სუმო. გაზაფხულის ბაშო - 2-1 უკვე კარგია

იაპონიის ქალაქ ოსაკაში გრძელდება წლის მეორე სუპერტურნირი - ჰარუ ბაშო. "გაზაფხულის ბაშოზე" მე-3 დღის ორთაბრძოლები გაიმართა. შესანიშნავად იჭიდავა იმპერატორის თასის მფლობელმა ქართველმა სუმოისტმა ლევან გორგაძემ (ტოჩინოშინი).

ტოჩინოშინმა მისთვის მეტად უხერხულ მეტოქეს (აქამდე 6:24 ურთიერთშეხვედრებში), ყოფილ ჩემპიონ კოტოშოგიკუს იორიკირის ილეთით მოუგო. ასე რომ, ტოჩინოშინს 2-1 ბალანსი აქვს.

ბაშოზე 7 სუმოისტია დაუმარცხებელი და მათ შორის დიდი ჩემპიონი კაკურიუა.

მე-4 დღეს ქართველი სუმოისტის მეტოქე მე-3 მაეგაშირა ტაკაკეიშო იქნება (1:2 ურთიერთშეხვედრებში). მისთვის საჩემპიონო იანვრის ბაშოზე ლევანმა ტაკაკეიშოს იორიკირის ილეთით აჯობა. 21 წლის იაპონელი შედარებით "მსუბუქწონოსანია" - 149 კილოს იწონის.

მეორე, ძურიოს დივიზიონში მოიგო თეიმურაზ ჯუღელმა (გაგამარუ), მან მძლავრი ოშიდაშით დოჰიოდან ტაკანოშო განდევნა. გაგამარუს 2-1 ბალანსი აქვს და მას მე-7 ნომერ ცურუგიშოსთან ორთაბრძოლა ელის.

III დღე (მნიშვნელოვანი ბრძოლები): კაკურიუ-ტამავაში (ჰატაკიკომი), ტაკაიასუ-არავაში (ოშიდაში), გოეიდო-ჩიოტაირიუ (ცუკიოტოში), ენდო-მიტაკეუმი (ჰატაკიკომი), ტოჩინოშინი-კოტოშოგიკუ (იორიკირი), იჩინოჯო-ტაკარაფუჯი (იორიკირი).

IV დღე (მნიშვნელოვანი წყვილები): კაკურიუ-არავაში, გოეიდო-ენდო, ტამავაში-ტაკაიასუ, ტოჩინოშინი-ტაკაკეიშო, მიტაკეუმი-იჩინოჯო, ჩიოტაირიუ-ტაკარაფუჯი.

ყოველდღიური სპორტული გაზეთი "ლელო"
1460
მკითხველის კომენტარები / 0 /
მსგავსი ამბები
რუბრიკის სხვა სიახლეები
;