სტანიმირ სტოილოვი: საქართველო ფავორიტია, მაგრამ ფავორიტი ყოველთვის ვერ იგებს

ყაზახეთის ნაკრების ახალმა მწვრთნელმა სტანიმირ სტოილოვმა უნგრეთსა და ბულგარეთთან მოახლოებულ ამხანაგურ მატჩებზე ილაპარაკა. გარდა ამისა, მან ილაპარაკა ერთა ლიგაში მისი გუნდის მიზანზეც...

"ჩვენ გვაქვს დიდი პასუხისმგებლობა როგორც ქვეყნის, ისე ქომაგების წინაშე. ჩვენი ამოცანაა, მოვიგოთ ერთა ლიგის გათამაშება, ოღონდ, ვიცით, რომ ეს იქნება ძალიან რთული.

არც მე და არც ფედერაციის ხელმძღვანელობას არ მოსწონს ის პოზიცია, რომელზეც იმყოფება ქვეყნის უმთავრესი გუნდი ფიფას რეიტინგში...

ყაზახეთის ნაკრები ადრე დაცვას აქცევდა დიდ ყურადღებას. ახლა ასე აღარ გამოვა. თუ ერთა ლიგაში წარმატების მიღწევა გვსურს, ასე თამაში არ გამოგვადგება. მეტი ყურადღება უნდა მივაქციოთ შეტევას...

უნგრეთისა და ბულგარეთის ნაკრებები ძლიერი გუნდები არიან. მათ ფონზე ძალიან საინტერესოა ჩვენი შესაძლებლობების შემოწმება...

ერთა ლიგის გათამაშებას რაც შეეხება, საქართველო და ლატვია ფავორიტები არიან. ფიფას რეიტინგში მათ ჩვენზე უკეთესი პოზიციები აქვთ, თუმცა ყველაფერი ამის მიხედვით როდი წყდება. ფეხბურთში ყოველთვის ფავორიტი ვერ იგებს...

ჩვენი მთავარი ამოცანაა თამაშის სწორად ორგანიზება. თუ შევძელით ამის გაკეთება, მაშინ გვექნება უკეთესი შედეგები, თუ არა და, ჩვენი წარუმატებლობა გაგრძელდება. 2015 წლიდან ყაზახეთის ნაკრებს არ გაუმარჯვია. დამეთანხმებით, ეს მეტისმეტია...

მე არასოდეს განმიცხადებია, რომ მოვალ თუ არა ყაზახეთის ნაკრებში, მაშინვე წარმატებაც მოვა. საჭიროა ფეხბურთელების განვითარება და ეს უნდა მოხდეს კლუბებში.

ვნახე ყაზახეთის ჩემპიონატის სტარტი. ვერ ვიტყვი, რომ აღფრთოვანებული დავრჩი. ნაკრების ფეხბურთელებმა უკეთესად უნდა ითამაშონ და ჩვენ მათთან უთუოდ ვილაპარაკებთ ამ თემაზე", - თქვა სტანიმირ სტოილოვმა.

ყოველდღიური სპორტული გაზეთი "ლელო"
1308
მკითხველის კომენტარები / 0 /
მსგავსი ამბები
რუბრიკის სხვა სიახლეები