[სრული ანალიზი] ქართველთა ტრიუმფი მაროკოში, - გუნდური: ისევ რუსები და ჩვენი ბრინჯაო

საქართველოს ძიუდოისტთა ახალგაზრდულმა ნაკრებმა 5 მედლით დაასრულა გამოსვლა მაროკოულ მარაკეშში, თანატოლთა მსოფლიოს ჩემპიონატში: 3 ოქრო და თითო ვერცხლ-ბრინჯაო.

ამათგან 1 ოქრო გოგონების ნაკრებზე მოდის - ქართული ძიუდოს ისტორიაში, მსოფლიოს პირველი ჩემპიონი ეთერ ლიპარტელიანი (57) გახდა, ხოლო ბიჭებში ოქროს მედლებს ვლადიმერ ახალკაცი (81) და ლაშა ბექაური (90) დაეუფლნენ.

მსოფლიოს ვიცე-ჩემპიონი ილია სულამანიძე (100) გახდა, ხოლო ტატო გრიგალაშვილი (81) მესამეზე გავიდა. ჩვენი გუნდიდან ბრინჯაოს მოპოვება მარიამ ჭანტურიასაც (70) შეეძლო, ვინც დამამშვიდებლის ფინალში გავიდა, მაგრამ დამარცხდა და მეხუთეზე დარჩა. ამ წარმატებას გუნდურ ტურნირში მოპოვებული ბრინჯაოც დაემატა, პირადი პირველობის საერთო გუნდურ ჩათვლაში კი მეორეზე ვართ იაპონიის შემდეგ, ხოლო ბიჭებში ჩვენ და იაპონიას ზუსტად თანაბარი ოდენობისა და სინჯის მედლები გვაქვს. თუმცა იაპონელებმა იმით გაგვისწრეს, რომ, ჩვენგან განსხვავებით, მეხუთე ადგილზე გასული სპორტსმენი ჰყავთ. ესეც იაპონელებმა ბოლო დღეს, ბოლო წონაში მოპოვებული ოქროთი გაგვისწრეს.

ბედის ირონიით, ჩვენს მძიმეწონოსან გელა ზაალიშვილს რომ დაემარცხებინა მათი მომავალი ჩემპიონი სოსუკე მაცუმურა, მერე თუნდ სულაც უმედლოდ დარჩენილიყო; ანაც სულამანიძეს ემარჯვა ფინალში იაპონელ მეტოქესთან, ბიჭებში იაპონიასაც გავუსწრებდით... 

ჩვენი მედალოსნებიდან ლიპარტელიანმა და ბექაურმა ახალგაზრდული დუბლიც შეასრულეს - წლეულს ევროპის ჩემპიონებიც გახდნენ; ევროპის ჩემპიონატის მსგავსად, 81 კილოგრამში ახლაც ორივე ქართველი ავიდა კვარცხლბეკზე, ოღონდ მაშინ თუ ოქრო-ვერცხლი გვქონდა, ახლა - ოქრო და ბრინჯაო დავინარჩუნეთ. თან, როლებიც შეიცვალა: ევროპის ჩემპიონი გრიგალაშვილი გახდა, ვინც ფინალში ახალკაცს მოუგო. ამჯერად ისინი ერთმანეთს არ შეხვედრიან, მაგრამ ახალკაცმა შედეგით აჯობა და პირადი შეხვედრაც მოუგო გრიგალაშვილის მომგებ რუს სპორტსმენს. 

ლიპარტელიანის ტრიუმფის შესახებ ჩვენ უკვე გაცნობეთ, ბიჭებმა კი ოქროს მედლები პარასკევს მოიპოვეს, როცა მართლაც ფეხბედნიერი დღე გვქონდა მსოფლიოს ჩემპიონატზე - ასეთი რანგის ტურნირზე ოქროს დუბლი ჩინებული ამბავია. არადა, 81 კილოგრამში ქართულ ფინალამდე სულ ცოტა დაგვაკლდა, რაც უპრეცედენტო ამბავი იქნებოდა: სეზონის ორივე უმთავრეს შეჯიბრებაზე, ერთ წონაში ქართული ფინალი - უკეთესს ბევრს ვერ ინატრებ! 
ახალკაცმა ჩემპიონატში ერთოს გარდა, ყველა შეხვედრა წმინდად მოიგო და მხოლოდ იმ ერთში იმარჯვა გაფრთხილებებით, სხვებში კი ბლომად გდებები აკეთა. მან პირველ წრეში მოლდოველი კატალინ მარიანი დააიპონა - ორჯერ წამოიკიდა კისრულზე, ასევე ორი ვაზარით დაამარცხა ყაზახი აიბოლ ნისანალი და კანადელი ალექსანდრე არენსიბია, ვინც ასევე ორჯერ წამოიღო კისრულზე. 

