[სპეციალისტის აზრით...] ოთარ გაბელია: მჯერა, დინამო ჰოლანდიაში გაიტანს

ქართველი გულშემატკივარი დიდი იმედით ელის ევროპალიგის მესამე საკვალიფიკაციო ეაპზე თბილისის "დინამოსა" და "საბურთალოს" მატჩებს. შეგახსენებთ, რომ ამ დროისათვის ევროტურნირებს ორი ქართული კლუბი შემორჩა. "დინამო" როტერდამის "ფეიენოორდს" შეხვდება, "საბურთალო" კი სომხურ "არარატ-არმენიასთან" მოსინჯავს ძალას.

გუშინ "ლელო" თბილისის "დინამოს" ცოცხალ ლეგენდას, ოთარ გაბელიას დაუკავშირდა და წინასამატჩო მოლოდინებზე დაეკითხა.

 ჩემი აზრით, "საბურთალომ" მომდევნო ეტაპის საგზური უნდა მოიპოვოს. კარგად არ ვიცნობ "არარატ-არმენიას", მაგრამ ეს ბარიერი უნდა გადავლახოთ. არამც და არამც არ შეიძლება მოდუნება და ისე ფიქრი, რომ ჩემპიონთა ლიგაზე კარგ გუნდებს ვეთამაშეთ და ამ ბარიერს ცალი ფეხით გავივლით. დარწმუნებული ვარ, ასე არავინ იფიქრებს.

რაც შეეხება "ფეიენოორდს". სტადიონზე ვიყავი და ვნახე თბილისის "დინამოს" თამაში "ლოკომოტივთან". მხოლოდ ექვს გოლში არაა საქმე. მომეწონა შეტევით ფაზაში სისწრაფეები და ცალკეული ფეხბურთელების ინდივიდუალური მოქმედებები. სტადიონზე წასვლამდე, ვნახე ჰოლანდიიდ ჩემპიონატში "ფეიენოორდის" თამაში "სპარტასთან". რა თქმა უნდა, მეტოქე ძლიერი გუნდია, მაგრამ ჩემი აზრით, უშანსოდ ნამდვილად არ უნდა ვიყოთ.

გასაგებია, რომ როტერდამელებს კიდევ შეუძლიათ მომატება, მაგრამ ახლა "დინამო" კარგ ფორმაშია და ეს მაიმედებს. როტერდამელებს შედარებით უჭირთ უკანა ხაზში, სისწრაფეები არაა სათანადო. "სპარტასთან" შეხვედრაში გამოჩნდა, რომ მათ არ უყვართ მეტოქის კონტრშეტევები. ამ შეხვედრაში ძალიან ბევრს გადაწყვეტს ის, თუ როგორ გამოიყენებენ ჩვენი შემტევები სისწრაფეს და ინდივიდუალიზმს, რომელიც ნამდვილად აქვთ.

რაც მთავარია, უნდა ვუფრთხილდეთ სტანდარტულ მდგომარეობებს და მეტოქის ფლანგურ შეტევებს. რატომღაც მაგრად მჯერა, რომ ჰოლანდიაში "დინამო" გოლის გატანას მოახერხებს." - გვითხრა გაბელიამ.

3388
მკითხველის კომენტარები / 0 /
მსგავსი ამბები
რუბრიკის სხვა სიახლეები
;