სულშერი გადარჩენისთვის იბრძვის. სამი მწვრთნელი, რომელმაც შეიძლება ნორვეგიელი შეცვალოს...

ოლე გუნარ სულშერი ჯერაც "მანჩესტერ იუნაიტედის" მთავარი მწვრთნელია, თუმცა ორი კვირის შემდეგ, შესაძლოა, ყველაფერი შეიცვალოს. "იუნაიტედმა" ბოლო უქმეებზე 0:1 წააგო "ნიუკასლთან" და მე-12 ადგილზე დაეშვა.

მართალია, სულშერს რამდენიმე წამყვანი მოთამაშე აკლდა, მაგრამ ეს ვერ იქნება გამართლება, რადგან ნორვეგიელის გუნდი ამ მოთამაშეებითაც ვერ წყვეტდა ვარსკვლავებს. კლუბის ლეგენდა პოლ ინსი ძალიან გულდაწყვეტილია და მიანიშნებს, რომ ბოლო ორ მატჩში (იგივე "ნიუკასლთან" და ევროპალიგაზე "ალკმაართან") "იუნაიტედმა" მხოლოდ 3-ჯერ დაარტყა კარში...

კლუბის აღმასრულებელი დირექტორი ედ ვუდვორდიც, ვინც სულშერს მარტში 3-წლიანი კონტრაქტი დაუდო, იმედგაცრუებულია და ხვდება, რომ მოთმინებას კარგავს. შეიძლება ითქვას, ეს სანაკრებო პაუზა 46 წლის მწვრთნელისთვის ბოლო შანსია.

ამის მერე "იუნაიტედს" "ლივერპულთან" საშინაო მატჩი ელის და შესაძლო მარცხი სულშერს, დიდი ალბათობით, უმუშევრად დატოვებს. უკვე წერენ მის სამ სავარაუდო შემცვლელზე - ბრენდან როჯერსი, მასიმილიანო ალეგრი და მაურისიო პოჩეტინო.

როჯერსი შესანიშნავად მუშაობს "ლესტერში", თუმცა ყველას ახსოვს, რომ ვერ გაამართლა იმედები "ლივერპულში". როგორც ჩანს, არ არის ადვილი მუშაობა დიდ კლუბში, რომელსაც ამხელა ამბციები და მოთხოვნები აქვს.

"იუვენტუსის" ყოფილ მწვრთნელ ალეგრის შესანიშნავი "სივი" აქვს, თან უმუშევარია და მაინცდამაინც ძვირი არ დაჯდება მისი დაქირავება. ალეგრიმ თქვა, რომ ერთწლიან პაუზას იღებს, მაგრამ... თუ "მანჩესტერ იუნაიტედში" გიხმობენ, გეგმები შეიძლება უცებ შეცვალო...

პოჩეტინოს ცუდი დროება უდგას "ტოტენჰემში". როგორც ჩანს, 47 წლის არგენტინელმა სპეციალისტმა ამ შემადგენლობასთან ერთად მაქსიმუმი გააკეთა. შეიძლება, პოჩეტინო ტიტულებით ვერ დაიკვეხნის, მაგრამ ამ 5 წლის განმავლობაში მან ყველა დაარწმუნა, რომ ნიჭიერი მწვრთნელია.

"ტოტენჰემი" მის ხელში გრანდების მარაქაში გაერია, ითამაშა ჩემპიონთა ლიგის ფინალში... ყოველ შემთხვევაში, ნამდვილად იმაზე მეტია, ვიდრე სულშერის დოსიეში ვკითხულობთ... 

595
მკითხველის კომენტარები / 0 /
მსგავსი ამბები
რუბრიკის სხვა სიახლეები
;