სუმო. 15 მედალი ევროპის ჩემპიონატიდან!

ბულგარეთის ქალაქ პლოვდივში სუმოისტთა ევროპის ჩემპიონატში საქართველოს სპორტსმენებმა (ფედერაციის პრეზიდენტი ლევან ცაგურია) სამ ასაკში 15 მედალი მოიპოვეს, მათ შორის - 4 ოქროსი, 6 ვერცხლისა და 5 ბრინჯაოსი.

21-წლამდელთა 100 კილოგრამ წონით კატეგორიაში გელა ბურჯანაძემ მხოლოდ ფინალური ორთაბრძოლა დათმო და ვერცხლის მედალს დასჯერდა. ასევე, ვერცხლის მედალი დაიმსახურა შამილ გოგოჭურმა, ოღონდ 115 კილოში. ამავე წონაში მესამე იყო ნიკოლოზ სისვაძე. 21-წლამდელებს კიდევ ერთი ვერცხლის მედალი +115 კილოგრამ წონით კატეგორიაში ბადრი ხატისკაცმა მოუტანა - მანაც მხოლოდ გადამწყვეტი პაექრობა წააგო.

საგულისხმოა, რომ ხატისკაცმა და სისვაძემ საქართველოს სპორტულ დელეგაციას კიდევ თითო ბრინჯაო მედალი აბსოლუტურ წონით კატეგორიაში შესძინეს. რაც შეეხება გუნდურ პირველობას, კვარცხლბეკის უმაღლეს საფეხურზე რუსეთის ნაკრები ავიდა, მეორე ადგილი საქართველოს, მესამე კი უნგრეთს ხვდა.

ქართველმა სუმოისტებმა განსაკუთრებით 23-წლამდელებში გამოიჩინეს თავი: ოთხი ოქრო, თითო ვერცხლი და ბრინჯაო - ასეთია მათი შედეგი. ამ ასაკში ჩვენმა 21-წლამდელებმაც იასპარეზეს. 115 კილოში შამილ გოგოჭურმა ყველა მეტოქე დაამარცხა, მათ შორის - ფინალში იტალიელი ენრიკო ძანეტი და პირველი ადგილი დაიკავა. ამავე წონაში მესამე იყო ნიკოლოზ სისვაძე.

+115 კილოში ქართული ფინალი ვიხილეთ: გიორგი ფარადაშვილმა თანაგუნდელი ლაშა ჯელაძე დაამარცხა და ჩემპიონობა მოიპოვა. ვერცხლის მედალი ჯელაძეს ხვდა. აბსოლუტურ წონით კატეგორიაში გიგა გელაშვილმა გაიმარჯვა - ფინალში აზერბაიჯანელ ჯამალ ფეიზიევს აჯობა, ჩვენებს გუნდურშიც ოქროს მედალი ერგოთ. მეორე-მესამე ადგილებზე აზერბაიჯანი და უნგრეთი გავიდნენ.
უფროსებში ზურაბ აქუბარდიამ (+115 კგ) მესამე ადგილი დაიკავა, ხოლო საქართველოს ნაკრები მეორე იყო - ჩვენებს რუსებმა აჯობეს. ბრინჯაოს მედლები უკრაინამ და ბულგარეთმა გაინაწილეს.

-ბულგარეთში მიღწეული შედეგი ჩვენთვის ზღვარი არ არის, - გვითხრა ლევან ცაგურიამ. - ქართველ სპორტსმენებში მეტი პოტენციალია და ეს მომდევნო შეჯიბრებებში გამოჩნდება. მაისის მიწურულს ზურაბ აქუბარდია და გიგა გელაშვილი გერმანიაში მსოფლიოს თასის ეტაპზე გამოვლენ. ნაკრები კი მსოფლიოს ჩემპიონატისთვის მოემზადება. ამ ასპარეზობას კი ივლისში ტაივანი უმასპინძლებს.

2417
მკითხველის კომენტარები / 0 /
მსგავსი ამბები
რუბრიკის სხვა სიახლეები
;