სულაქველიძის აკადემიაში მოედანს დააგებენ, - ბათუმში კარგი ტემპია

არახალია, რომ ბოლო 25 წელიწადში საქართველოში საფეხბურთო ინფრასტრუქტურა განადგურდა. პრივატიზაციად წოდებული დატაცების პროცესი ისეთ აბსურდამდე მივიდა, რომ 40-მდე სტანდარტული მოედანი, მათ შორის, ცნობილი საფეხბურთო ცენტრები და საფეხბურთო სკოლები აღარ არსებობს.

ლოგიკური შედეგიც მივიღეთ - ქვეყანაში, სადაც ფეხბურთს აღმერთებდნენ, დღეს ბევრი თვლის, რომ ფეხბურთი ქართველებისთვის უცხო თამაში გახდა.

სწორედ ამიტომ არის მნიშვნელოვანი თითოეული სტადიონის და სკოლის შენარჩუნება და ის ინფრასტრუქტურული პროექტები, რომლის განხორციელებაც მიმდინარეობს. ასე მაგალითად, როგორც იქნა, ბათუმში სტადიონის მშენებლობა დაიწყო და საკმაოდ კარგი ტემპითაც მიმდინარეობს...

პროექტის მიხედვით, სტადიონი 20 ათას მაყურებელზე იქნება გათვლილი და უეფას მეოთხე კატეგორიის სტანდარტებს დააკმაყოფილებს. აჭარის ფინანსთა და ეკონომიკის სამინისტროს ცნობით, მშენებლობაზე 200 ადამიანია დასაქმებული.

ამჟამად მიმდინარეობს შენობის საძირკვლის მოწყობის სამუშაოები და რკინაბეტონის კონსტრუქციების მშენებლობა. სამუშაოები სულ რაღაც ორი თვის წინ დაიწყო. ამის გათვალისწინებით, შეიძლება ითქვას, მშენებლობის ტემპი მართლაც საკმაოდ კარგია.

ამასობაში, ანგისას ბაზაზე მოედნის მოწესრიგებას ასრულებენ. ბათუმის "დინამოს" ოფიციალური ვებგვერდის ცნობით, გუნდის ანგისას ბაზის ბუნებრივსაფარიან მოედანზე ინტენსიური სამუშაოები მიმდინარეობს და "დინამო" ბაზაზე საშინაო მატჩებს აპრილის მეორე ნახევრიდან გამართავს.

არახალია, რომ საქართველოში არსებული საფეხბურთო სკოლების პრობლემა ინფრასტრუქტურაა. სხვა სატკივართან ერთად, სკოლების უმრავლესობა ბუნებრივ მოედანს მოკლებულები არიან და ბავშვებს ხელოვნურ საფარზე ავარჯიშებენ. აქედან ბევრი პრობლემა იღებს სათავეს, მათ შორის - გახშირებული ტრავმიანობა.

თენგიზ სულაქველიძის სახელობის აკადემია იშვიათი გამონაკლისია, სადაც ხელოვნური საფარი არ იყო. საუკუნის დასაწყისში აშენებულ აკადემიაში აქვთ ორი ბალახისსაფარიანი სტანდარტული მოედანი და ორიც - მიწისაფარიანი.

რაც უნდა პარადოქსული იყოს, სულაქველიძის აკადემიას პრობლემას სწორედ ეს უქმნიდა. წვიმის დროს მოედნების გაფუჭების შიშით, იქ ვარჯიში შეუძლებელი იყო, ხელოვნურსაფრიანი მოედანი კი არ ჰქონდა.

აკადემიაში ეს პრობლემა მალე მოგვარდება. საქართველოს ფეხბურთის ფედერაცია ინფრასტრუქტურული პროექტების განხორციელებას აგრძელებს და მისმ დაფინანსებით, თენგიზ სულაქველიძის სახელობის აკადემიის სტადიონზე ხელოვნურსაფარიან მოედანს დააგებენ.

სფფ-ის ცნობით, აკადემიაში უკვე დაწყებულია სამუშაოები, რომლის შედეგად აკადემიას ახალი, სტანდარტების შესაბამისი ხელოვნურსაფარიანი მოედანი ექნება. 14 მარტს, აკადემიას ფედერაციის პრეზიდენტი ლევან კობიაშვილი და ვიცე-პრეზიდენტი კახა ჭუმბურიძე ესტუმრნენ.

