სპრინტები და კილომეტრები - ინტერვიუ საბა ლობჟანიძესთან

ბოლო ორი ტურია, საბა ლობჟანიძე დანიაში დიდ პატივშია. მე-16 ტურში "რანდერსმა" გასვლაზე "ლუნგბიუ" 3:1 რომ დაამარცხა, საბამ გოლიც გაიტანა, საგოლე გადაცემაც მიითვალა და ტურის სიმბოლურ ნაკრებშიც დაასახელეს.

23 წლის ქართველი სუპერლიგის მე-17 ტურშიც გამოარჩიეს, მიუხედავად იმისა, რომ "რანდერსმა" "სონდერიისკესთან" საშინაო შეხვედრა 0:2 დათმო. საქართველოს ნაკრების ფეხბურთელმა შეუცვლელადაც ითამაშა და მატჩის საუკეთესო ფეხბურთელისთვის დაწესებული საგანგებო პრიზიც მიიღო.

"ლელო" საბა ლობჟანიძეს დაუკავშირდა და საკმაოდ ვრცელი ინტერვიუ ჩაწერა. "რანდერსის" ქართველი შემტევი კლუბზე, ნაკრებზე, დიდ ფიზიკურ დატვირთვებსა და სხვა საინტერესო თემებზე ლაპარაკობს...

თავიდან იყო სირთულეები...
- დანიის სუპერლიგაში თავიდან მორიდებულად თამაშობდით, ბოლო ორ ტურში კი აშკარად გაიხსენით. შეგიძლიათ, თქვათ, რომ ახალ ლიგას შეეგუეთ?
- ალბათ, უფრო სწორი იქნება ვთქვა, რომ ნელ-ნელა ვეგუები. აქ არის ათასგვარი პრობლემა და დაბრკოლება, რაც საქართველოდან წამოსულ მოთამაშეს ხელს უშლის. დანიური ფეხბურთი ჩვენს ჩემპიონატზე მაღლა დგას და ცხადია, ესაა ყველაზე მთავარი სირთულე - უფრო დიდი მოთხოვნების დაკმაყოფილება თავიდანვე იოლი არ არის, მაგრამ არც შეუძლებელია და ამაში დავრწმუნდი.

- პირადად რა სირთულე დაძლიეთ?
- ის, რომ პირველად ვარ უცხოეთში და ადაპტაცია დამჭირდა. ყველაფერი ისე არ გამომდიოდა, როგორც მსურდა. ჯერ ერთი ფიზიკურად ორივე ტაიმის თამაში გამიჭირდა და მეორე ნახევარში ვიღლებოდი.

- ყველაზე მეტს რამდენ ხანს ძლებდით?
- მაქსიმუმ 65-70 წუთი.

- ახლა თავს როგორ გრძნობთ?
- ახლა ბევრად უკეთ ვარ და ნელ-ნელა ვეჩვევი - ჩამოსვლის პერიოდთან შედარებაც არ შემიძლია და ამიტომაა, უკვე 90 წუთსაც მათამაშებენ.

- ეტყობა, ასეც არის: ბოლო ტურში "სონდერიისკესთან" მატჩის კადრები გავრცელდა, სადაც 94-ე წუთზე ლამის 70-მეტრიანი დრიბლინგი გააკეთეთ. დაღლილი მოთამაშე ასეთ დროს ამას ვერ შეძლებდა...
- მიხარია, რომ ამ მოთხოვნებს ნელ-ნელა ვეგუები. ვგრძნობ, რომ დღეს უკეთესად ვარ, ვიდრე ჩამოსვლისას და ეს სამომავლოდ კარიერის უკეთეს დონეზე აწყობაში დამეხმარება.

მართალია, დანიის ჩემპიონატი ტოპ-დონის არაა და არც ფეხბურთელებია მათი დონის, იგივე ტაქტიკურად. მაგრამ ისეთივე დატვირთვები და სისწრაფეებია, როგორიც, მაგალითად, იტალიაში, არ ჩერდებიან და გამუდმებით მოძრაობენ, რადგან აქ ფიზიკურად ძალიან კარგად მომზადებული მოთამაშეები ჰყავთ. წარმოუდგენელია, რომ თავისუფლად ითამაშო, სულ ხელს გიშლიან და ფეხზე "გაზიან". ერთ-ერთი მიზეზი ესეც იყო, თავიდან რომ გამიჭირდა.

მთავარია, ვითამაშე და იმედი გამიჩნდა, რომ სამომავლოდ ვაისი ისევ მიმიწვევს. კი, მეც მინდოდა, რომ ორივე შეხვედრა ჩამეტარებინა, მაგრამ ნაკრების ფორმით მოედანზე ერთი წუთით გასვლაც ბედნიერება და სტიმულია

სანაკრებო სტიმული
- მწვრთნელი რომ გენდობათ, ეს იქიდანაც ჩანს, რომ სასტარტო შემადგენლობაში გაყენებთ. თანაგუნდელებისგანაც გრძნობთ ნდობას?
- საბედნიეროდ, ასეა და ეს უფრო მეტად მიხარია. სხვათა შორის, ეს 2 შეხვედრა კარგად სანაკრებო მატჩებიდან დაბრუნებულმა ჩავატარე და მწვრთნელმა უცებ შენიშნა, მიხარია, თავდაჯერებული ჩამოხვედიო.

