სუმო. ტოჩინოშინი სეკივაკეად დააწინაურეს

ლევან გორგაძისთვის ბრწყინვალე პერიოდი გრძელდება - ტოჩინოშინის საბრძოლო სახელით სუმოს ელიტაში მოჭიდავე ქართველს იანვრის ბაშოზე ტრიუმფი დაუფასდა - ჯერ პრეზიდენტისგან ღირსების ორდენი მიიღო, შემდეგ კი სუმოს ასოციაციისგან - აღიარება - ახალ რეიტინგში (ბანძუკე) 30 წლის ქართველი სეკივაკედ დააწინაურეს.

სეკივაკე სუმოს იერარქიაში მესამე წოდებაა. ზემოთ მხოლოდ ოძეკი (ჩემპიონი) და იოკოძუნაა (დიდი ჩემპიონი). ტოჩინოშინი დასავლეთის სეკივაკეა. ასე რომ, იგი რეიტინგში მხოლოდ 6 სუმოისტს ჩამორჩება (3 იოკოძუნას, 2 ოძეკის და 1 სეკივაკეს).

დიდი ჩემპიონები კლვავ კაკურიუ, ჰაკუჰო და კისენოსატო არიან. ჩემპიონის ტიტული ტაკაიასუსა და გოეიდოს აქვთ. სეკივაკე ლევანთან ერთად მიტაკეუმია, მე-4 რანგის, კომუსუბის მფლობელები კი იჩინოჯო და ჩიოტაირიუ არიან.

შეგახსენებთ, რომ ტოჩინოშინმა ჰაცუ ბაშო 14-1 ბალანსით მოიგო და პირველი ქართველი გახდა, ვინც იმპერატორის თასი ასწია. ამის შემდეგ მან თებერვალში ტოკიოს კომერციული ტურნირი მოიგო. ქართველი აქამდე მხოლოდ ერთ ბაშოზე ყოფილა სეკივაკეს რანგში - 2016 წლის ივლისში, მაგრამ წოდება მან ვერ შეინარჩუნა.

ძურიოს დივიზიონში მოასპარეზე თეიმურაზ ჯუღელს (გაგამარუ) დადებითი ბალანსი (8-7) ნაკლებად დაუფასდა - იგი ძურიოს მე-5 ნომერია კვლავ, ოღონდ ახლა აღმოსავლეთის, რაც ნახევარი საფეხურით მეტია დასავლეთზე.

წლის მეორე სუპერტურნირი (ჰარუ ბაშო - ანუ გაზაფხულის ბაშო) 11-25 მარტს ქალაქ ოსაკაში გაიმართება.

ყოველდღიური სპორტული გაზეთი "ლელო"
1355
მკითხველის კომენტარები / 0 /
მსგავსი ამბები
რუბრიკის სხვა სიახლეები