[VIDEO] სტეფანიადან ბითაძემდე: ქართველთა დებიუტები NBA-ში

24 ოქტომბერი, თბილისის დროით ღამის 3 საათი, "ინდიანა"-"დეტროიტი". ესაა ინდიანელთა 2019-20 წლების სეზონის პირველი ოფიციალური მატჩი, რომელშიც ბითაძის დებიუტს ველოდით. მაგრამ ამაოდ, მწვრთნელმა იგი მოედანზე არ გაიყვანა.

ნაციონალურ საკალათბურთო ასოციაციაში ბითაძემდე ოთხმა ქართველმა ითამაშა: ვლადიმერ სტეფანიამ, ნიკა ცქიტიშვილმა, ზაზა ფაჩულიამ და თორნიკე შენგელიამ. მოდით, ერთად გავიხსენოთ თითოეულის დებიუტი.

1998 წელი
ვლადიმირ სტეფანია
სიეტლი
დრაფტის 27-ე ნომერი
დებიუტი: 2 თებერვალი, 1999 წელი
სიეტლი-გოლდენ სტეიტი 90:71
10 წუთი, 2 ქულა, 2 დაფარება, 1 მოხსნა, 1 ჩაჭრა

ვოვა პირველი ქართველი და ერთ-ერთი პირველი ევროპელი იყო, ვინც დრაფტზე აურჩევიათ. იგი თავის NBA-ურ დებიუტს დიდხანს ელოდა. ჯერ სეზონი გვიან დაიწყო - იანვრის ბოლოს, შემდეგ მწვრთნელს ელოდა, რომელმაც პირველ მატჩში სტეფანიას მოედანზე შეყვანისგან თავი შეიკავა, არც მეორეში ათამაშა...

მესამე შეხვედრა 2 თებერვალს იყო. ვოვას 10 წუთი ერგო და რაც შეეძლო გააკეთა - 2-დან 1 ორქულიანი ჩააგდო, ორჯერ დააფარა... პირველ სეზონში მან "სიეტლის" 50-დან 23 მატჩი ითამაშა. ყველაზე მეტი, 34 წუთი ბოლოსწინა თამაშში ერგო და ამერიკული კარიერის პირველი ორმაგი დუბლიც გაიფორმა - "დალასთან" 17 ქულას 10 მოხსნა მიამატა.
პირველ წრეში რომ აგიყვანენ, ძალიან სასიამოვნოა, მაგრამ წლების შემდეგ აი, რას ჰყვება სტეფანია:

- ევროპაში უკვე ბევრი რამ მქონდა გაკეთებული. ევროლიგის ნახევარფინალშიც ნათამაშები მქონდა და ევროლიგის "ოლ სტარშიც". რაც მთავარია, "ოლიმპიაში" სულაც არ ვიყავი მეორეხარისხოვანი კალათბურთელი. ასე რომ, ვერ ვიტყვი, ამერიკაში წასვლა ვიჩქარე-მეთქი. უბრალოდ, მოვხვდი იქ, სადაც არ უნდა მოვხვედრილიყავი. მაშინ არ იყო იმდენი ინფორმაცია, რაც ახლაა. არც ის ვიცოდი, რომელი გუნდი როგორ ზრუნავდა კალათბურთელებზე და მათ პროგრესზე... დღეს შემიძლია ვთქვა, რომ არ გამიმართლა - ამიყვანა "სიეტლ სუპერსონიქსმა", რომელშიც ასეთი დახარისხება იყო: 7 მთავარი კაცი და დანარჩენები. გარი პეიტონში და კიდევ ექვს ვარსკვლავში სიეტლელები დიდ ფულს იხდიდნენ და სერიოზულ ყურადღებასაც აქცევდნენ, დანარჩენებს მოგვცემდნენ ბურთს და ხუთი-ხუთზე ითამაშეთო.



2002 წელი
ნიკოლოზ ცქიტიშვილი
დენვერი
დრაფტის მე-5 ნომერი
დებიუტი: 30 ოქტომბერი, 2002 წელი
მინესოტა-დენვერი 83:77
29 წუთი, 9 ქულა, 2 დაფარება, 2 მოხსნა, 3 პასი

2000-იანების დასაწყისში NBA-ში შევიდა დირკ ნოვიცკი და თავისი უნივერსალიზმით ყველა გააოცა. სწორედ მაშინ დაიწყეს ევროპაში ახალი ნოვიცკების ძებნა და 2002 წელს "დენვერმა" დიდი ავანსი გასცა ნიკა ცქიტიშვილზე - დრაფტზე მე-5 ნომრად აიჩია.

სკიტას ქართველ NBA-ელებს შორის საუკეთესო დებიუტი ჰქონდა, წუთებიც საკმარისად ერგო და ქულებიც უხვად ჰქონდა. 4-დან 3 სამქულიანი - 9 ქულა.
- ვიცი, ამერიკაში 2002-ში არ უნდა წავსულიყავი, - მოგვითხრობს ნიკა, - თინეიჯერულ ასაკში NBA-ს კლუბთან კონტრაქტის გაფორმება შეცდომა იყო. მანამდე ევროპაში სათამაშო დრო ძალიან ცოტა მქონდა, იტალიური "ბენეტონის" შემადგენლობაში ევროლიგაზე ჯამში 40 წუთიც არ მქონდა ნათამაშები. არ უნდა ავჩქარებულიყავი, ევროპაში კიდევ ორი წელი მეთამაშა და NBA-ზე შემდეგ მეფიქრა.