- რეალურად, ნაკრებში ბევრი არც გითამაშიათ...
- მთავარია, ვითამაშე და იმედი გამიჩნდა, რომ სამომავლოდ ვაისი ისევ მიმიწვევს. კი, მეც მინდოდა, რომ ორივე შეხვედრა ჩამეტარებინა, მაგრამ ნაკრების ფორმით მოედანზე ერთი წუთით გასვლაც ბედნიერება და სტიმულია.

ევროპული მაჩვენებლები
- კლუბის ვებგვერდზე ეწერა, რომ "სონდერიისკესთან" შეხვედრაში თქვენი საუკეთესოდ დასახელება იმან განაპირობა, რომ მოედანზე დიდი სამუშაო გასწიეთ. დანიაში უფრო გექნებათ საშუალება, თვალი მიადევნოთ, რამდენი კილომეტრი ირბინეთ და რამდენი სპრინტი განახორციელეთ. ალბათ, ეს იგულისხმებოდა...
- დიახ, ასეა. ეს მონაცემები შეხვედრის შემდეგ გვაჩვენეს და გამიხარდა, რომ საუკეთესო მაჩვენებელი საქართველოს ჩემპიონატიდან დანიაში ზაფხულში გადასულ ქართველს მქონდა.

- და რამდენი კილომეტრი ირბინეთ?
- 11,5 კილომეტრი. ამდენს საქართველოშიც დავრბოდი. მთავარი მაინც სხვა რამაა - თურმე, 25 კილომეტრზე მაღალი სისწრაფით 78 სპრინტი გამიკეთებია, ხოლო მაღალი ინტენსიობით 1,2 კილომეტრი მირბენია.

- ეს ძალიან მაღალი მაჩვენებლებია და ინგლისის პრემიერლიგაშიც კი კარგ მონაცემებად ჩაითვლებოდა...
- სხვათა შორის, ზუსტად ასე მითხრა "რანდერსის" ფიზმომზადების მწვრთნელმა. გამიხარდა, მაგრამ იმასაც ვხვდები, რომ ეს ჩემი ზღვარი არაა, მეტი შემიძლია.

დანიის ქართული დაპირისპირება
- ევროპელები ჩვენ სხვა ბევრი კუთხითაც გვისწრებენ და ერთ-ერთია სამედიცინო მომსახურება, აღდგენები...
- ამ მხრივ, დანიელებს პრობლემები არ აქვთ, ყველაფერი უმაღლეს დონეზეა. თამაშის შემდეგ არანაირი პრობლემა არაა ყინულებიანი წყალი, ორთქლის აბანო, პლუს პროტეინები და ვიტამინები. ამიტომაა, დანიაში ფეხბურთელებს რომ ზრდიან.

- შემდეგ ტურში "რანდერსი"-"სილკებორგის" თამაშია, რომელიც ქართველ გულშემატკივარში დიდ ინტერესს იწვევს...
- (იცინის) დანიის ქართული დერბია და დიდი მოლოდინი მაქვს მეც და "სილკებორგის" ბიჭებსაც. თუმცა, მათე ვაწაძე და დათო სხირტლაძე ჩემთვის არა მოწინააღმედეგეები, არამედ, მეგობრები არიან და მათ ყოველთვის წარმატებას ვუსურვებ. მათი წინსვლა, გოლები და აღიარება დანიაში მოთამაშე ყველა ქართველზე დადებითად იმოქმედებს.

ოთარ კიტეიშვილზეც ვიტყვი: გადამწყვეტი პენალტი ბევრ დიდ ვარსკვლავს გაუფუჭებია. მაგალითად, ბაჯოს და რონალდოს, თუმცა მათ კლასსა და საჭიროებაში ეჭვი არავის შეუტანია

ოთარი უმაგრესი ბიჭია!
- თბილისის "დინამოსა" და ქუთაისის "ტორპედოს" ბოლო მატჩს თუ უყურეთ?
- რა თქმა უნდა! "დინამოდან" რომ წავედი, იმას კი არ ნიშნავს, რომ ამ გუნდის ბედი აღარ მაღელვებს?! ძალიან ნერვული, დაძაბული და საკმაოდ უცნაური თამაში იყო.

- რას ფიქრობთ, "ტორპედომ" რის ხარჯზე გაიმარჯვა?
- საკამათოც არ არის, რომ გამოცდილების ხარჯზე. "დინამოში" 16-18 წლის ბიჭები იყვნენ და მათ წარმატებებს ვუსურვებ.

აქვე ოთარ კიტეიშვილზეც ვიტყვი: გადამწყვეტი პენალტი ბევრ დიდ ვარსკვლავს გაუფუჭებია. მაგალითად, ბაჯოს და რონალდოს, თუმცა მათ კლასსა და საჭიროებაში ეჭვი არავის შეუტანია. "კიტე" უნიჭიერესი ბიჭი და უმაგრესი ადამიანია. წინ დიდი წარმატებები ელის. მინდა ოთარი გავამხნევო, მას ახლა ეს ძალიან სჭირდება.

(იბეჭდება მცირე ცვლილებით)
ყოველდღიური სპორტული გაზეთი "ლელო"
700
მკითხველის კომენტარები / 0 /
მსგავსი ამბები
რუბრიკის სხვა სიახლეები