სუპერლიგა. V ტური: ასი პასი

ტურის მოვლენა - სტუმართა ტრიუმფი

სუპერლიგაში გასულ უქმეებზე ოთხი მატჩი გაიმართა და ოთხივეში სტუმრებმა გაიმარჯვეს. მათგან სამი რეგიონის გუნდი იყო - "ბათუმი", "ქუთაისი" და "რუსთავი".

ბოლო ტურებში სამივე მათგანი სატურნირო ცხრილში სამი მუშკეტერივით ერთმანეთის გვერდითაა და ნელ-ნელა მიიწევს ცხრილის სათავისკენ. იქ კი "დინამო" მოკალათებულა, რომელმაც ჩემპიონატის კიდევ ერთ საინტერესო გუნდ "ოლიმპთან" დაძაბულ ბრძოლაში გაიმარჯვა.

ტურის რიცხვი - 100
ზაზა ფაჩულიამ ერთი საიდუმლო გაგვიმხილა - "გოლდენ სტეიტში" პასებს ითვლიანო (საქულე გადაცემებს პლუს თამაშისას შესრულებული პასები). ეს პირდაპირ მიგვანიშნებს, რაოდენ დიდ ყურადღებას ანიჭებენ ოკლენდელები გუნდურ თამაშს. ამიტომაც ადიან ყოველ მატჩში 30 შედეგიან გადაცემამდე.

სუპერლიგის მეხუთე ტურში ოთხივე გამარჯვებულმა გუნდმა გოლდენსტეიტური გუნდურობა გამოიჩინა - 22 პასზე ნაკლები ერთსაც არ ჰქონდა, ჯამში კი გამარჯვებულმა ოთხეულმა ("ქუთაისი", "დინამო", "ბათუმი", "რუსთავი") 100 პასი მიითვალა.

ტურის გმირი - კვარტეტი
თქვენი ნებართვით ოთხივე მატჩიდან თითო საუკეთესოს გამოვარჩევთ. მათ შორის კი საუკეთესოს შერჩევა მკითხველისთვის მოგვინდვია.
"ოლიმპი"-"დინამოს" მატჩში ორმაგი დუბლი მიითვალა ნიკოლა გაჩეშამ - 11 ქულა, 12 მოხსნა.

"მგზავრები"-"ქუთაისის" შეხვედრაში 22 ქულა მოაგროვა გიორგი ბარბაქაძემ, რომელმაც თავისი ძმის წინააღმდეგ მატჩში 8-დან 6 სამქულიანი ჩააგდო.
"სოხუმი"-"რუსთავის" შეხვედრისა და საერთოდ, ტურის ბომბარდირობა იკისრა ქვემოქართლელმა ადამ ბლაჟეკმა - 27 ქულა.
მას ერთი ქულით ჩამორჩა "ბათუმის" ლეგიონერი სპენსერ კოლინზი.

ოლიმპი-დინამო 59:72
15:19, 15:19, 10:15, 19:19
ოლიმპი: გივი ბაქრაძე (8ქ), ჭოჭუა (12ქ), როგავა (2ქ, 9პ, 10მ, 4ჩ), დარბაიძე (2ქ), ოგდენი (14ქ, 17მ), ბოქოლიშვილი (5ქ), გეგი ბაქრაძე (2ქ), ბოლქვაძე, ჰილი (11ქ).
დინამო: გოგოძე (10ქ), ტურპინი (13ქ, 8მ), გაჩეშა (11ქ, 12მ, 5პ), ბოიდი (4ქ, 4პ), ცრნიჩი, ბერიშვილი (9ქ, 5მ, 4პ), ლონდარიძე, შარაბიძე (6ქ), ფაცაცია (8ქ, 5მ), გრძელიძე (11ქ).

ერთმანეთს ცხრილის ლიდერები - დაუმარცხებელი "დინამო" და მხოლოდ 1 წაგების მქონე "ოლიმპი" შეხვდნენ.

ლეონიდ ივატინის გაწვრთნილ ოლიმპელებს შანსი ჰქონდათ, გამარჯვების შემთხვევაში დაკარგული ქულებით დასწეოდნენ "დინამოს", თუმცა კარგად დაბალანსებულ ევროსარბიელზე მოთამაშე ერთადერთ ქართულ გუნდთან ვერას გახდნენ.