ნიკას ვკითხე: დროის დაბრუნების შესაძლებლობა რომ გქონდეს, ამერიკაში 18 წლისა არ წახვიდოდი-მეთქი? კითხვითვე მიპასუხა:

- შენი თავი წარმოიდგინე ჩემს ადგილას. ამერიკული გუნდები გპირდებიან, რომ NBA-ს დრაფტზე ტოპ-ხუთეულში აგიყვანენ, რაც გარანტირებულ სამწლიან კონტრაქტს გულისხმობს. ასეთ დროს, არ გაგიჩნდება შეგრძნება, რომ შენ ამას იმსახურებ, რომ შეგიძლია ვარსკვლავებში ვარსკვლავურად ითამაშო? არ შეგემატება თვითრწმენა, თავდაჯერება? იტყვი უარს?



2003 წელი
ზაზა ფაჩულია
ორლანდო
დრაფტის 42-ე ნომერი
დებიუტი: 5 ნოემბერი, 2003 წელი
ორლანდო-ჩიკაგო 100:106
16 წუთი, 7 ქულა, 6 მოხსნა, 1 პასი, 2 ჩაჭრა, 1 დაფარება.

NBA-ს 2003-04 წლების სეზონის სტარტს ზაზა სათადარიგოთა სკამზე შეხვდა. დებიუტში, 29 ოქტომბერს "ორლანდომ" "ნიუ იორკი" ისე დაამარცხა (85:83), ფაჩულია მოედანზე არ გამოჩენილა. შემდეგ იყო წაგება "ნიუ ორლეანთან", "დეტროიტთან", "ნიუ იორკთან"... ოთხი მატჩი რომ შევკრიბოთ 192 წუთს მივიღებთ. ზაზას აქედან წამიც არ რგებია.

- "ორლანდოს" მაშინდელმა მწვრთნელმა დოკ რივერსმა საწყის 4 შეხვედრაში არ მათამაშა. რამაც ძალიან გამაბრაზა. თამაში მინდოდა, მწვრთნელი სხვაგვარად ფიქრობდა.

ათწლეულის გადასახედიდან ყველაფერი სხვაგვარად ჩანს. გულის მოსვლა ჩემი გამოუცდელობის ბრალი იყო. მაშინ 19 წლისა ვიყავი. რივერსმა მითხრა: ახალგაზრდა ხარ, ამერიკის საკალათბურთო ასოციაციაში ახლა იკიდებ ფეხს, არ ვიცი, როდის დამჭირდები, როდის ჩაგრთავ თამაშში, ყოველთვის მზად უნდა იყოო. გუნდის ვარჯიშების შემდეგ მერიდებოდა, რომელიმე ასისტენტისთვის მეთხოვა, დამატებითი წვრთნისთვის დარბაზში მეორედ მომეყვანა. სწორედ მაშინ გადავწყვიტე პირადი მწვრთნელის აყვანა - თურქეთიდან ფატმირ ქუკა ჩამოვიყვანე. ძალიან კარგი ადამიანი და მწვრთნელია. დღეში ორჯერ ვვარჯიშობდით, ხოლო თამაშის დღეებში, თუ მოედანზე გასვლა მცირე ხნით მიწევდა, დარბაზში ვრჩებოდი. ყოფილა შემთხვევა, ღამის 2 საათამდე მივარჯიშია.

"ჯადოქრებმა" სეზონი "ჯადოსნურად" დაიწყეს - სასტარტო ხუთ მატჩში ოთხი მარცხი. მეხუთედ "ჩიკაგო ბულსთან" დათმეს... "ხარებთან" თამაშის პერიპეტიები "ორლანდოს" მაშინდელ წევრთაგან, ალბათ, არავის ემახსოვრება გარდა დებიუტანტი ზაზა ფაჩულიასი, რომელმაც პირველად სწორედ "ჩიკაგოსთან" დაპირისპირებაში შაბიჯა NBA-ში. მატჩის დაწყებიდან 11:45 წუთი იყო გასული დოკ რივერსმა რომ მიუთითა - სტივენ ჰანტერი შეცვალეო. ფრთაშესხმული ფაჩულია მოედანზე შეფრინდა და ტაისონ ჩენდლერს აეწება. იმდროინდელი ჩენდლერის შესაჩერებლად კი, ფრთები ნამდვილად საჭირო იყო.

ზაზამ მოხსნა, ჩაჭრა, პასი შეასრულა, ჩააგდო, მეტოქეებს წესების დარღვევა აიძულა... მწვრთნელმა ახალგაზრდა დებიუტანტს "ბულსთან" 16 წუთი დაუთმო. ზაზამ თავი არ შეირცხვინა: 7 ქულა ჩააგდო, ბურთი 6-ჯერ მოხსნა, თითო პასი-დაფარება და 2 ჩაჭრა გაიფორმა.

