სუმო. ტოჩინოშინმა ბაშოს შემდეგ FUJITV-ის თასი მოიგო

კვლავ გაგვახარა ქართველმა პროფესიონალმა სუმოისტმა ლევან გორგაძემ (ტოჩინოშინი) მან ტოკიოში ერთდღიანი კომერციული ტურნირი მოიგო, რომლის სპონსორიც ტელეკომპანია "ფუჯია". ეს ტურნირი ტრადიციულია და წლეულს 42-ედ გაიმართა.

ერთდღიან ტურნირში ასპარეზობის სისტემა განსხვავებულია კლასიკური ბაშოსგან. აქ ყველაფერი ოლიმპიური სისტემითაა. პირველი ეტაპის გავლის შემდეგ (იკიოი დაამარცხა) იმპერატორის თასის მფლობელი ქართველი 1/8 ფინალში დიდ ჩემპიონ ჰაკუჰოს შეხვდა და მასაც აჯობა.

შეგახსენებთ, რომ ოფიციალურ დაპირისპირებებში ლევან გორგაძე მონღოლ იოკოძუნას 25-ჯერ შეხვდა და ყველა ორთაბრძოლა დათმო.

ამ ეტაპის გავლის შემდეგ, 1/4 ფინალში ტოჩინოშინმა ჰოკუტოფუჯის აჯობა და ნახევარფინალში გავიდა, სადაც მას ოკინოუმი ელოდა. კვლავ გამარჯვება და ქართველი "ფუჯის" ტურნირის ფინალში გავიდა.

ფინალში მას მონღოლი სუმოისტი ტამავაში შეხვდა, ტოჩინოშინმა მეხუთე ორთაბრძოლაც მოიგო და ტურნირის გამარჯვებული გახდა.

ტურნირის მოგებისთვის ტოჩინოშინმა 23 ათასი დოლარი მოიგო, ასევე 900-900 დოლარი ყოველ გამარჯვებაზე. ხუთივე ორთაბრძოლა ტოჩინოშინმა იორიკირის ილეთით მოიგო.

ამ კომერციულ ტურნირზე არ მონაწილეობდნენ დიდი ჩემპიონები კაკურიუ და კისენოსატო, რომლებიც ტრავმებს იშუშებენ. ტურნირის ბოლოს თასი მან საკუთარი კლუბის პრეზიდენტისგან მიიღო:

"სულ სხვა შეგრძნებაა, როცა შენი მასწავლებელი გადმოგცემს თასს. ძალიან გახარებული ვარ. ბედნიერი ვარ, რადგან ამ ბოლო დროს ისეთი მიღწევები მაქვს, როგორიც ადრე არ მქონია. მიხარია, რომ ჰაკუჰო დავამარცხე. ახლა დიდი სურვილი მაქვს, ეს ერთხელ მაინც გავიმეორო ჰონბაშოზე", - განაცხადა ქართველმა რიკიშმა.

ამ ტურნირზე ტოჩინოშინი 7-8 კილოგრამით ნაკლებს იწონიდა, ვიდრე ჰაცუ ბაშოზე (166 კილო) - "ახლა უფრო მსუბუქი ვარ, მაგრამ მეტად მობილური და სწრაფი. ოსაკას ბაშოზე იმედი მაქვს, რომ მებრძოლ სულს გამოვავლენ და კარგად ვიჭიდავებ".

შეგახსენებთ, რომ იანვარში ლევან გორგაძემ კარიერაში პირველად მოიგო იმპერატორის თასი. იანვრის ბაშოზე ქართველმა სუმოისტმა 14-1 ბალანსი აჩვენა, მაშინ ტოჩინოშინი ჰაკუჰოს არ შეხვედრია, რადგან მონღოლი ტრავმის გამო ტურნირიდან მოიხსნა.

26 თებერვალს ახალი რეიტინგი გამოქვეყნდება, წლის მეორე ბაშო კი ოსაკაში 11-25 მარტს გაიმართება.

ყოველდღიური სპორტული გაზეთი "ლელო"
2554
მკითხველის კომენტარები / 0 /
მსგავსი ამბები
რუბრიკის სხვა სიახლეები
;