სტრატეგიულად მნიშვნელოვანი ფეხბურთელი. მოხერხდება თუ არა გიორგი წიტაიშვილის ნატურალიზაცია?

პოსტსაბჭოურ პერიოდში საქართველოს წინააღმდეგ წამოწყებულმა ომებმა და ამის შედეგად წარმოქმნილმა ეკონომიკურმა კრიზისმა მილიონზე მეტი ადამიანი აიძულა, ქვეყნიდან წასულიყო.

ეს "დომინოს პრინციპით" ყოველდღიურ ცხოვრებასა და ფეხბურთზეც აისახა. უცხოეთში ბევრი ჩვენებური გაიხიზნა, რის შედეგადაც სულ უფრო ხშირად გვხვდება ქართული წარმოშობის ფეხბურთელები. ზოგიერთის ნაკრებში გამოძახება ვერ მოხერხდა - აკაკი გოგიასი (უნიონი, გერმანია), გიორგი ჯიქიასა (სპარტაკი, რუსეთი) და გიორგი მელქაძის (ტამბოვი, რუსეთი).

საბედნიეროდ, არიან ისეთებიც, ვინც ისტორიული სამშობლოს სახელით თამაში ისურვა - "სეზონი" 1995 წელს მიხეილ ფოცხვერიამ გახსნა, მერე იყო გია გრიგალავა, ვაკო გვილია, ლუკას ჰუფნაგელი (დედით ქართველი), ზაურ მახარაძე, ბექა ვაჩიბერაძე...

არიან კიდევ საინტერესო "მამლუქები" - გიორგი შელია (ტამბოვი, რუსეთი), ნიკოლოზ გიორგობიანი (უფა, რუსეთი), ლევან არველაძე (ზორია, უკრაინა), ნიკა ყიფიანი (როტორი, რუსეთი), ანზორ სანაია (როტორი, რუსეთი), გიორგი მიქაუტაძე (მეცი, საფრანგეთი), გიორგი წიტაიშვილი (დინამო , უკრაინა)...

...მაგრამ ამ სიაშიც კი ერთი ქართველის გვარი განსაკუთრებით ბრწყინავს, რომელსაც ასე ვუწოდებდი - "სტრატეგიულად მნიშვნელოვანი ფეხბურთელი". ლაპარაკია კიევის "დინამოს" შემტევ გიორგი წიტაიშვილზე, რომელიც უკრაინის პრემიერლიგის ბოლო 6 ტურში კიეველთა ძირითად შემადგენლობაში მოხვდა.

წიტაიშვილი 2019 წელს პოლონეთში გამართულ 20-წლამდელთა მსოფლიოს ჩემპიონატზე უკრაინის ნაკრების შემადგენლობაში ოქროს მედლის მფლობელი გახდა, დაამარცხა რა გადამწყვეტ შეხვედრაში სამხრეთ კორეა - 3:1.

მესამე გოლი, რომელმაც ყველა კითხვა მოხსნა, წარმოშობით ქართველმა თავდამსხმელმა გაიტანა, რომელიც მერე ფინალის საუკეთესო მოთამაშედ აღიარეს. კიევის "დინამოს" თავდამსხმელი 2019 წელს უეფამ ევროპის 50 გამორჩეულ ახალგაზრდა მოთამაშეს შორის დაასახელა...

წიტაიშვილი ნიჭიერი რომ არის, სწორედ ამიტომ ატყდა ერთი ამბავი 2019 წელს, როცა დონეცკის "შახტართან" მოლაპარაკება ფარულად დაიწყო და, ფაქტობრივად, გადასულიც იყო, მაგრამ... მერე ვითარება შეიცვალა და თქვა, რომ კიევში რჩებოდა.

კიევის "დინამოს" შემტევ ნახევარმცველს საინტერესო შემოთავაზებები წელსაც ჰქონდა, მაგრამ განაცხადა, რომ ჯერ კიევის "დინამოში" ადგილის დამკვიდრებაზე ფიქრობს.

"კიევის "დინამოს" პრეზიდენტს სურს, რომ დავრჩე. მეც ამის დიდი სურვილი მაქვს და უახლოესი მომავლის პერსპექტივაში ჩემს თავს კიევში ვხედავ. არ ვამბობ, რომ არავითარ შემთხვევაში არ წავალ და სულ კიევში დავრჩები. მაგრამ ამ ეტაპზე "დინამოში" თამაში მინდა. "ბეშიქთაშის" დაინტერესება რეალური იყო. მაგრამ სიმართლე გითხრათ, ამისთვის ყურადღება არც მიმიქცევია. სისულელეა ჩემს ასაკში და ასეთ ვითარებაში წასვლა. რატომ? ჯერ ერთი მაღალ დონეზე თამაშის გამოცდილება არ მაქვს და რეალურად რომ ვთქვათ, ჯერ პროფესიულ ფეხბურთში ბევრი არაფერი გამიკეთებია. დიახ, 20-წლამდელებში მსოფლიო ჩემპიონი გავხდი, მაგრამ ამ ასაკის ფეხბურთელი ვის სჭირდება? ამ ნაბიჯით ხელფასი მაქსიმუმ ორი ათასით გამეზრდება, მაგრამ რეალურად, რა შემემატებოდა? ჯერ მირჩევნია, გამოცდილება მივიღო და კიევის "დინამოში" ვითამაშო. წასვლაზე ფიქრი მხოლოდ ამის შემდეგშეიძლება", - ამბობს წიტაიშვილი.

ამ ტექსტიდან ჩანს, რომ გიორგის გული მაინც ევროპისკენ მიუწევს და ეს არც არის გასაკვირი.

