სუპერთასი 'ატლეტიკოსია' [VIDEO]

16 აგვისტი, ესტონეთი
რეალი-ატლეტიკო 2:4 (დ.დ.)
გოლები: დიეგო კოშტა (1, 0:1), ბენზემა (27, 1:1), სერხიო რამოსი (63, პენ, 2:1), დიეგო კოშტა (79, 2:2), საული (98, 2:3), კოკე (104, 2:4)
რეალი (4-3-3): ნავასი - კარვახალი, სერხიო რამოსი, ვარანი, მარსელო - კროოსი (მაიორალი, 104), კასემირო (სებალიოსი, 76), ისკო (ლუკასი, 83) - ბეილი, ბენზემა, ასენსიო (მოდრიჩი, 57).
ატლეტიკო (4-4-2): ობლაკი - ლუკასი, გოდინი, სავიჩი, ხუანფრანი - კოკე, საული, როდრი (ვიტოლო, 71), ლემარი (ტომასი, 90+1) - გრიზმანი (კორეა, 57), დიეგო კოშტა (ხიმენესი, 109).
მსაჯი: ს. მარცინიაკი (პოლონეთი)

ისტორიული სუპერთასი იყო: "ატლეტიკოს" სუპერთასზე აქამდე ორჯერ ჰქონდა ნათამაშები და ორჯერვე მოგებული. საინტერესო იყო, დაირღვეოდა თუ არა "ათლეტების" ლოგიკა.

თავის მხრივ, მადრიდის "რეალს" მშვენიერი შანსი ჰქონდა დასწეოდა "მილანსა" და "ბარსელონას", რომლებსაც 5-5-ჯერ აქვთ მოგებული ევროპის სუპერთასი. "სამეფო კლუბს" - 4 ჯერ.

...ვერ დაეწია. დამატებით დროში "ატლეტიკო" შეუჩერებელი იყო, კარგად გამოაჩინა "რეალის" სუსტი წერტილები დაცვაში, ძირითადში გატანილ ორ გოლს დამატებითში კიდევ ორი მიამატა და 4:2 გაიმარჯვა.

ამ ზაფხულს ორივე გუნდში განხორციელდა ცვლილებები, მაგრამ წინასწარ ცხადი იყო, რომ "ატლეტიკოს" სათამაშო სტრატეგია არ შეიცვლებოდა. ამ გუნდს ხომ ისევ დიეგო სიმეონე წვრთნის, რომელიც ამ მატჩში ტრიბუნებიდან მოძღვრავდა შეგირდებს - შეგახსენებთ, რომ ევროპალიგის ნახევარფინალში, "არსენალთან" მატჩში გააძევეს და სამმატჩიანი დისკვალიფიკაცია მისცეს.

მოკლედ, სიმეონეს "ატლეტიკო" ისევ "სიმეონეს ატლეტიკოა" - აგრესიული, მწყობრი, გუნდი, რომელსაც მოედანზე დაცვისას ცარიელი სივრცე იშვიათად რჩება. სუპერთასის მატჩში ნამდვილად რჩებოდა, რაც სეზონის დასაწყისს უნდა დავაბრალოთ. თუმცა "ატლეტიკო" ზონებს ერთი-ორად კარგად ფარავდა, ვიდრე მისი მეტოქე.

მიმდინარე სეზონში "რეალის" პირველი ოფიციალური მატჩი კიდევ უფრო საინტერესო იყო. სწორედ სუპერთასზე უნდა გამოჩენილიყო, რის შეცვლას აპირებს ზინედინ ზიდანის ნაცვლად მთავარ მწვრთნელად მისული ხულიენ ლოპეტეგი.

...და კიდევ არანაკლებ მნიშვნელოვანი შეკითხვა - რა სახე ექნებოდა "რეალს" კრიშტიანო რონალდოს გარეშე, რომელიც "იუვენტუსში" გადავიდა. პასუხი კი მივიღეთ, მაგრამ მთლად ჩამოყალიბებული არ იყო, ისევე როგორც თავად "რეალი": გაცილებით ლაღად თამაშობდა გარეთ ბეილი, რიგ ეპიზოდებში ლოპეტეგის შეგირდები ისე ირჯებოდნენ, იფიქრებდით, სულაც არ სჭირდებოდათ რონალდო, თუმცა მატჩის ბოლოს ამას ვეღარ ვიტყოდით - კრიშტიანოს ტიპის სუპერფორვარდი გუნდს ნამდვილად სჭირდება. თუნდაც ისეთი, საპირისპირო მხარეს რომ იყო - ატლეტიკოელმა დიეგო კოშტამ ორი გოლიც გაიტანა და დამატებით დროში კიდევ ერთი გოლი შექმნა. ასეთი რამ, ასეთი დონის მატჩებში ბევრს არ შეუძლია. რონალდოს შეეძლო... უფრო სწორად შეუძლია.

