'სტად ფრანსე', 'კლერმონი' და სხვები... 34 მილიონით მელიქიძის 'სტად ფრანსე' ლიდერობს

საფრანგეთის სარაგბო ჩემპიონატის ელიტურ, პირველ დივიზიონში გათამაშება მომავალ უქმეებზე იწყება. საინტერესოა, როგორ ფინანსურ მდგომარეობაში ხვდებიან კლუბები ახალ ჩემპიონატს. ხშირ შემთხვევაში, სწორედ ფინანსური პირობები განსაზღვრავს ამა თუ იმ გუნდის წარმატებას თუ წარუმატებლობას.

აღსანიშნავია, რომ ელიტური პირველი დივიზიონის გუნდებიდან ყველაზე მდიდარი გიორგი მელიქიძის პარიზული "სტად ფრანსეა". არადა, ამ გუნდს გასულ სეზონში ფინანსურად ძალიან გაუჭირდა და გაკოტრების პირას იყო მისული. მხსნელად "სტად ფრანსეს" გერმანელი ბიზნესმენი მოევლინა, რომელიც ამავდროულად სარაგბო კლუბ "ჰაიდელბერგის" მფლობელიცაა. წლევანდელ სეზონში პარიზელების ბიუჯეტი 34 მილიონო ევრო იქნება.

მომდევნო პოზიცია დავით ზირაქაშვილის, ვიქტორ კოლელიშვილისა და ბექა კაკაბაძის "კლერმონს" უჭირავს, რომლის ბიუჯეტიც 32,5 მილიონი ევროა. "ვულკანები" ყოველთვის იყვნენ ფრანგული უმდიდრესი კლუბების მარაქაში. მათზე, ფაქტობრივად, მთელი რეგიონი მუშაობს, სადაც რაგბი ყველაზე პოპულარული სპორტის სახეობაა.

"კლერმონს" ხუთასი ათასი ევროთი ჩამორჩება ფრანგული რაგბის გრანდი "ტულუზი", რომლის შემადგენლობაში წლეულს ქართველი მორაგეები აღარ თამაშობენ.

უცნაურია, მაგრამ მულტიმილიონერი მურად ბურჯელალის გუნდი "ტულონი", სადაც წლეულს მამუკა გორგოძე და ბადრი ალხაზაშვილი ირჯებიან, ბიუჯეტის მხრივ მხოლოდ მეოთხე ადგილზეა. ტულონელები წლეულს 30 მილიონ ევროს დახარჯავენ.

კიდევ უფრო უცნაურია მილიარდერი მოჰედ ალტრადის "მონპელიეს" ბიუჯეტი: მიხეილ ნარიაშვილის, კონსტანტინე მიქაუტაძის, გელა აფრასიძისა და ლევან ჩილაჩავას გუნდს წლეულს 27 მილიონი ევრო ექნება ხაზინაში. მონპელიელებს ამ მაჩვენებლით "ლიონიც" უსწრებს, რომელსაც 29,8 მილიონი ევრო აქვს.

კიდევ ერთი მილიარდერის, შვეიცარიელი ჯეკ ლორეზეტის "რასნიგ 92" სულაც მე-9 ადგილზეა. ვასილ კაკოვინისა და გურამ გოგიჩაშვილის გუნდი, რომელიც ვარსკვლავებითაა მოჭედილი და ახლახან თბილისში იმყოფებოდა, წლეულს 24 მილიონ ევროს დასჯერდება. მას ზემოთ ჩამოთვლილი გუნდების გარდა "ლა როშელი" და "პო" უსწრებს.

ყველაზე ღარიბი პირველ დივიზიონში თამაზ მჭედლიძისა და გიორგი თათრაშვილის "აჟენია", რომელსაც "ქისაში" მხოლოდ 13,8 მილიონი ევრო აქვს. შესაბამისად, ეს გუნდი გასულ სეზონში დივიზიონში დარჩენისთვის იბრძოდა და, ამჯერადაც, დიდი ალბათობით ასე იქნება.

ქართველი მორაგბეების ბექა გორგაძის, ლექსო ყაულაშვილისა და ლაშა ტაბიძის "ბორდოს" ბიუჯეტი 23 მილიონია და მე-11 ადგილზეა. მომდევნო კი, დავით ქუბრიაშვილისა და ბექა გიგაშვილის "გრენობლია" - 18 მილიონი ევრო.

***

საკმაოდ საინტერესო სურათია მეორე დივიზიონში, სადაც გათამაშება გასულ უქმეებზე დაიწყო. ყველაზე მდიდარი კლუბი აქ "ნევერია", რომლის ბიუჯეტი 12,4 მილიონი ევროა. გასულ წელთან შედარებით ნევერელთა ჯიბე ორი მილიონით გაიზარდა.

მეორე ადგილზე კარლენ ასიეშვილის, ვასილ ლობჟანიძის, ოთარ გიორგაძისა და ლუკა გოგონავას "ბრივია" - 12,2 მილიონი. ბრიველები მეორე დივიზიონში წლეულს დაქვეითდნენ და შესაბამისად, მათი ბიუჯეტი 5,3 მილიონით შემცირდა.

11-11 მილიონი აქვთ "ოიონაქსს" და "ბაიონს". ყველაზე ღარიბი კი, ილია კაიკაციშვილის "მასია", რომლის ავლადიდება სეზონში მხოლოდ 4 მილიონი ევროა.

"ორიაკში" ძირითად და სათადარიგო გუნდში ჯამში შვიდი ქართველი მორაგბე თამაშობს. გუნდის ბიუჯეტი კი, 5,2 მილიონი ევროა და ამ მაჩვენებლით მეორე დივიზიონში ბოლოდან მესამე ადგილზეა.

შალვა სუთიაშვილის "ანგულემი" კი, მე-12 ადგილზეა. ამ კლუბის ბიუჯეტი 6.5 მილიონს შეადგენს.

932
მკითხველის კომენტარები / 0 /
მსგავსი ამბები
რუბრიკის სხვა სიახლეები
;