სტანიმირ სტოილოვი: ჯერ დაკარგული არაფერია

ლატვიასა და ანდორასთან შეხვედრების წინ ყაზახურ მედიასთან ისაუბრა ამ ქვეყნის ეროვნული გუნდის მთავარმა მწვრთნელმა სტანიმირ სტოილოვმა, რომელიც მიიჩნევს, რომ მისი ნაკრებისთვის ჯერ დაკარგული არაფერია...

- თუ არის ცვლილება ყაზახეთის ნაკრების შემადგენლობაში?

- ერთადერთი ცვლილება მოხდა. ეკებურლან ტუნგიშბაევის ნაცვლად, რომელმაც ტრავმა მიიღო ბოლო შეხვედრაში, "ქაირათიდან" გამოვიძახეთ ალექსანდრ სოკოლენკო. დანარჩენები თავს ჯანმრთელად გრძნობენ.

რამდენიმე დღის განმავლობაში გაფურჟან სუიუმბაევი ინდივიდუალურად მოემზადება. იმ დროის განმავლობაში, როცა გუნდი არ იყო შეკრებილი, ბევრმა ფეხბურთელმა კლუბებში ნორმალური მატჩები ჩაატარა. ვფიქრობ, ისინი კარგ ფორმაში შეხვდებიან ერთა ლიგის თამაშებს.

- რას უნდა ველოდოთ ყაზახეთის ნაკრებისგან უახლოეს მატჩებში?

- ჩვენ მთელი ამ დროის განმავლობაში ვეძებდით რეცეპტს, თუ როგორ უნდა გაგვეუმჯობესებინა გუნდის თამაშის ხარისხი. ორივე შეხვედრის შედეგი იყო წარუმატებელი, მაგრამ თამაშის ხარისხი ნამდვილად არ იყო ცუდი.

გუნდს ჰქონდა ინიციატივა და თამაშობდა შეტევაში. კი, იყო პრობლემები დაცვასა და შეტევაში - გავუშვით და ცოტა გავიტანეთ. სექტემბერი ჩვენი გუნდის შემტევებისთვის მძიმე თვე იყო. ისინი, პრაქტიკულად, არ თამაშობდნენ თავიანთ გუნდებში.

ჩვენ გვინდა, რომ ყაზახეთის ნაკრები თამაშიდან თამაშამდე გაიზარდოს. არ გადავუხვევთ იმ გზას, რომელიც ავირჩიეთ. უნდა ვითამაშოთ "პირველ ნომრად". ასეთ შემთხვევაში, დაცვაში ნაკლები შეცდომები გვექნება და შეტევაში მეტს გავიტანთ. მხოლოდ ასე ვუპასუხებთ ევროპული ფეხბურთის მოთხოვნებს.

ჩვენ შეგვეძლო, გვეთამაშა "მეორე ნომრად" და მიგვეღო უკეთესი შედეგი, მაგრამ ეს არ არის ის გზა, რომელიც ავირჩიეთ. მოვიდა დრო, რომ გუნდის თამაშის სტილი შეიცვალოს. ახლა ამის პარალელურად შედეგების გაუმჯობესების დროა. თანაბრად უნდა ვითამაშოთ დაცვასა და შეტევაში. ჩემი აზრით, უახლოეს ორ შეხვედრაში ჩვენ შევძლებთ იმ პრობლემების მოგვარებას, რომელიც გვაქვს დაცვასა და შეტევაში.

- ბევრი ამბობს, რომ ისლამბეკ კუატი და ბაუირჟან ისლამხანი ბოლო დროს ნაკლებად მომთხოვნები არიან საკუთარი თავის მიმართ. ეთანხმებით ამ შეფასებას?

- მე ვნახე, რომ "ქაირათის" ბოლო შეხვედრაში ისინი ძირითადში არ იყვნენ. არ ვიცი, რა არის მიზეზი. არ მგონია, მათთან რაიმე პრობლემა მქონდეს. საერთოდ, ფეხბურთელმა კლუბში უნდა დაამტკიცოს, რომ ნაკრებში თამაშის ღირსია. და მაინც, შემადგენლობაში არაერთი ისეთი მოთამაშის დაყენება გვიწევს, რომლებიც კლუბში ვერ ხვდებიან ძირითად შემადგენლობაში. ამ კუთხით თუ შევხედავთ, კარგია, რომ ჟუკოვი და პარაგულგოვი ხვდებიან "ქაირათის" სასტარტო შემადგენლობაში.

- რა შანსი აქვს ყაზახეთის ნაკრებს, დაძლიოს ერთა ლიგის ჯგუფური ბარიერი?

- ჯერ დაკარგული არაფერია. ბოლომდე ბრძოლაა საჭირო ანდორასთან ქულები არავითარ შემთხვევაში არ უნდა დაგვეკარგა, მაგრამ ახლა თავის მართლების დრო არ არის, უნდა ვიფიქროთ იმაზე, თუ როგორ მოვუგოთ ლატვიასა და ანდორას. ამასთან, უნდა დაველოდოთ მეტოქეების წაფორხილებას. თუ ისინი შეცდომებს დაუშვებენ, ჩვენ შანსი გაგვიჩნდება. ოღონდ, ეგ არის, რომ ფეხბურთელებს პრაქტიკა თუ არ ექნათ, ისე არაფერი გამოვა. მაგალითად, სეიდახმეტმა ექვს თვეში მხოლოდ ერთი მატჩი ჩაატარა, ოთხი ტრავმა მიიღო. არადა, პოტენციალი აქვს. მოკლედ, უნდა ვიმუშაოთ და შანსს დაველოდოთ.

ყოველდღიური სპორტული გაზეთი "ლელო"
734
მკითხველის კომენტარები / 0 /
მსგავსი ამბები
რუბრიკის სხვა სიახლეები