ლეონიდ ივატინი ("ოლიმპის" მწვრთნელი):
"დინამოსგან" მიღებული 72 ქულა არაა ცუდი შედეგი, მაგრამ როცა 26-დან 4 სამქულიანს ჩააგდებ, თამაშს ვერ მოიგებ. საერთოდ, ძალიან გასაკვირია, როგორ მოხდა, რომ დინამოელებმა 17 საჯარიმო ესროლეს და ჩვენმა, ახალგაზრდა კალათბურთელებმა მხოლოდ - 5. ეს ჩემთვის გამოცანად რჩება. წავაგეთ იმიტომ, რომ ვერ ჩავაგდეთ ბევრი თავისუფალი სროლები".

მგზავრები-ქუთაისი 74:85
19:18, 14:27, 18:20, 23:20
მგზავრები: სანაძე, დ. ბარბაქაძე (8ქ), ნკალი (10ქ, 7მ), თაქერი, ლომინაშვილი (8ქ), ჯინჭარაძე (19ქ) აკობია, ალხანაიძე (6ქ, 6მ), ნუცუბიძე (10ქ), ქავთარაძე (3ქ), ღურწკაია (2ქ, 3პ), პაუერსი (8ქ, 4პ),
ქუთაისი: დვალიშვილი (14ქ, 11მ), რაითი (7ქ, 4პ), მათიაშვილი (3ქ, 6მ), გ. ბარბაქაძე (22ქ, 6მ, 5პ), ბ. წივწივაძე (3ქ, 3პ), ლომოური (5ქ), ცირეკიძე (5ქ), ბექაური (8ქ, 6მ, 3პ), ჭეიშვილი, ლი (18ქ, 5პ), დ. წივწივაძე.

ამ გუნდებს ცხრილში თანაბარი ქულები ჰქონდათ, თუმცა ქუთაისელებს - ერთით ნაკლები თამაში აქვთ გამართული. შესაბამისად, გამარჯვება ორივე გუნდს ძალიან სჭირდებოდა.შეხვედრა ქუთაისელთა უპირატესობით დაიწყო, თუმცა მეორე პერიოდში "მგზავრებმა" რამდენჯერმე მოახერხეს მცირედით დაწინაურება. სტუმართა გუნდმა მეორე პერიოდის მეორე ნახევარში მატჩის სადავეები ხელთ იპყრო და თამაშის ბოლომდე აღარ დაუთმია.

ბუბა ბერიშვილი, ("მგზავრების" მთავარი მწვრთნელი):
"ბევრი შეცდომა დავუშვით და იმედი მაქვს, ახლო მომავალში გამოვასწორებთ. კვირაში, ფაქტობრივად, 3 თამაში გვიწევს, ბიჭებისთვის იოლი სულაც არ არის. დღევანდელ თამაშში გვქონდა კარგი მომენტები, თუმცა ვერ მოვახერხეთ გამარჯვება. ვეცდებით, უფრო მეტად მოვემზადოთ ინდივიდუალურად და უკეთესი თამაში ვაჩვენოთ."

სოხუმი-რუსთავი 62:94
11:25, 16:34, 14:22, 21:13
სოხუმი: კვეტენაძე (6მ, 3პ), ჩელოვანი (14ქ, 8მ), ლუცენკო (4ქ), ბაიდა (7ქ), ვოლერი (11ქ), მ. რევაზაშვილი (13ქ), ლ. რევაზაშვილი (2ქ), ბულიავა, ზუზაძე, პრიმაკი (4ქ).
რუსთავი: ცეკვავა (10ქ, 6მ, 4პ), ჩაჩანიძე (12ქ), ბლაჟეკი (27ქ, 9მ, 5პ, 3ჩ), ნელსონი (14ქ, 5მ, 5პ), კრუკი (12ქ, 10მ, 3პ), ხმელიძე (1ქ), ლორთქიფანიძე, წიქარიშვილი, გოგობერიშვილი (9ქ), ბარამიძე, კუპერი (7ქ, 5მ), ბერნარდი (2ქ, 3პ).

