სუმო. ნაგოიას ბაშო. 8-23 ივლისი: გაგამარუს წაგება, ტოჩინოშინი დანებდა

ნაგოიას ბაშოზე ორი მესამედი გაილია, სამი დიდი ჩემპიონისა და ტოჩინოშინის (ლევან გორგაძე) გარეშე სუპერტურნირმა, რომელსაც 10-0 ბალანსით სეკივაკე მიტაკეუმი ლიდერობს, პეწი დაკარგა.

შემორჩენილი ორი ოძეკი, ტაკაიასუ და გოეიდო ლოკალურ მიზნებს შესჭიდებიან (დადებითი ბალანსი), მიტაკეუმის კი კვალში მხოლოდ რიგითი მაეგაშირები მიჰყვებიან.

იაპონიაში უკვე დადასტურდა, რომ ტოჩინოშინი ბაშოს ვეღარ დაუბრუნდება და ის სექტემბრის ბაშოზე კადობანში მოექცევა - ანუ მხოლოდ დადებითი ბალანსით შეძლებს ოძეკის ტიტულის შენარჩუნებას.

"ფეხს ბოლომდე ვერ ვაბიჯებ, ისე გადავაადგილდები. ძალიან მსურდა ჭიდაობა, მაგრამ ეს შეუძლებელია. ჩემი მიზანი სექტემბრის ბაშოსთვის სრულ მზადყოფნაში მოსვლაა", - განუცხადა ლევან გორგაძემ იაპონელ ჟურნალისტებს. 29 ივლისიდან გიფუს პრეფექტურაში სუმოისტებს ზაფხულის ტური ეწყებათ, ტოჩინოშინი მასში ჩართვას კი აპირებს, მაგრამ ალბათ, თავიდან ვერ შეძლებს, ზაფხულის ტურნე 26 აგვისტომდე გაგრძელდება.

ჯურიოს დივიზიონში კვლავ დამარცხდა გაგამარუ (თეიმურაზ ჯუღელი), რომელსაც კოტოიუკიმ აჯობა ცუკიოტოშის ილეთით. გაგამარუს 4-6 ბალანსი აქვს და ჯურიოს პირველ ნომერ ტაკეკაძეს ხვდება.

X დღე

მნიშვნელოვანი ბრძოლები: კაისეი-ტაკაიასუ (კოტენაგე), გოეიდო-შოჰოზანი (ცუკიოტოში), მიტაკეუმი-კაგაიაკი (იორიკირი), იჩინოჯო-იოშიკაძე (კოტენაგე), ტამავაში-კოტოშოგიკუ (კოტენაგე).

სატურნირო მდგომარეობა

10-0: მიტაკეუმი (სეკივაკე)
8-2: ტოჩიოძანი (მაეგაშირა 13), ასანოიამა (მ 13)

XI დღე
მნიშვნელოვანი წყვილები: გოეიდო-დაიშომარუ, ტაკაიასუ-იჩინოჯო, მიტაკეუმი-კაისეი, ტამავაში-იკიოი

ყოველდღიური სპორტული გაზეთი "ლელო"
2997
მკითხველის კომენტარები / 0 /
მსგავსი ამბები
რუბრიკის სხვა სიახლეები
;