სუპერლიგა. ბექა ბექაური 'დელტაში' ითამაშებს - ინტერვიუ

ბექა ბექაური კარიერას "დელტაში" გააგრძელებს. სუპერლიგის შარშანდელმა დებიუტანტმა კიდევ ერთი კარგი მოთამაშით გააძლიერა შემადგენლობა. საქართველოს ნაკრების წევრი ახალ გუნდში სეზონის ბოლომდე დარჩება.

ბექა ბექაური გამოცდილია. პროფესიული კარიერა დაიწყო 2009/2010 წლების სეზონში სამედიცინო აკადემიის გუნდში და ბოლო წლებში (2014-დან 2018-მდე) "ქუთაისში" იყო. ექვს სეზონში ბექაურის სტატისტიკა 9.6 ქულა და 6.8 მოხსნა იყო.

კლუბის პრესცენტრის ხელმძღვანელმა ზურაბ თალაკვაძემ ბექასთან ინტერვიუ ჩაწერა. "დელტაში"" ბექა ერთ-ერთ ლიდერად მოდის.

- რატომ "დელტა"?

- კლუბის ერთ-ერთი დამფუძნებელი და კაპიტანი ზვიად ანთაძე ჩემი ნათესავია და ეს გადამწყვეტი ფაქტორი იყო. გუნდიც საკმაოდ საინტერესო გვყავს. კარგ სეზონს ველოდები.

- რას მიიღებს "დელტა" თქვენგან?

- ყველაფერს, რაც შემიძლია, მაქსიმუმს.

- კარგ ფორმაში შეხვედით?

- ბოლო წლებში ასეთ კარგ ფორმაში არ ვყოფილვარ.

- მოგწონთ "დელტას" ეს შემადგენლობა?

- კი, ძალიან კარგი შემადგენლობა გვყავს. დაბალანსებული გუნდია. გვყავს ორი თითქმის თანაბარი ხუთეული.

- შეძლებს "დელტა" მედლებისთვის ბრძოლას?

- ერთ-ერთი პრეტენდენტი იქნება. ქართველებიც და ლეგიონერებიც ძალიან კარგად გვყავს შერჩეული.

- სუპერლიგის სხვა გუნდების სიახლეებს ეცნობით?

- იშვიათად.

- სუპერლიგის საუკეთესო მაღლები დაასახელეთ.

- პირველ რიგში, აკაკი დვალიშვილი. ილია ლონდარიძეც. "დელტას" მაღალი - გეგი ბაქრაძე.

- ვინ გიქმნით ყველაზე მეტ პრობლემას მაღლებიდან?

- გამორჩეულად... არავინ. არავისთან არ მიჭირს თამაში.

- საინტერესოა ლექსო ლაფანაშვილთან მუშაობა?

- ლექსოს დიდი ხანია ვიცნობ. ერთად ვიყავით შსს-ში. პატივს ვცემ. როგორც მწვრთნელი, საკმაოდ საინტერესოა.

- "ქუთაისთან" ერთად ზედიზედ ორი ფინალი წააგეთ. მიზეზი?

- ცოტა რთულია მიზეზებზე საუბარი. ბოლო ფაზაში ყოველთვის რაღაც გვაკლდა.

- საყვარელი კალათბურთელები...

- ვიქტორ სანიკიძე, ლებრონ ჯეიმსი.

- საყვარელი ფილმი...

- არცერთი გამორჩეულად.

- საყვარელი ფერი...

- ნაცრისფერი.

- საყვარელი ნაწარმოები...

- მებრძოლთა კლუბი.

ყოველდღიური სპორტული გაზეთი "ლელო"
273
მკითხველის კომენტარები / 0 /
მსგავსი ამბები
რუბრიკის სხვა სიახლეები