[სპეციალისტის აზრით] გოჩა ჯამარაული: არ უნდა გვეგონოს, რომ ბელარუსთან გამოკვეთილი ფავორიტები ვიქნებით...

კარს მოგვადგა სანაკრებო ბატალიები. სულ მალე ჩვენი ქვეყნის უპირველესი გუნდი ორ შეხვედრას გამართავს - ჯერ სენტ გალენში ითამაშებს შვეიცარიასთან საკვალიფიკაციო მატჩს, მერე კი ამხანაგურ შეხვედრაში მოსინჯავს ძალას მსოფლიოს ვიცე-ჩემპიონ ხორვატიასთან.

"ლელო" საქართველოს ნაკრების ყოფილ ნახევარმცველს, გოჩა ჯამარაულს ესაუბრა, ვინც წლების განმავლობაში გვატკბობდა თავისი შესანიშნავი თამაშით. რა თქმა უნდა, "ჯამარას" ერთა ლიგის მომავალ ნახევარფინალზეც დავეკითხეთ...

- როგორ შეაფასებთ საქართველოს ნაკრების ასპარეზობას ევროპის ჩემპიონატის მიმდინარე შესარჩევ ციკლში?

- ჩემი აზრით, საქართველოს ნაკრების ასპარეზობას ევროპის ჩემპიონატის შესარჩევ ციკლში კვალი დაატყო იმან, რომ ერთა ლიგის ჯგუფი მოვიგეთ და გავედით ნახევარფინალში.

- ერთა ლიგის ნახევარფინალის წინ როგორი მოლოდინი გაქვთ?

- ჩემი აზრით, ბელარუსის ნაკრებთან შეხვედრაში თავი გამოკვეთილ ფავორიტებად არ უნდა ჩავთვალოთ. ანუ, არ  უნდა მოვეშვათ. ასევეა იმ შემთხვევაშიც, თუ ჩვენი ნაკრები მოიპოვებს ფინალის საგზურს და შეხვდება მაკედონიას ან კოსოვოს.

- თქვენს თაობას არასოდეს უთამაშია ბელარუსის ნაკრების წინააღმდეგ, მაგრამ ამ გუნდის შესახებ თქვენი ზოგადი წარმოდგენა მაინც გექნებათ...

- რუსული და უკრაინული სკოლა უნდა ავიღოთ ორიენტირად. ფიზიკურად ძალიან ძლიერი ნაკრებია. აქცენტს სწორედ ამაზე აკეთებენ. მიმაჩნია, რომ ჩემს დროს ბელარუსის ნაკრები უფრო ძლიერი იყო, ვიდრე არის ახლა. მაშინ გაცილებით მეტი ვარსკვლავი ჰყავდათ. მე მხოლოდ სამ ფეხბურთელს გავიხსენებ - გლებს, ბელკევიჩსა და ხაცკევიჩს. სამივე მაგარი ფეხბურთელი იყო. როგორც ვიცი, გლები ახლაც თამაშობს, მაგრამ მისი საუკეთესო წლები წარსულში დარჩა. ბელარუსის დღევანდელი ნაკრების მთავარი ღირსებაა გუნდურობა. ძალიან ბევრიც რომ ვეცადოთ, რთულია, თუნდაც ერთი ვარსკვლავი მოიძიო ამ ნაკრებში. კაცმა რომ თქვას, არც არის ასეთი...

- თქვენ წლების განმავლობაში თამაშობდით შვეიცარიაში. რას იტყვით ჩვენი ნაკრების უახლოეს მეტოქეზე?

- სიმართლეს გეტყვით, პირველად რომ ჩავედი შვეიცარიაში, გაოცებული დავრჩი ამ ულამაზესი, ზღაპრული ქვეყნით. ეს არის მართლაც შვეიცარიული საათივით აწყობილი ქვეყანა. ჩვენ თუ ბელარუსის ნაკრებთან ერთად ვახსენეთ რუსული და უკრაინული სტილი, შვეიცარიის შემთხვევაში უნდა ვახსენოთ გერმანია. შვეიცარიის ნაკრები, როგორც იტყვიან, გერმანულ თარგზეა მოჭრილი და ამ გუნდში შემთხვევით არ სჭარბობენ ბუნდესლიგის მოთამაშეები. შვეიცარიის ნაკრები არის აწყობილი მანქანა, რომელიც ზედმიწევნით ზუსტად ასრულებს მთავარი მწვრთნელის მითითებებს. ზოგადადაც, ძალიან სპორტული ქვეყანაა. ფეხბურთის გარდა, ძალიან დიდ ყურადღებას აქცევენ სხვა სახეობებს, მაგალითად - ჰოკეის.

- ხომ არ გადაკვეთილა სადმე თქვენი და შვეიცარიის ნაკრების მწვრთნელის, ვლადიმირ პეტკოვიჩის გზები?

- არა, თუმცა ყველამ ვიცით, რომ ის მაღალი დონის სპეციალისტია. ჩემ დროს შვეიცარია არ იყო ასეთი ძლიერი გუნდი. ჩვენს ჯგუფში ყველაზე მეტად სწორედ შვეიცარიის ნაკრები მომწონს.

933
მკითხველის კომენტარები / 0 /
მსგავსი ამბები
რუბრიკის სხვა სიახლეები
;