ვლადიმერ გუცაევი: ნაკრებში ფეხბურთელმა მხოლოდ იმიტომ არ უნდა ითამაშოს, რომ ლეგიონერია!

საქართველოსა და შვეიცარიის ნაკრებთა შეხვედრის შეფასება ვთხოვეთ ვლადიმერ გუცაევს, ქართული ფეხბურთის ლეგენდას და საქართველოს ნაკრების ყოფილ მწვრთნელს. მას ირლანდიასთან კარსმომდგარ მატჩზეც ჩამოვუგდეთ სიტყვა:

 

- შვეიცარიასთან მატჩს რაც შეეხება, სიმართლე გითხრათ, ძალიან მძიმე შთაბეჭდილება დატოვა ჩვენმა გუნდმა. რა თქმა უნდა, შვეიცარია ძალიან აწყობილი და ძლიერი გუნდია, ამაზე არ ვკამათობთ, უბრალოდ, ჩვენი ნაკრებისგან გაცილებით მეტს ველოდი. ისე გვეთამაშა შვეიცარია, როგორც ძლიერი გუნდი ეთამაშება მასზე სუსტს. პირველ ტაიმში კიდევ ვწვალობდით რაღაცას, მეორე ტაიმში საერთოდ ვეღარაფერი გავაკეთეთ...

- დღეს თუ გუნდს არ აქვს სისწრაფე, თუ არ შეუძლია სიჩქარეებზე თამაში, მორჩა, ის გუნდი არ არის. ამას ითხოვს თანამედროვე ფეხბურთის მოცემულობა. ერთა ლიგაზე ჩვენს მეტოქებთან გაგვივიდა ჩვენი კოზირებით თამაში - სადღაც ტექნიკის ხარჯზე, სადღაც ბურთის დაჭერით და ასე შემდეგ. ჩვენ გვჭირდებოდა სწრაფი და კარგ ფორმაში მყოფი მოთამაშეები...

- საქართველოს ნაკრების სამწვრთნელო შტაბზე ცუდს ვერ ვიტყვი. უბრალოდ, როგორც ჩანს, ჯეროვნად ვერ ადევნებენ თვალს საქართველოს ჩემპიონატს. არ მინდა, ვინმეს ეწყინოს, მხოლოდ ჩემს აზრს ვიტყვი - მაგალითად, მიმაჩნია, რომ საქართველოს ჩემპიონატის რამდენიმე ფეხბურთელი არაფრით ჩამოუვარდება, პირობითად, "უფაში" თუ პოლონეთის საშუალო გუნდში მოთამაშე ფეხბურთელს. ნაკრებში მხოლოდ იმიტომ არ უნდა თამაშობდეს ფეხბურთელი, რომ ლეგიონერია, ეს არ უნდა იყოს ერთადერთი კრიტერიუმი.

- გასაგებია, ყველას გვინდოდა, რომ საქართველოს ნაკრებს უფრო შემტევი ფეხბურთი ეთამაშა, მაგრამ მეორე მომენტია, როგორ უნდა გვეთამაშა? ჯანო ვერ იყო სასურველ დონეზე, ვაკო ყაზაიშვილი ძალიან კარგი ფეხბურთელია, მაგრამ შვეიცარიასთან მე ის ვერ ვიცანი. არ ვიცი, რატომ არ დააყენეს ძირითადში საბა კვირკველია და რატომ ამჯობინეს მას ხოჭოლავა. დღემდე ვფიქრობ და ვერ ამიხსნია. კარგი ფეხბურთელობა არ უნდა იყოს საკმარისი ნაკრების ძირითადში სათამაშოდ. მთავარია, კონკრეტულ მომენტში ვინ როგორ ფორმაში იქნება.

- სისწრაფეები ტყუილად არ მიხსენებია. თუ გახსოვთ, შვეიცარიასთან შეხვედრაში იყო მომენტი, როცა კარგ კონტრშეტევაზე წავიდა სამი ჩვენი ფეხბურთელი. დანარჩენები კი საკუთარ საჯარიმოსთან იდგნენ. არ შეეძლოთ ფიზიკურად მეტი და იმიტომ. არადა, როგორ გარბიან კონტრშეტევაზე "სიტი", "ლივერპული" და სხვა გრანდები...

- ირლანდიასთან თამაშის წინ იმედიანად ვარ. მჯერა, სამწვრთნელო შტაბი დასკვნებს გამოიტანს და ძირითადში იმ მოთამაშეებს დააყენებს, რომლებიც მოცემულ მომენტში კარგ ფორმაში არიან. ირლანდიას არ აქვს საუკეთესო ხანა. გუნდს არ აქვს ტექნიკა და ბურთს ვერ იჭერს. ადრე თითქმის სულ გვიგებდნენ, მაგრამ - პრიმიტიული ფეხბურთით. ახლა აღარ ჰყავთ იმ დონის შემსრულებლები...

5884
მკითხველის კომენტარები / 0 /
მსგავსი ამბები
რუბრიკის სხვა სიახლეები
;