ვლადიმერ გუცაევი: ვაისი რომ შემხვდეს, ამას აუცილებლად ვეტყვი!..

საქართველოს ნაკრები ევროპის ჩემპიონატის შესარჩევ ციკლს შვეიცარიასა და ირლანდიასთან მატჩებით იწყებს. ნათქვამია, კარგი დასაწყისი საქმის ნახევარიაო. ორი აზრი არ არის - ამ მატჩებს უდიდესი მნიშვნელობა აქვს ჩვენი გუნდისთვის.

"ლელო" ესაუბრა ქართული ფეხბურთის ცოცხალ ლეგენდას, ვლადიმერ გუცაევს და მისგან ძალიან საინტერესო მოსაზრებები მოისმინა. ახლა ამ მოსაზრებებს მკითხველსაც გავუზიარებთ:

- თავდაპირველად, ზოგადად გვითხარით თქვენი აზრი შვეიცარიასთან კარსმომდგარი მატჩის თაობაზე...

- საერთოდ, მე ბუნებით ძალიან ოპტიმისტი ვარ. ასე რომ, ჩემი წინასამატჩო განწყობაც ოპტიმისტურია, მით უმეტეს, როცა საქმე ეხება საქართველოს ეროვნულ ნაკრებს. ერთადერთი, რაზეც ვწუხვარ, გიორგი ჩაკვეტაძის არყოფნაა. ამ პატარა ბიჭმა ერთა ლიგაზე დაგვანახა, თუ რამხელა ძალას წარმოადგენს საქართველოს ნაკრებისთვის. ძალიან გთხოვთ, ეს დაწეროთ - რატომღაც, არავინ ამახვილებს ამაზე ყურადღებას. შეიძლება, ვინმეს ეგონოს, რომ ჩაკვეტაძე წერომ მოიყვანა. არადა, ასე ნამდვილად არ არის. გიორგი აღიზარდა თბილისის "დინამოს" აკადემიაში. საქართველოს ნაკრების შემადგენლობას თვალი რომ გადავავლოთ, ათამდე ფეხბურთელია აღზრდილი ამ აკადემიაში. ამისთვის მადლობა ეკუთვნის რომან ფიფიას ჩემი, "ლელოს" და ქართველი გულშემატკივრის სახელით!

ვლადიმერ გუცაევი ნაკრებსა და კლუბებზე: თუ გუნდს ევროთასებზე რაიმე წარმატების მიღწევა უნდა, 20 მილიონი მაინც უნდა ჰქონდეს ბიუჯეტი

- როგორ ფიქრობთ, შესაძლებელია ჩაკვეტაძის მეტ-ნაკლებად უმტკივნეულოდ შეცვლა?

- ჩემი აზრით, ეს არ იქნება იოლი. ერთა ლიგის შეხვედრებში ის გამოჩნდა, როგორც გუნდის ნამდვილი ლიდერი. მაიმედებს ის გარემოება, რომ ვლადიმირ ვაისმა უკვე ძალიან კარგად იცის ნაკრების ყველა ფეხბურთელის პლუსები და მინუსები. არ მინახავს ამ ბოლო დროს ჩვენი გუნდის მწვრთნელი და რომ ვნახო და საშუალება მომეცეს, ამას აუცილებლად ვკითხავ - რატომ არ იძახებს ნაკრებში აკაკი შულაიას? ეს ფეხბურთელი აშკარად გამორჩეულია საქართველოს ჩემპიონატში თავისი თვისებებით. გასათვალისწინებელია ისიც, რომ დღეს ჩვენში თავდამსხმელების დეფიციტია. ჩემი აზრით, სანაკრებო შანსს იმსახურებს კიდევ ერთი დინამოელი - ლევან შენგელია. პირადად მე, კარგა ხანია, ასეთი მემარცხენე ფეხბურთელი არ მინახავს. ვფიქრობ, ისიც გააძლიერებდა ნაკრებს. არ ვამბობ, რომ ეს ფეხბურთელები უდავოდ უნდა იყვნენ ძირითად შემადგენლობაში, მაგრამ შეკრებაზე ან რომელიმე ამხანაგურ მატჩში გასინჯვას კი იმსახურებენ. ჩემი აზრით, ორივეს შეუძლია, რაღაც შემატოს ნაკრებს.