პირველი ტაიმის მეორე ნახევარსა და მეორის დასაწყისში "რეალი" კარგად იყო გაშლილი, ფლანგებსაც მშვენივრად იყენებდა სწრაფი შეტევებისთვის და ბურთსაც საკმარისად აკონტროლებდა. თუ ასეთ სტილში გუნდი 90 წუთს ითამაშებს, მისი მომრევი ამ სეზონში ძნელად თუ მოიძებნება, მაგრამ გადამწყვეტ მომენტებში ის "რეალი" არ იყო, რაც ზინედინ ზიდანის ხელში. ზიზუს გუნდი ხომ განსაკუთრებით საშიში ბოლო წუთებზე ან დამატებით დროში იყო.

ამჯერად კი, რეალელებმა 79-ე წუთზე გაუშვეს მეორე გოლი, მატჩი დამატებით დროში გადავიდა, იქ კი "ატლეტიკომ" ისე გაილაღა, როგორც "რეალმა" სამი წლის წინათ ჩემპიონთა ლიგის ფინალში, როცა დამატებითში "ატლეტიკოს" სამი უპასუხო გოლი გაუტანა.

წლეულს კი, დამატებითი "ატლეტიკოსი" იყო - 2:0 და სუპერთასი დიეგო სიმეონემ ჩაიხუტა.



ქრონოლოგია

1 წუთი. "ატლეტიკომ" "რეალს" მისალმება არ დააცადა, დიეგო კოშტა მარჯვენა ფლანგიდან შეიჭრა და უძლიერესი დარტყმით ანგარიში გახნა. რომ არა დარტყმის სიძლიერე, რეალელთა მეკარე კეილორ ნავასი ახლო კუთხეში დარტყმულს უთუოდ აიღებდა.

27-ე წუთი. ტაიმის შუაში "რეალმა" თამაშის სადავეები ხელთ იგდო და გოლიც ლოგიკური იყო: გარეთ ბეილმა ქარიმ ბენზემას მარჯვენა ფლანგიდან თავზე დაასვა ბურთი და ფრანგსაც ანგარიშის გათანაბრება არ გასჭირვებია.

57-ე წუთი. დიეგო სიმეონემ, რომელიც თამაშს თვალს ტრიბუნებიდან ადევნებდა, ანტუან გრიზმანი ანხელ კორეათი შეცვალა. როგორც ჩანს, მწვრთნელმა ჩვენზე უკეთ იცის, რომ მსოფლიოს ჩემპიონატის მოგების შემდეგ არდადეგებიდან დაბრუნებული გრიზმანი ჯერ ვერ არის სათანადო კონდიციებში.

63-ე წუთი. საკუთარ საჯარიმოში ბურთი ხელზე მოხვდა ხუანფრანს. მსაჯმა უყოყმანოდ დანიშნა პენალტი. "რეალის" კაპიტანმა, სერხიო რამოსმა ასევე უყოყმანოდ, მეკარისგან მარცხენა კუთხეში გადაგზავნა ბურთი - 2:1.

79-ე წუთი. ჩავარდა "რეალის" მარცხენა ფლანგი. ხუანფრანმა დანაშაული გამოისყიდა, საჯარიმოში შეჭრის შემდეგ ბურთი ჯერ კორეას გადააწოდა, მისგან დიეგო კოშტას მიუვიდა და 2:2. ძირითადი დრო ასეც დამთავრდა.

98-ე წუთი. ტომასის გადაცემის შემდეგ საულმა მარცხენა იმდენად კარგად დაუხვადრა ბურთს, რომ "რეალის" მეკარე კეილორ ნავასის თავგანწირული ნახტომი ამაო აღმოჩნდა. ბურთი ცხრიანში შეფრინდა.

104-ე წუთი. "ატლეტიკომ" კვლავ მარჯვენა ფლანგიდან შეუტია, ვიტოლოს ზუსტ გადაცემას კოკე გამოეხმაურა და მატჩს საბოლოო წერტილი დაუსვა - 4:2.

1341
მკითხველის კომენტარები / 0 /
მსგავსი ამბები
რუბრიკის სხვა სიახლეები
;