"სოხუმისა" და "რუსთავის" მატჩი ვერ გამოდგა მთლად საინტერესო. სტუმართა გუნდი მოწოდების სიმაღლეზე იდგა და მატჩის ბედი პირველივე პერიოდში გაარკვია. საბოლოოდ კი რუსთაველებმა 94:62 მოიგეს და მომავალ ტურში "ბათუმთან" მატჩის წინ ოპტიმისტური განწყობა შეიქმნეს.

რამაზ გოგობერიშვილი, ("რუსთავის" მთავარი მწვრთნელი):
"სოხუმი" ანგარიშგასაწევი ძალაა, თუმცა უნდა აღვნიშნო, რომ დაცვაში ძალიან მოვინდომეთ და თავდასხმაშიც უფრო დალაგებულად ვითამაშეთ. დიდი სხვაობაც ამან განაპირობა".

მარნეული-ბათუმი 78:92
14:14, 24:18, 12:35, 28:25
მარნეული: ბიწაძე (6ქ, 3პ), რეი (13ქ, 5მ), ათუაშვილი (4ქ), ნილი (11ქ, 8პ), შვეცი (17ქ), ანთაძე (5ქ), ლეჟავა (4ქ), ელიაძე, ლობჟანიძე (6ქ, 3პ), ბონდუმელი (12ქ, 5მ, 3პ).
ბათუმი: ქადარია (3ქ), კ. ტომარაძე (3ქ, 4პ), სტეფანიშინი (19ქ), კოლინზი (26ქ, 7მ, 6პ), ანდრეშევიჩი (14ქ, 11მ), ყველაშვილი (2ქ), მაისურაძე (3ქ), თენიეშვილი (4ქ, 3პ), შემოსიუკი (18ქ, 5პ).

მატჩი მარნეულში უნდა გამართულიყო, თუმცა ქვემოქართლური გუნდის ტექნიკური პრობლემების გამო შეხვედრას თბილისის ოლიმპიურმა სასახლემ უმასპინძლა და ნომინალური მასპინძელიც "დელტა" გახლდათ.

ქვემოქართლურ გუნდში მთავარი მწვრთნელის დებიუტი შედგა. თემურ კანკიამ, რომელიც აქამდე "მგზავრების" მეორე მწვრთნელი იყო, "დელტა" ჩაიბარა და პირველ შეხვედრაში ძლიერ "ბათუმს" დაუპირისპირდა. მარნეულელებმა კარგად ჩაატარეს პირველი ნახევარი და დიდ შესვენებაზეც ლიდერის ამპლუაში მივიდნენ - 38:32.

შესვენებიდან დაბრუნებული ბათუმელები სულ სხვა შემართებით ათამაშდნენ და ჩამორჩენა 2 წუთში გააბათილეს, პერიოდის ბოლომდე კი გვარიან უპირატესობასაც დაეუფლნენ. ამერიკელი სპენსერ კოლინზისა და უკრაინელი ლეგიონერების შორი სროლებით, ასევე სერბი სტეფან ანდრესევიჩის შედეგიანი ფარქვეშ თამაშით ზღვისპირელებმა მესამე ათწუთეული 35:12(!) მოიგეს და მატჩის ბედიც გადაწყვიტეს.

თემურ კანკია, ("მარნეულის" მთავარი მწვრთნელი):
"სერიოზული მეტოქე გვყავდა და ნათლად გამოჩნდა, რომ გუნდი ჯერჯერობით არ არის მზად 40 წუთის სათამაშოდ. პირველი ნახევარი კარგი გამოგვივიდა. განწყობის ხარჯზე შეიძლება თამაში, თუმცა როგორც კი ცოტა დავიღალეთ, ეს შედეგსაც დაეტყო. ბევრი შრომა მოგვიწევს, რომ გამოვასწოროთ."

ფოტო: superleague.ge 

ყოველდღიური სპორტული გაზეთი "ლელო"
627
მკითხველის კომენტარები / 0 /
მსგავსი ამბები
რუბრიკის სხვა სიახლეები