"2018 წელს დავაანონსეთ, რომ რამდენიმე ქალაქში ინფრასტრუქტურული პროექტები დაიწყებოდა. მისი ერთ-ერთი ნაწილი სულაქველიძის აკადემიაში ახალი საფარის დაგებაა. ჩვენთვის პრიორიტეტია არა მხოლოდ პროფესიული ფეხბურთის განვითარება, არამედ - ბავშვთა ფეხბურთისაც.

წლეულს, ამ მიმართულებით, სულაქველიძის აკადემიასა და სხვა საფეხბურთო სკოლებში ფეხბურთის ფედერაცია ინფრასტრუქტურულ და მიზნობრივ პროგრამებს დააფინანსებს ეს აკადემიას საშუალებას მისცემს, რომ ბავშვები სრულფასოვნად ავარჯიშონ და თაობები გაზარდონ.

ახალი მოედანი მალე დაიგება და დარწმუნებული ვარ, ეს აკადემიას საშუალებას მისცემს, რომ კონკურენტუნარიანი გახდეს. საბოლოოდ, ეს ისევ ქართულ ფეხბურთს გამოადგება", - ამბობს კობიაშვილი.

კახა ჭუმბურიძე, ფეხბურთის ფედერაციის ვიცე-პრეზიდენტი: "წლების განმავლობაში, ქართული ფეხბურთის ერთ-ერთი ხელისშემშლელი ფაქტორი ბავშვთა ფეხბურთის მწირი ინფრასტრუქტურა იყო. ამ მხრივ ფეხბურთის ფედერაციამ მნიშვნელოვანი ღონისძიებები განახორციელა და ქვეყნის მასშტაბით მრავალი სტადიონი შეიმატა.

განახლებული თენგიზ სულაქველიძის სახელობის აკადემია თბილისს დაამშვენებს. აკადემია თაობებს აქამდეც ზრდიდა, მაგრამ ახლა უფრო განვითარდება და ბევრს გააკეთებს".

თენგიზ სულაქველიძე, აკადემიის დამფუძნებელი და დირექტორი: "ჩემი ოცნება იყო, რომ აქ ხელოვნური საფარი ყოფილიყო და ეს ოცნება ასრულდა.

ეს აკადემიისთვის აუცილებელი იყო, რადგან ჩვენ, ძირითადად, ბუნებრივსაფარიანი მოედნები გვაქვს, ცუდი ამინდის დროს კი ძალიან ვწვალობდით, ბავშვებს სრულყოფილად რომ ევარჯიშათ.

ახალი ხალიჩა რომ გვექნება, ეს დიდი შეღავათი იქნება, რადგან ამიერიდან ვარჯიშები აღარ ჩაგვივარდება. რასაც ახლა აგებენ, ეს ბოლო თაობის საფარია, რომელიც ლამის ბუნებრივის დარია და ასეთზე ბავშვების ვარჯიში გაცილებით უპრობლემოა.

როდესაც მისი მშენებლობა დასრულდება, ჩვენ განვითარების ძალიან დიდი შანსი გაგვიჩნდება. სხვათა შორის, არის ლაპარაკი იმაზეც, რომ ჩვენს მთავარ მოედანზე ახალი საფარი დააგონ, ხოლო ძველი საფარი მეორე მოედანზე გადაიტანონ. ასეთ შემთხვევაში, ჩვენ გვექნება ორი კარგი ბუნებრივი და ერთი ხელოვნური საფარი. ეს იქნება იდეალური მოსამზადებელი და სავარჯიშო კომპლექსი, სადაც ნებისმიერი გუნდი და ასაკობრივი ნაკრები მოახერხებს ვარჯიშს.

ამას გარდა, გვსურს, 1500 მაყურებელზე გათვლილი ტრიბუნები ავაშენოთ, რათა აკადემიის სტადიონზე თუნდაც ლიგა 2-ის გუნდების თამაშები გაიმართოს.

ასეთ შემთხვევაში, სკოლა დანახარჯების ნაწილს ამოიღებს, ეფექტური ორგანიზმი იქნება და განვითარდება. ასეთი დიდი ტერიტორია თბილისში არცერთ აკადემიას არ აქვს. ახლა აქ 200 ბავშვი ვარჯიშობს.

მოედნების მოწყობის შემდეგ 400 ბავშვის მოზიდვის იმედი გვაქვს, სულ კი სკოლის დატვირთვა 700 ბავშვზეა გათვლილი".

ყოველდღიური სპორტული გაზეთი "ლელო"
861
მკითხველის კომენტარები / 0 /
მსგავსი ამბები
რუბრიკის სხვა სიახლეები