ასეთი უკრაინაში ბევრი არ არისო...

გიორგი წიტაიშვილი უკრაინელებისთვისაც სტრატეგიულად მნიშვნელოვანი მოთამაშეა. მათ ჯერაც არ განელებიათ გაბრაზება იმის გამო, რომ უკრაინაში გაზრდილმა ქართველმა ფეხბურთელებმა - მიხეილ ფოცხვერიამ, ვაკო გვილიამ, ბექა ვაჩიბერაძემ - ისტორიულ სამშობლოში თამაში ამჯობინეს.

ასე რომ, გიორგის უკრაინელები განსაკუთრებით უფრთხილდებიან და მისი ფასიც კარგად იციან. სამენეჯერო სააგენტო "ტრანსფერმარკტის" შეფასებით, 18 წლის წიტაიშვილის სატრანსფერო ფასი 900 ათასი ევროა. ცნობისთვის, პანდემიამდე მილიონი ევროც იყო.

"ძალიან კარგია, რომ გიორგის ენდობიან. გამოდის, რომ დიდი კონკურენციის მიუხედავად, მონდომებული ვარჯიშით მთავარ გუნდში ადგილი დაიმსახურა. ის შემოქმედებითი ფეხბურთელია, ბურთს კარგად ფლობს, კარგი დარტყმაც აქვს და მწვავე გადაცემაც ეხერხება. კიევის "დინამოში" ასეთი ფეხბურთელები ცოტაა. წიტაიშვილს კარგი მომავალი აქვს. მთავარია, არ გაჩერდეს", - განაცხადა ვირტმა.

ფიფამ ბოლო წლებში ნატურალიზაცია მეტისმეტად გაართულა. ამიტომაა, რომ ბექა ვაჩიბერაძის საკითხი ჯერ კიდევ ჰაერშია გამოკიდებული - საქართველოს პასპორტი აიღო, მაგრამ ნაკრებში ვერ თამაშობს და ფიფას ნებართავს ელის.

წიტაიშვილი, ჰაალანდი, სანჩო...

2020 წელს გიორგი წიტაიშვილი Golden Boy 2020-ის კანდიდატიც გახდა. ეს ტრადიციული პრიზია, რომლის კანდიდატთა სიას პოპულარული იტალიური გამოცემა "ტუტოსპორტი" ადგენს და ევროპის ყველაზე ნიჭიერ და იმედისმომცემ ახალგაზრდა ფეხბურთელს გადასცემს. ჯილდოს მსურველთა შორის უკრაინული პრემიერლიგიდან ორი ფეხბურთელი იყო, მათ შორის, ერთ-ერთი წიტაიშვილი გახლდათ.

სიაში ბევრი ცნობილი ფეხბურთელი მოხვდა - ალფონსო დევისი (ბაიერნი), ანსუ ფატი (ბარსელონა), ფილ ფოდენი (მანჩესტერ სიტი), ერლინგ ჰაალანდი (დორტმუნდი), კალუმ ჰადსონ-ოდოი (ჩელსი), როდრიგო (რეალი), ჯეიდონ სანჩო (დორტმუნდი), რაიან სესენიონი (ტოტენჰემი), ფერან ტორესი (ვალენსია), ვინისიუშ ჟუნიორი (რეალი), ტეტე (შახტარი) და გიორგი წიტაიშვილი (დინამო კ).

კიევის "დინამოს" მცველმა დენის პოპოვმა მოუწოდა უკრაინელ გულშემატკივარს, Golden Boy 2020-ის გამოკითხვაში მის თანაგუნდელ წიტაიშვილს დაუჭირონ მხარი.

"უკრაინას სჭირდება, რომ Golden Boy-ის პრიზი ჩვენს ქვეყანას დარჩეს", - ასე მიმართა უკრაინელ გულშემატკივრებს დმიტრი პოპოვმა ინსტაგრამის გვერდზე.

ამ დროისთვის წიტაიშვილს, ჰაალანდსა და მეისონ გრინვუდს გულშემატკივართა 4% უჭერს მხარს.

რამდენად რეალურია...

ბოლო წლებში ჩვენთან ბევრი კარგი მოთამაშე გამოჩნდა - გიორგი ჩაკვეტაძე, ზურიკო დავითაშვილი, ხვიჩა კვარაცხელია... ამ უნიჭიერეს ბიჭებს წიტაიშვილიც დაუმშვენებდა გვერდს, მაგრამ რამდენად რეალურია, ეს ჯერ არავინ იცის.

გიორგის ნატურალიზაცია რთული იქნება, მაგრამ არა - შეუძლებელი. როგორც მამამისი, საქართველოს ნაკრებში ნათამაშები კობა წიტაიშვილი ამბობს - "მე არავისგან არ მჭირდება იმის ახსნა, რომ ქართველი ვარ და შვილიც ქართველად აღვზარდე"...

1929
მკითხველის კომენტარები / 1 /
Aravis
0
არ შერჩებათ არავის ჯერ მარტო ფოცხვერიას ჩამწარება და სხვა ქართველების წართმევა მითვისება კბილების ღრჭენა. ქართველი არასოდეს იკადრებს იმას რომ საქართველოს ნაკრებში დააძალოს თამაში ან თვითონ თამაშობდეს უკრაინელი ან რუსი ჯერ მარტო ეს ეროვნული შეურაცხყოფაა და მერე კიდე წარმომავლობის დამალვა მაქსიმალურად უცხოეთში საკუთრად გასაღება ის რასაც ბერძნები და რუსები აკეთებენ ქართველებს რუსებად ან უკრაინელებად რომ ასაღებენ.
მსგავსი ამბები
რუბრიკის სხვა სიახლეები
;