სტანიმირ სტოილოვი: ჩვენ შეგვიძლია დავძლიოთ ერთა ლიგის ბარიერი, მაგრამ ფავორიტები სულაც არ ვართ...

ყაზახეთის ნაკრების მთავარმა მწვრთნელმა სტანიმირ სტოილოვმა, ვინც ახლახან დაინიშნა ამ ქვეყნის ეროვნული გუნდის თავკაცად, ამჯერად შთაბეჭდილებები "ვესტის" გაუზიარა.

"ფეხბურთის ფედერაციის ხელმძღვანელობასთან ამომწურავად ვისაუბრე და ასეთი გადაწყვეტილება მხოლოდ ამის შემდეგ მივიღე. ყაზახეთში ბევრი ქომაგობდა ჩემს გუნდს.

ისინი სულ მეკითხებოდნენ, თუ როდის მივიდოდი ეროვნულ ნაკრებში. ვისაც ყაზახეთის ნაკრებში თამაში ხუმრობა ჰგონია, მათ არაფერი ესაქმებათ ეროვნულ გუნდში. დარჩნენ სახლში. მე ერთი რამის გარანტია შემიძლია მოგცეთ - ყველაფერს გავიღებ ყაზახეთის ეროვნული ნაკრებისთვის.

ყაზახ ფეხბურთელებს შეუძლიათ კარგი ფეხბურთის თამაში, უბრალოდ, მათ თავებში ბევრი რამ უნდა შეიცვალოს. ვინც არ ითამაშებს გუნდურ ფეხბურთს, მას არაფერი ესაქმება ეროვნულ ნაკრებში.

ჩვენ შეგვიძლია დავძლიოთ ერთა ლიგის ბარიერი, მაგრამ უნდა გვახსოვდეს, რომ ამ შეჯიბრებაში ფავორიტები სულაც არ ვართ. ჩვენ იმ ნაკრებს წარმოვადგენთ, რომელიც ჯგუფში მესამე კალათიდან მოხვდა.

ყაზახეთის ნაკრების წარუმატებლობის მიზეზი მხოლოდ მწვრთნელი არ არის. გუნდში მაღალი დონის სპეციალისტები მუშაობდნენ, მათ შორის, ბოროდიუკიც, ასევე სხვებიც... იქნება რთული მომენტები, მაგრამ გვჭირდება ქომაგების დიდი მხარდაჭერა", - თქვა სტოილოვმა და იქვე დასძინა, რომ კონტრაქტის ხანგრძლივობას მისთვის არანაირი მნიშვნელობა არ აქვს. ის წავა ნაკრებიდან მაშინ, როცა ამას საჭიროდ ჩათვლის ყაზახეთის ფეხბურთის ფედერაცია.

და მაინც, ქართველი მკითხველისთვის საინტერესო უნდა იყოს სტოილოვის კონტრაქტის დეტალები, რომელიც ყაზახურმა მედიამ გაასაჯაროვა. მათი ინფორმაციით, ბულგარელ სპეციალისტსა და ფეხბურთის ფედერაციას შორის 2-წლიანი ხელშეკრულება გაფორმდა.

ამასთან ერთად, სტოილოვის წინაშე კონკრეტული ამოცანა დგას - სულ მცირე, დაძლიოს ერთა ლიგის ჯგუფური ეტაპი. როგორც ჩანს, ბულგარელი მწვრთნელი ამას სავსებით შესაძლებლად მიიჩნევს და ეს აღნიშნა კიდეც.

ჩვენ ყველაფერს გავაკეთებთ...

ყაზახეთის ნაკრების ერთ-ერთმა ლიდერმა ბაუირჟან ისლამხანმა კომენტარი გააკეთა სტანიმირ სტოილოვის ეროვნული გუნდის მწვრთნელად დანიშვნის თაობაზე:

"ჩვენ ძალიან მოტივირებულები ვართ და ყველაფერს გავაკეთებთ იმისთვის, რომ გულშემატკივრები გავახაროთ. ვფიქრობ, ყაზახეთის ნაკრებს აქვს იმის პოტენციალი, რომ გულშემატკივრები გაახაროს", - თქვა 25 წლის შემტევმა ნახევარმცველმა.

