რევაზ ძოძუაშვილი: ჩვენი შეცდომაა, მწვრთნელების, ჟურნალისტების... ყველასი, რომ აქამდე არ ვთქვით ამაზე!..

ქართული კლუბების, თბილისის "დინამოსა" და "საბურთალოს" საევროპო ასპარეზობის შეფასება ბოლო ორ შეხვედრაში და მომდევნო ორი მატჩის წინ, ქართული ფეხბურთის ცოცხალ ლეგენდას, რევაზ ძოძუაშვილს ვთხოვეთ:

"მთლიანობაში დადებითად უნდა შეფასდეს ქართული კლუბების ასპარეზობა ევროთასებზე. "საბურთალოს" ევროპალიგის ჯგუფში მოხვედრის შესანიშნავი შანსი აქვს და ამ შანსს გამოყენება სჭირდება.

"არარატთან" შეხვედრაში "საბურთალო" თავიდან დიდ ყურადღებას აქცევდა დაცვას. მეორე ტაიმში ვითარება შეიცვალა. გუნდმა მეტი ყურადღება დაუთმო შეტევას და შედეგიც მიიღო. თუ გადავავლებთ თვალს "საბურთალოს" შეხვედრებს, ვნახავთ, რომ ამ გუნდმა წარმატებას შეტევაში კარგი თამაშით მიაღწია. შეტევა "საბურთალოს" ძლიერი მხარეა...

რაც შეეხება "დინამოს". "გაბალასთან" გუნდმა კარგი თამაში აჩვენა. ახალი ძალა შემოიტანეს გუნდში ახალმა ფეხბურთელებმა, მათ შორის, იმათაც, თბილისურ კლუბს "ტორპედოდან" რომ შეუერთდნენ...

და მაინც, რატომ მოხდა ის, რაც მოხდა ჰოლანდიაში? პირველი ტაიმის შემდეგ მინიმალური ანგარიშით ვაგებდით და მეორე ტაიმი ისე დავიწყეთ, ანგარიში სულ თავისუფლად შეიძლებოდა, 1:1 გამხდარიყო. ვითარება შეიცვალა მას შემდეგ, რაც კაცი გაგვიგდეს...

კონკრეტულად ხელს არავისკენ ვიშვერ, მაგრამ ეს გამოიწვია იმან, რაც საქართველოს ჩემპიონატში ხდება. აქ ყველა ყველას ახლობელი და მეგობარია - მწვრთნელები, მსაჯები, ფეხბურთელები... არასპორტულ საქციელზე, ასე ვთქვათ, საფეხბურთო ხულიგნობაზე, რეაქცია უნდა იყოს გაცილებით მკაცრი! აგერ, განახლდა სეზონი და ყველამ მხედველობაში უნდა მიიღოს ეს!..

ჩვენი შეცდომაა, მწვრთნელების, ჟურნალისტების, ყველასი, რომ აქამდე არ ვთქვით ამაზე. მე ყველა ლიგის თამაშს ვესწრები და ვიცი, რასაც ვამბობ. ამაზე თითქმის არავინ ამახვილებს ყურადღებას. არადა, როტერდამში სწორედ ეს დაგვაკლდა, ეს აღმოჩნდა გადამწყვეტი ფაქტორი", - გვითხრა ძოძუაშვილმა.

5712
მკითხველის კომენტარები / 0 /
მსგავსი ამბები
რუბრიკის სხვა სიახლეები
;