...პირადად მე, კარგა ხანია, ასეთი მემარცხენე ფეხბურთელი არ მინახავს. ვფიქრობ, ისიც გააძლიერებდა ნაკრებს. არ ვამბობ, რომ ეს ფეხბურთელები უდავოდ უნდა იყვნენ ძირითად შემადგენლობაში, მაგრამ შეკრებაზე ან რომელიმე ამხანაგურ მატჩში გასინჯვას კი იმსახურებენ...

- შვეიცარიის ნაკრებისგან რას ელით?

- ბოლო 10 წლის განმავლობაში შვეიცარიული ფეხბურთის პროგრესი თვალსაჩინოა. ეს ეხება არა მხოლოდ ნაკრებს, არამედ, ასაკობრივ გუნდებსაც. შვეიცარია ყოველთვის ძალიან თანაბრად თამაშობს შესარჩევ ციკლში და ეს გასათვალისწინებელია. ორი აზრი არ არის - რთული თამაში გვექნება, მაგრამ საქართველოს ნაკრების ბოლო მატჩები გვაიმედებს, რომ ბრძოლა და გამარჯვება შეგვიძლია.

ნახეთ VIDEO, როგორ გააბითურა ვლადიმერ გუცაევმა ფრენკ ლამპარდი საოცარი ფინტით

- როგორ ფიქრობთ, რამდენად აისახება შვეიცარიის ნაკრებზე შაჩირის არყოფნა?

- რა თქმა უნდა, ის ძლიერი ფეხბურთელია და ნაკრების ლიდერია. მეორე მხრივ, ყველას შეცვლა შეიძლება, თუ საქმე არ ეხება მესის, კრუიფის, მარადონას და ასეთი კლასის ფეხბურთელებს. მიმაჩნია, რომ შვეიცარიის ნაკრების სამწვრთნელო შტაბი შეძლებს შაჩირის შეცვლას, თუნდაც ტაქტიკური სქემის ცვლილების ხარჯზე. კი, ის ძალიან კარგი შემქმნელია, მაგრამ ნუ დაგვავიწყდება, რომ შვეიცარია გასვლაზე თამაშობს და დაცვას მაინც დიდ ყურადღებას მიაქცევს. ასე რომ, არ მგონია, შაჩირის შეცვლა ვერ მოახერხონ.

- საქართველოს ნაკრებში ერთი დებიუტანტია. რას ფიქრობთ ვატო არველაძეზე?

- მინახავს ვატოს თამაშები საქართველოს ეროვნულ ჩემპიონატში და უნდა ვთქვა, რომ კარგი ფეხბურთელია, მომწონს მისი თამაში. პოლონეთის ჩემპიონატშიც შედეგიანად თამაშობს და ესეც მისასალმებელია. მისი ბოლო გოლიც ვნახე... კარგი გოლი გაიტანა. იმედი მაქვს, ისე ითამაშებს საქართველოს ნაკრებში, როგორც ეკადრება არველაძეების დინასტიას.

- და ბოლოს, ირლანდიასთან მატჩზეც გკითხავთ...

- რა თქმა უნდა, ესეც რთული თამაში იქნება, მაგრამ მიმაჩნია, რომ ირლანდიასთან უფრო გაგვიმარტივდება. ეს იმიტომ, რომ შედარებით ერთფეროვანი გუნდია, ბრიტანულ სტილში თამაშობენ. გასვლაზე ვთამაშობთ, მაგრამ მაინც ძალიან იმედიანად ვარ.

ყოველდღიური სპორტული გაზეთი "ლელო"
10243
მკითხველის კომენტარები / 1 /
tbiliseli
0
დაუჯერთ გუცაევს, ბებერი ხარის რქაცა ხნავს!!!
მსგავსი ამბები
რუბრიკის სხვა სიახლეები
;