სრულიად ახალი საფეხბურთო რელიგია "ჩოლიზმი" და მისი მთავარი ქურუმი დიეგო სიმეონე...

სიდ ლოუ ერთ-ერთი საუკეთესო ჟურნალისტია, ვინც კი ესპანურ ფეხბურთზე წერს. ერთხელ მან დიეგო სიმეონეს პიროვნებას შესანიშნავი ახსნა მოუძებნა, არგენტინელს მიანდო ადამიანის სულიდან ბოროტის განდევნის მისია.

ლოუ ამტკიცებს, რომ სწორედ "ჩოლოს" (სიმეონეს მეტსახელი) ფსიქოლოგიური მეთოდებია გუნდის წარმატების მთავარი წინა პირობა.

ის კი არა, ჟურნალისტი მიიჩნევს, რომ არსებობს სრულიად ახალი საფეხბურთო რელიგია "ჩოლიზმი" და მისი მთავარი ქურუმი დიეგო სიმეონეა...

რას აკეთებს ასეთს "ჩოლო"? ის ყველა ფეხბურთელს სათითაოდ ელაპარაკება და არწმუნებს, რომ ყველაზე უკეთესია და თუ მოინდომებს, ნებისმიერი შედეგის მიღწევა შეუძლია.

დიეგო სიმეონე არასოდეს აგებს "ოცნების კოშკებს" და არასოდეს ახსენებს შემდეგ თამაშს. ის კონცენტრირებულია მხოლოდ და მხოლოდ იმ მატჩზე, რომელიც კარსაა მომდგარი.

თავის დროზე, დანიელი ფეხბურთელი ჰენრიკ ლარსენი სიმეონესთან ერთად თამაშობდა. ის ამბობს, რომ ყოველთვის დარწმუნებული იყო ერთ რამეში - სიმეონე მსოფლიოში ერთ-ერთი საუკეთესო მწვრთნელი გახდებოდა.

"მე მას ვუყურებდი თამაშების დროს და ზუსტად ვიცოდი, რომ ის დიდი მწვრთნელი გახდებოდა. მე მას ვუყურებდი თვალებში და ჩემთვის ეს საკმარისი იყო ყველანაირი დასკვნის გამოსატანად.

ის საშინლად ვერ იტანდა წაგებას. მარცხი არავის უყვარს და არც ჩვენ გვიყვარდა, მაგრამ ის, პირდაპირი მნიშვნელობით, გიჟდებოდა, როცა აგებდა", - ამბობს ლარსენი.

სურათი ხომ არ გეცნოთ? ვინ იცის, რამდენი გიჟური თამაში შემოუტრიალებია სიმეონეს "ატლეტიკოს" მთავარი მწვრთნელის პოსტზე მხოლოდ და მხოლოდ პირადი მაგალითით.

მადრიდული პუბლიკა ძალიან კარგად ხვდება, როდის უჭირს "ატლეტიკოს". როცა ასეთი დრო დგება, "ჩოლო" დირიჟორივით აიქნევს ხელს და მერე იწყება არდავიწყება.

თითქოს, "ჩოლოს" ტყუილად როდი აცვია შავი ფერის ტანსაცმელი ყველა თამაშზე. თითქოს, ის ყველა ნეგატივს იზიდავს, რომელიც გუნდისკენაა მიმართული. სიმეონეს ავტორიტეტი ფეხბურთელების თვალში განუზომელია.

"ყველას აინტერესებს, რატომ ვუყვარვარ ფეხბურთელებს. ვიტყვი პირდაპირ, რომ აქ არანაირი განსაკუთრებული საიდუმლო არ არსებობს. ადამიანი ყოველთვის იღებს იმას, რასაც გასცემს. არ შევცდები, თუ ვიტყვი, რომ მეც ძალიან მიყვარს ჩემი ფეხბურთელები.

მათთვის მზად ვარ, მოვკვდე კიდეც. როგორც ჩანს, ისინი ამას იღებენ და აფასებენ. მეტი აქ არაფერი არ უნდა იყოს", - მიიჩნევს თავად "ჩოლო".

მწვრთნელსა და "ატლეტიკოს" გულშემატკივრებს შორის იდეალური დამოკიდებულებაა. სიმეონემ ძალიან დიდი როლი ითამაშა იმაში, რომ "ატლეტიკოს" ერთ-ერთ ლიდერს, ანტუან გრიზმანს, არ უსტვენენ.

გრიზმანი ვერ ატარებს ისეთ სეზონს, რომელსაც მისგან ელოდნენ. ამის ერთ-ერთი მიზეზი, შეიძლება, "მანჩესტერ იუნაიტედში" მისი ჩაშლილი ტრანსფერიც იყოს.

რა თქმა უნდა, "ატლეტიკოს" ქომაგები ძალიან მომთხოვნები არიან და ისინი თუნდაც პირად საუბრებში არაფერს მალავენ, მაგრამ სტადიონის ტრუბუნებიდან სტვენა მაინც არ ისმის. რა თქმა უნდა, სიმეონეს მათთვის პირდაპირ არ მიუმართავს ამის თაობაზე, მაგრამ მან ასეთი რამ თქვა გრიზმანზე:

"ყველას აქვს ცხოვრებაში კარგი და ცუდი პერიოდი. ამის გარეშე ფეხბურთელი, უბრალოდ, არ არსებობს და ეს ყველამ უნდა ვიცოდეთ. მგონი, ურიგო ფეხბურთელი არ ვიყავი და ყოფილა თამაშები, როცა საკუთარი თავი მეზიზღებოდა იმის გამო, რასაც მინდორზე ვაკეთებდი.

ჩვენ გრიზმანისგან ვითხოვთ სასწაულებს და გვავიწყდება, რომ ყველა ადამიანს აქვს ჩავარდნა. განა, შეიძლება, თუნდაც უმაღლესი კლასის მზარეულს მუდამ ერთნაირად გემრიელი საჭმელი გამოუვიდეს? ეს ხომ ანომალია იქნებოდა".

ბევრი მიიჩნევს, რომ გრიზმანი სწორედაც რომ სიმეონესადმი დიდი პატივისცემის გამო დარჩა "ატლეტიკოში". არადა, მას "მანჩესტერ იუნაიტედი" გამზადებულ, დიდებულ კონტრაქტს სთავაზობდა...

მოკლედ, სახეზეა ახალი საფეხბურთო რელიგია "ჩოლიზმი". ვისაც სჯერა, უნდა გავატაროთ...

ყოველდღიური სპორტული გაზეთი "ლელო"
957
მკითხველის კომენტარები / 0 /
მსგავსი ამბები
რუბრიკის სხვა სიახლეები
;