- მოუთმენლად ველოდი მოედანზე გასვლას. როცა ამის შანსი მომეცა, მინდოდა დამემტკიცებინა, რომ მწვრთნელისგან მეტ ნდობას ვიმსახურებდი. შესაძლოა, NBA-ში ამაზე სამჯერ ეფექტური შეხვედრებიც მქონდა, მაგრამ "ჩიკაგოსთან" დაპირისპირება ერთ-ერთი მთავარია ჩემს კარიერაში.



2012 წელი
თორნიკე შენგელია
ფილადელფია (იმავე საღამოს "ბრუკლინს" დაუთმო)
დრაფტის 54-ე ნომერი
დებიუტი: 7 ნოემბერი, 2012 წელი
მაიამი-ბრუკლინი 103:73
12 წუთი, 2 ქულა, 1 მოხსნა.

თორნიკე შენგელია 202 წლის დრაფტზე "ფილადელფიამ" აირჩია და "ბრუკლინ ნეთსს" დაუთმო, გუნდს, რომელსაც ჩემპიონობა ჰქონდა მიზნად დასახული და სერიოზული შემადგენლობა ჰყავდა შეკრებილი - გარნეტიდან დაწყებული კირილენკოთი დამთავრებული.

თორნიკეს, ისევე როგორც ვლადიმერ სტეფანიას ორი მატჩის მოცდა მოუწია დებიუტამდე. ისევე როგორც ვოვამ თოკომაც 2 ქულა ჩააგდო. კიდევ ერთი მსგავსება - შენგელიასაც შიგადაშიგ უწევდა თამაში - პირველ სეზონში ჯამში 19 შეხვედრა მოუგროვდა.

თორნიკემ წელიწადნახევარი "ბრუკლინში" ითამაშა, რომელიც დიდი შედეგებით ვერ დაიტრაბახებდა. 2014 წელს "ჩიკაგო ბულსში" გადავიდა. იქაც ცოტა დრო ჰქონდა.

- NBA-ს რეგულარულ სეზონში კვირაში 3-4 თამაშია, გუნდები მატჩიდან მატჩამდე შედიან ფორმაში, თუ მოედანზე გასვლა იშვიათად გიწევს, ვერც ფორმაში შეხველ და სათამაშო პრაქტიკაც არ გექნება. ვარჯიშებზე ხომ არავინ იტვირთება, რათა მომდევნო დღის თამაშისთვის საღად იყოს. მთელი სეზონი მხოლოდ ინდივიდუალური წვრთნა ბევრს არაფერს შეგმატებს, - თქვა თორნიკემ და კარიერის ევროპაში გაგრძელება გადაწყვიტა.
დღეს იგი ბებერი კონტინენტის საუკეთესო ფორვარდთაგანია.



2012 წელი
გოგა ბითაძე
ინდიანა
დრაფტის მე-18 ნომერი
დებიუტი: ველით

საგამოფენო შეხვედრებიდან გოგამ "ინდიანას" მაისურით ერთადერთი მატჩი ითამაშა. მიზეზი კოჭის მცირე ტრავმაა. ბოლო საკონტროლო მატჩში მისმა გუნდმა "მინესოტასთან" ითამაშა.

გოგას მონაგარი ასეთი იყო: 24 წუთში 14 ქულა, 4 მოხსნა, 2 პასი, 1 დაფარება, 4 ფოლი, 6 შეცდომა. მან პირვეივე მატჩში უჩვენა ამერიკელებს, რომ მრავალმხრივი მოთამაშეა - 3-დან 2 სამქულიანი ჩააგდო, რასაც 6-დან 4 ორქულიანი მიამატა.

- ვგრძნობ, რომ ჯერ კიდევ მაქვს ბევრი სამუშაო ფორმაში შესასვლელად. საჭიროა გაცილებით კარგი კონდიციები ასეთი დონის კალათბურთელებთან სათამაშოდ. თუმცა ეს ჯერ მხოლოდ წინასასეზონო მატჩებია და NBA-ს დაწყებამდე ცოტა დრო კიდევ მაქვს. პირველ ოფიციალურ მატჩს 100 პროცენტით მზად უნდა შევხვდე. რაზე მაქვს სამუშაო? თამაში ძალიან მაღალ ტემპში მიმდინარეობს, საჭიროა დროულად გადართვა დაცვისას, სხვადასხვა პოზიციებზე თანაბრად კარგად დაცვა. ძალიან სასიამოვნოა, რომ მოედანზე დავბრუნდი. თავიდან ცოტას ვნერვიულობდი, მაგრამ თანაგუნდელები და მწვრთნელები დამეხმარნენ და ფსიქოლოგიური ბარიერი იოლად დავძლიე. ვიმედოვნებ, მომდევნო მატჩებში კიდევ უფრო უკეთ ვითამაშებ.

4270
მკითხველის კომენტარები / 0 /
მსგავსი ამბები
რუბრიკის სხვა სიახლეები
;