სოფიო შაფათავა ფრანგული ტურნირის ნახევარფინალში დამარცხდა

ჩოგბურთელ ქალთა საფრანგეთის საერთაშორისო ტურნირს (საპრიზო ფონდი 25 000 დოლარი) დაემშვიდობა თბილისელი სოფიო შაფათავა.

გუშინ წყვილთა ნახევარფინალში იგი ბრიტანელ ემილი სმიტთან ერთად მესამე ნომრად განთესილ რუმინელებს - ჟაკლინ ადინა კრისტიანსა და ელენა გაბრიელა რუსეს დაუპირისპირდა. შეხვედრა საათსა და 31 წუთს გაგრძელდა. პირველი ხელი ქართულ-ბრიტანულმა დუეტმა მოიგო - 6:4.

მეორეში კარპატელები 5:3 დაწინაურდნენ, მაგრამ სოფიომ და ემილიმ ანგარიშის გათანაბრება შეძლეს - 5:5, თუმცა მომდევნო ორი გეიმი დათმეს და სეტი 5:7 წააგეს. მესამეში კარპატელთა უპირატესობა აშკარა იყო - 10:5.

არადა, მატჩში რუმინელებმა 6 ორმაგი შეცდომა დაუშვეს. ამავე დროს 6 ეისიც მიითვალეს, რაც შაფათავამ და სმიტმა მხოლოდ სამჯერ მოახერხეს. მეტოქეებმა 9-9 ბრეიკპოინტიდან 3-3 გამოიყენეს. ქართულ-ბრიტანული დუეტი შეჯიბრებას გამოეთიშა.

ყოველდღიური სპორტული გაზეთი "ლელო"

2019
მკითხველის კომენტარები / 0 /
მსგავსი ამბები
რუბრიკის სხვა სიახლეები