ამას მოჰყვა ის ერთადერთი გაფრთხილებებით მოგებული შეხვედრა მეოთხედფინალში აზერბაიჯანელ მურად ფატიევთან, როცა ახალკაცმა გვარიანად გვანერვიულა და იმის თქმაც შეიძლება, რომ წაგების საშიშროების წინაშეც იდგა. ფატიევმა შეხვედრის დასაწყისშივე ტრავმა მიიღო და მთელი შეხვედრა თავგადაბინტულმა ჩაატარა - სახეც კი ძლივს უჩანდა, მაგრამ ახალკაცმა ვერც გდება გაუკეთა და თანაც ძალიან დაიღალა. ეს შეხვედრა ლამის 7 წუთამდე გაიჭიმა და ძირითადი დროის მეორე ნახევრიდან მოყოლებული, ახალკაცს მსაჯი ხშირად მოუწოდებდა, ამდგარიყო და ეჭიდავა. სამართლიანობისთვის უნდა ითქვას, რომ ამგვარ მითითებებს ფატიევსაც აძლევდა, მაგრამ ჩვენებური ჯანმრთელად იყო და მისგან ამიტომ უფრო გვიკვირდა. ორივეს ორ-ორი გაფრთხილება ჰქონდა და, საბედნიეროდ, მსაჯმა აზერბაიჯანელი მოხსნა. 

კიდევ კარგი, ამ ჩავარდნას ახალკაცის შემდგომ გამოსვლაზე არ უმოქმედია და ნახევარფინალში ძველებურად შეუჩერებელი წარსდგა მეტოქსი წინაშე - ბრაზილიელ გილერმო შმიდტს მოხდენილად ამოჰკრა ფეხი და მოწყვეტით დაახეთქა ტატამს. ფინალში მორიგი ბრწყინვალე და თანაც საჩემპიონო გამარჯვება რუს დავიდ კარაპეტიანთან მოიპოვა, როცა ჯერ გარეფეხით ვარდნაში ვაზარზე გადაიტანა, მერე კი მოგვერდით იპონზე პირდაპირ დააწყვიტა ტატამს. 

გრიგალაშვილმა ჯგუფური ეტაპი ძალიან ძლიერად ჩაატარა, თუმცა ყველაზე ხმაურიანი გამარჯვება პირველივე შეხვედრაში მიითვალა, როცა იაპონელი დაისუკე ტაკაიჩი შიგნიდან ჩახვეული ფეხით პირდაპირ ბეჭებზე გადააგდო უკან. შემდეგ საფრანგეთის სახელით მოჭიდავე გიგა აბუაშვილიც წმინდად დაამარცხა, მერე კი 59 წამში მორიგი იპონი მიითვალა უზბეკ ჯალოდინ კურბონმუროდოვთან. სამწუხაროდ, ამ დამაჯერებელ გამარჯვებას მოჰყვა მარცხი ნახევარფინალში ზემოხსენებულ კარაპეტიანთან. თავისი ძალა გრიგალაშვილმა კიდევ ერთხელ გვაჩვენა ბრინჯაოსთვის შეხვედრაში ფატიევთან, ვინც ჩახტომითი კისრულით ესთეტიკურად დააიპონა. 

ბექაურმა დუბლის შესასრულებლად ჯერ მასზე უფრო ტანმაღალი უზბეკი მუზაფარბეკ ტურობოევი შეხვედრის დაწყებიდან 15 წამში მოგვერდზე ზვარაკივით წამოიკიდა და ვაზარზე დააგდო, დასრულებამდე ნახევარი წუთით ადრე კი ფეხი კარგად ჩაუდგა, მიაწვა და მორიგ ვაზარზე გადააგდო. მას არგენტინელი მარიაო გოტო ბერსიერიც ზედ მიაყოლა, როცა ვარდნაში იპონზე გადაიყოლა, მეოთხედფინალში კი კორეელ ჯუიეოპ ჰანს კარგა ხანს უმზადა ილეთი და შედეგიანადაც - ისიც ვარდნაში გადააგორა, ოღონდ პირდაპირ იპონზე. ბექაურმა ნახევარფინალში იაპონელ კოსუკე მაშიამას კიდევ უფრო დიდი უპირატესობით მოუგო - ჯერ ზედა ჩავლებიდან ვარდნაში გამოცერა ვაზარზე, შეხვედრის ბოლოს კი ისევ ზედა ჩავლებიდან უკან გამოცერა. ბექაურმა ფინალიც იპონით მოიგო უნგრელ ევროპის მესამე პრიზიორ როლანდ გოზთან - იაპონელივით ისიც გარეფეხით „გადატეხა“.

სულამანიძეც ძალიან ახლოს იყო ოქროს მედალთან, მაგრამ წამიერი მოდუნება ძვირად დაუჯდა... ისე კი მან პირველივე წრეში მოიპოვა საყურადღებო გამარჯვება, როცა კორეელი ჯაევოო სიმი დაამარცხა წმინდად. საერთოდაც, ის ფინალში იპონებით გავიდა - ამგვარად მოუგო უნგრელ პეტერ არვალს, დანიელ მატიას მადსენს (ამას დამატებით ვაზარიც აართვა) და ნახევარფინალში რუს მატვეი კანიკოვსკის. 

