სუმო. საქართველოს პრეზიდენტმა ლევან გორგაძე ღირსების ორდენით დააჯილდოვა

საქართველოს პრეზიდენტმა გიორგი მარგველაშვილმა ქართველი სუმოისტი ლევან გორგაძე (იგივე ტოჩინოშინი) ღირსების ორდენით დააჯილდოვა.

ტოჩინოშინს სახელმწიფო ჯილდო მსოფლიო ასპარეზზე საქართველოს წარმოჩენისა და პოპულარიზაციისათვის, პრეზიდენტის სახელით, საქართველოს ელჩმა იაპონიაში ლევან ცინცაძემ გადასცა. მან ეს პატივი იანვრის ბაშოზე იმპერატორის თასის მოგებისთვის დაიმსახურა.

გუშინ ლევან გორგაძემ სოციალური ქსელით გულშემატკივრებს მიმართა:

- დიდი მადლობა მინდა გადაგიხადოთ ყველას, ვინც მგულშემატკივრობდით. მთელი ბაშოს განმავლობაში ვგრძნობდი თქვენს უდიდეს მხარდაჭერას. მომდიოდა უამრავი წერილი, შემოდიოდა უამრავი ზარი და ეს ყველაფერი ძალიან მეხმარებოდა.

დამატებით ძალებს მმატებდა იმის განცდა, რომ ჩემს ზურგს უკან ჩემი ხალხი იდგა. ასე რომ, ეს გამარჯვება ჩვენ ყველას ერთად გვეკუთვნის. ბოდიში მინდა მოგიხადოთ, რომ ყველასთვის ცალკე პასუხი და მადლობის თქმა ვერ მოვახერხე. მინდა იცოდეთ, რომ ძალიან ვაფასებ თითოეული თქვენგანის მხარდაჭერას.

ვფიქრობ, რომ ამ მხარდაჭერისთვის მადლიერების საუკეთესო გამოხატულება ჩემი მხრიდან იქნება ის, რომ გავაგრძელო თავდაუზოგავი ვარჯიში და ვაჩვენო აქ ყველას, თუ როგორ შეგვიძლია ქართველებს ბრძოლა და გამარჯვება.

ასევე, იმედი მაქვს, რომ ეს წარმატება უფრო პოპულარულს გახდის ჩვენს ქვეყანაში სუმოს და ჩემი და გაგას აქტიური სპორტიდან წასვლის შემდეგ, სხვა ქართველები დაიკავებენ ჩვენს ადგილს. ქართველებს ნამდვილად შეგვიძლია კიდევ არაერთხელ გავაოცოთ იაპონიაც და მთელი მხოფლიოც ჩვენი ჭიდაობით.

ყოველდღიური სპორტული გაზეთი "ლელო"
1134
მკითხველის კომენტარები / 0 /
მსგავსი ამბები
რუბრიკის სხვა სიახლეები
;