სტადიონების განახლება დაიწყო - რუსთავში შეფერხებაა

მოედნების განახლების ინფრასტრუქტურული პროგრამის განხორციელება რამდენიმე ქალაქში დაიწყო.

საქართველოს ფეხბურთის ფედერაციის ინიციატივითა და ფინანსური მხარდაჭერით, 6 სტადიონზე უნდა დაიგოს მინდვრის საფარი და დამონტაჟდეს სარწყავი სისტემა - ფოთში, ქობულეთში, სამტრედიაში, წყალტუბოში, საჩხერის რაიონის სოფელ ივანწმინდასა (სადაც "ჩიხურა" თამაშობს) და ბოლნისში...

საფარის გარდა, ამ სტადიონებზე მუნიციპალიტეტები სარეკონსტრუქციო სამუშაოებსაც აწარმოებენ. მაგალითად, სამტრედიის ეროსი მანჯგალაძის სახელობის სტადიონზე ხელოვნური საფარი აიღეს და მალე მოედნის დაგებას დაიწყებენ.

ამას გარდა, იგეგმება ახალი ტრიბუნების მოწყობა და ახალი ადმინისტრაციული შენობის მშენებლობა, რომლის შედეგადაც სტადიონი 4 000 მაყურებელს დაიტევს.

სამტრედიელთა მიზანია, "ეროსი მანჯგალაძემ" უეფას ეგიდით გასამართავი მატჩების მასპინძლობის უფლება მიიღოს. ეს კი სამუშაოების შესრულების ხარისხზე იქნება დამოკიდებული.

სამუშაოები ბოლნისში, თამაზ სტეფანიას სახელობის სტადიონზეც მიმდინარეობს. "სიონის" ცნობით, მოედნის საფარი ფეხბურთის ფედერაციის დაფინანსებით შეიცვლება, ხოლო ინფრასტრუქტურას ბოლნისის მუნიციპალიტეტი განაახლებს.

თუკი ტრიბუნები, გასახდელები და მედიაცენტრი მოწესრიგდება, გარკვეული დონის საერთაშორისო შეხვედრის ჩატარება ბოლნისშიც იქნება შესაძლებელი.

სტადიონზე მიმდინარე სამუშაოების გამო, "სამტრედია" და "სიონი" საშინაო მატჩებს თბილისში, მიხეილ მესხის სახელობის სტადიონის სათადარიგო მოედანზე გამართავენ.

სამუშაოები ფოთის "ფაზისის" სტადიონზეც გრძელდება. როგორც გვითხრეს, ფოთში "კოლხეთი", სავარაუდოდ, ჩემპიონატის პირველი ნახევრის შემდეგ დაბრუნდება.

პროექტის მიხედვით, 6 500 მაყურებელზე გათვლილი სტადიონი უნდა აშენდეს. მაგრამ პირველ ეტაპზე მხოლოდ დასავლეთ ტრიბუნას წამოჭიმავენ, რომელიც 2 ათას მაყურებელს დაიტევს. ტრიბუნების ქვევით კეთდება გასახდელები, საშხაპეები, მსაჯთა და დელეგატთა ოთახები, დამონტაჟდება ინდივიდუალური სკამები.

მანამდე კი, სად ითამაშებს "კოლხეთი", ჯერ უცნობია. კლუბის პრესატაშე გია ეჯიბიას თქმით, ერთ-ერთი ვარიანტი ზესტაფონის "დავით აბაშიძის" არენა იყო, ხოლო მეორე - ქუთაისის "რამაზ შენგელია". თუმცა საკითხი ჯერ გადაწყვეტილი არ არის.

თავიდან, კლუბის ადმინისტრაცია ზუგდიდზე ფიქრობდა, მაგრამ ეს ვარიანტი გამოირიცხა, რადგან ახალ სტადიონზე ხარვეზები დღემდე არ მოგვარებულა და ფეხბურთის ფედერაციის სტადიონების კომიტეტს არენა არ ჩაუბარებია.

სარემონტო სამუშაოები ქობულეთში, "ჩელე არენაზეც" მიმდინარეობს. მინდვრის საფარი იცვლება და ხელოვნურ ხალიჩას ბუნებრივი მოედანი ჩაანაცვლებს, სტადიონის რეაბილიტაცია კი ეტაპობრივად განხორციელდება. "შუქურა" "ჩელე არენაზე" უკვე მეორე წრიდან დაბრუნდება.

შეფერხება მხოლოდ რუსთავშია: "ლელო" წერდა, რომ რუსთავის "ფოლადის" სტადიონის (რომლის მფლობელი მეტალურგიული კომბინატია) ქალაქის მერიისთვის გადაცემის თაობაზე სიტყვიერი შეთანხმება არსებობდა. მაგრამ ჯერ გადაცემა ოფიციალურად არ გაფორმებულა და აქედან გამომდინარე, საფარის დაგებაც ვერ იწყება.

დასახელებული არენების გარდა, განახლება წყალტუბოს 26 მაისის სახელობის სტადიონზეც მიმდინარეობს. აქაც იგივე სქემაა - ფეხბურთის ფედერაციის დაფინანსებით, "სამგურალის" არენაზე უმაღლესი ხარისხის ბუნებრივი საფარი დაიგება.

პარალელურად, ინფრასტრუქტურული სამუშაოები დაიწყება, რომლის ხარჯებს საკუთარი ბიუჯეტიდან წყალტუბოს მერია გაიღებს. სტადიონი დაახლოებით ზაფხულისთვის იქნება მზად და თუ ყველაფერი გეგმის მიხედვით განვითარდა, "სამგურალი" ჩემპიონატის მე-3 წრიდან საშინაო მატჩებს საკუთარ მოედანზე ჩაატარებს.

ყოველდღიური სპორტული გაზეთი "ლელო"
1464
მკითხველის კომენტარები / 0 /
მსგავსი ამბები
რუბრიკის სხვა სიახლეები