ხელი არ კრეს და მეტოქესთან გარიგება არ დააბრალეს. პირიქით, გვერდში დაუდგნენ და გამარჯვებას ამ ერთსულოვნებითაც მიაღწიეს.

ჩვენ კი სანამ კატას იმ ოთახში ვეძებთ, სადაც კატა არაა. სხვათა შორის, 1937 წელს ხალხს სწორედ ასეთი დაუსაბუთებელი ბრალდებებით სჯიდნენ.

3305
მკითხველის კომენტარები / 0 /
მსგავსი ამბები
რუბრიკის სხვა სიახლეები
;