ნატურალიზაციისთვის გამზადებულები

ყაზახეთის ნაკრები ერთა ლიგის გათამაშებაში ნატურალიზებული ფეხბურთელებით ითამაშებს. ამის თაობაზე იქაური ფეხბურთის ფედერაციის გენერალურმა მდივანმა აზამატ აიტხოჟინმა განაცხადა.

ყაზახური ფეხბურთის მამები მოლაპარაკებებს იწყებენ "ასტანას" ორ ფეხბურთელთან - სერბ მეკარე ნენად ერიჩსა და რუს მცველ ევგენი პოსტნიკოვთან. დიდი ხანია, ორივე ფეხბურთელი ყაზახეთში თამაშობს. სხვათა შორის, ერიჩმა უკვე ჩაატარა ერთი არაოფიციალური შეხვედრა ყაზახეთის ნაკრების შემადგენლობაში.

"ჩვენ ყველანაირად უნდა შევუწყოთ ხელი სტანიმირ სტოილოვს. სერბეთის ფეხბურთის ფდერაციასთან ვმართავთ მოლაპარაკებას ერიჩის თაობაზე და, შეიძლება ითქვას, შეთანხმებას უკვე მივაღწიეთ. რუსეთის საფეხბურთო კავშირთან გვაქვს მოლაპარაკება პოსტნიკოვის თაობაზე", - თქვა აიტხოჟინმა.

ვინ არიან ერიჩი და პოსტნიკოვი?

რა თქმა უნდა, საინტერესოა, ვინ არიან და რას წარმოადგენენ ის ფეხბურთელები, რომელთა ნატურალიზება ყაზახეთის ნაკრებში, ფაქტობრივად, გადაწყვეტილია.

დავიწყოთ 35 წლის ერიჩით. ის სერბეთის ქალაქ პოზაგაში დაიბადა. სხვადასხვა დროს უთამაშია "სლოგაში", "რადნიჩკიში", ოფკ-ში, "ბიგ ბულში, "მაცვაში", "ბორაცში", "სიბირში", ბარნაულის "დინამოსა" და "ქაირათში".

2011 წლიდან თითქმის შეუცვლელად იცავს "ასტანას" კარს. ამ გუნდის შემადგენლობაში მან დღემდე 164 მატჩი ჩაატარა. მან ყაზახეთის ნაკრების შემადგენლობაში ერთი ამხანაგური მატჩიც ითამაშა. ეს მოხდა 2015 წლის 18 თებერვალს, მოლდოვასთან სპარინგში.

გადავიდეთ პოსტნიკოვზე. 31 წლის უკანახაზელი მოსკოვის "დინამოს" აღზრდილია. ამ გუნდის გარდა, სხვადასხვა დროს უთამაშია "დაუგავაში", "სტარი ოსკოლში", "ტორპედო ზილში", "ვენტსპილსსა" და სოლიგორსკის "შახტიორში", "ასტანაში" კი 2014 წლიდან ირიცხება. მან კლუბის მაისურა 81 მატჩში მოირგო და 1 გოლი გაიტანა.

როგორც ერიჩი, ისე პოსტნიკოვი "ასტანას" წამყვანი ფეხბურთელები არიან და ცხადია, მათი ნატურალიზება პირადად სტოილოვის ინიციატივაა. ბულგარელი დამრიგებელი ორივე მათგანს ძალიან კარგად იცნობს. ბოლოს და ბოლოს, ბულგარელი სპეციალისტის ხელმძღვანელობით მათ ჩემპიონთა ლიგის ჯგუფურ ეტაპზე ითამაშეს...

ყაზახური მედიის ვარაუდით, პოსტნიკოვს შეუძლია, მოაგვაროს ის პრობლემები, რომელიც დღეს არის ყაზახეთის ნაკრების დაცვაში. იქ მიიჩნევენ, რომ გასულ შესარჩევ ციკლში ეროვნული გუნდი ხშირად სწორედ დაცვაში დაშვებული შეცდომების გამო ისჯებოდა.

ერიჩი კი უაღრესად გამოცდილი მეკარეა, რომელიც თანაბარი წარმატებით მოქმედებს როგორც კარის ხაზზე, ისე გამოსვლაზე. ერთი სიტყვით, ყაზახები საგანგებოდ ემზადებიან ერთა ლიგის გათამაშებისათვის.

ყოველდღიური სპორტული გაზეთი "ლელო"
512
მკითხველის კომენტარები / 0 /
მსგავსი ამბები
რუბრიკის სხვა სიახლეები