ფინალში სულამანიძის მეტოქე იაპონელი კაზუნარი კამიგაკი იყო, ვისთანაც წმინდად დამარცხდა. არადა, ვაზარი ამოუქაჩა და მოგებაც თავისუფლად შეეძლო, მაგრამ იაპონელმა წამიერი უყურადღებობა არ აპატია. ფინალურ შეხვედრაში მთავარი მოვლენები ბოლო წუთზე განვითარდა. ჯერ იყო და, დასრულებამდე 47 წამით ადრე იაპონელმა სავაზარედ ამოუსვა სულამანიძეს, თუმცა არც ქართველი გატყდა და ზუსტად 37 წამში ჩახტომით კისრულზე წამოიღო კამიგაკი. დამატებით დროშიც თანაბარი ბრძოლა იყო, მაგრამ ერთ მომენტში სულამანიძემ კონცენტრაცია დაკარგა, რითაც კარგად ისარგებლა მეტოქემ და გარეფეხით მორიგი ვაზარი მიითვალა. აქვე შეგახსენებთ, რომ ტყიბულელი სულამანიძე ევროპის წლევანდელი ჩემპიონია. 

ჭანტურიამ ჯგუფში უზბეკ შოკისტა ნაზაროვას, ვენესუელელ ელიანა აგიარს და მაროკოელ ოულაია ხაირის წმინდად მოუგო, მერე კი ჯერ ნახევარფინალში დამარცხდა იაპონელთა მომავალ ჩემპიონ მამი ასაჰისთან, შემდეგ კი ბრინჯაოსთვის პაექრობაც ვაზარიც დათმო ფრანგ მორგანე ფერესთან. 

ძალზე დასანანია, რომ უმედლოდ დარჩა ჩვენი გუნდის ერთ-ერთი ლიდერი, ევროპის კიდევ ერთი წლევანდელი ჩემპიონი გელა ზაალიშვილი (+100), თუმცა მას წილისყრამაც არ გაუმართლა - პირველივე შეხვედრაში სავარაუდო მეტოქედ იაპონელი სოსუკე მაცუმურა ჰყავდა. სამწუხაროდ, სასწაული არ მოხდა - მაცუმურამ მოიგო პირველი წრის შეხვედრა და მერე სულაც ჩემპიონიც გახდა, გმირობა კი ვერც ზაალიშვილმა ჩაიდინა, ვერ დაამარცხა იაპონელი - იპონით წააგო და საერთოდ გამოვარდა. 

ანალოგიურად დაემშვიდობნენ ჩემპიონატს საბა ინანეიშვილი (+100) და სალომე მაყიშვილიც (+78). ინანეიშვილმა პირველ წრეში ჩინელი ჰაონან ჰუ კი დააიპონა, მაგრამ მერვედფინალში წააგო უნგრელ რიხარდ სიპოჟთან. მაყიშვილი პირველივე შეხვედრაში დამარცხდა ჰოლანდიელთა მომავალ მესამე პრიზიორ მარიტ კამპსთან.

გუნდურში - ისევ მესამე 
მარაკეშში გუშინ შერეული გუნდური ტურნირი გაიმართა. ევროპის ჩემპიონატის მსგავსად, ჩვენები კვლავაც რუსებთან დამარცხდნენ და ისევ ბრინჯაოს დასჯერდნენ.

თუმცა ეს ტურნირი სხვა ასპექტებითაც ჰგავდა იმას: გოგოებმა ახლაც გამოიჩინეს თავი და იქნებ ბიჭებზე მეტადაც იყოჩაღეს; ვინც პირადი პირველობა ჩააგდო, გუნდურში იყოჩაღა და პირიქით... 73 კილოგრამი ამჯერადაც ჩავაგდეთ და იქნებ აჯობებდა, აქ საგანგებოდ წაგვეყვანა ვინმე გუნდურისთვის; 90-ში ისევ არ ლაშა ბექაურმა ამჯერადაც წააგო რუს მანსურ ლორსანოვთან... გუნდურში მართლაც იყოჩაღეს ზაალიშვილმა, ლიპარტელიანმა და ჭანტურიამ.

ჩვენები ქვეჯგუფში თავიდან მასპინძელ მაროკოს შეხვდნენ და 4:1 მოუგეს. მეოთხედფინალში მათ ბრაზილია ელოდათ, ვისაც იმავე ანგარიშით სძლიეს, ნახევარფინალში კი რუსებთან 3:4 დათმეს. აქ დამატებითი შეხვედრა გახდა საჭირო, წილისყრამ კი 90 კილოგრამი აირჩია და ლაშა ბექაური მეორედ დამარცხდა ლორსანოვთან, ბრინჯაოსთვის შეხვედრაში კი ჩვენმა გუნდმა გერმანიას ისევ „მშობლიური“ ანგარიშით - 4:1 სძლია.

ყოველდღიური სპორტული გაზეთი "ლელო"
780
მკითხველის კომენტარები / 0 /
მსგავსი ამბები
რუბრიკის სხვა სიახლეები
;