სუპერლიგა. დღეს ფინალური სერია იწყება: ქუთაისი თუ დელტა? 

სუპერლიგის ფინალური სერია იწყება. 23 და 24 მაისს ქუთაისის სპორტის სასახლე საწყის 2 მატჩს უმასპინძლებს, რომელშიც ერთმანეთს საკალათბურთო კლუბები „ქუთაისი“ და „დელტა“ შეხვდებიან. 

იმერული კლუბი სუპერლიგის მოქმედი ვიცე-ჩემპიონია. ქუთაისელებმა შარშანდელი ფინალი „დინამოსთან“ წააგეს, რომელიც მიმდინარე გათამაშების ნახევარფინალურ სერიაში 3:2 დაამარცხეს. ქუთაისელები საქართველოს ჩემპიონები 2016 წელს გახდნენ, ხოლო 2017 და 2018 წლებში „დინამოსთან“ ფინალები წააგეს და ვერცხლის მედლებს დასჯერდნენ. 

ფინალური სერიის მეორე მონაწილე „დელტა“ სუპერლიგაში მეორე სეზონია ასპარეზობს. ლექსო ლაფანაშვილის გაწვრთნილმა გუნდმა შარშანდელ რეგულარულში მე-8 ადგილი დაიკავა და მეოთხედფინალური სერია სწორედ „ქუთაისთან“ წააგო. მიმდინარე სეზონში დელტელები სულ სხვა რელსებზე დგანან. გუნდმა დუდუ დადიანის მემორიალი მოიგო, მიხეილ ქორქიასა და ზურაბ საკანდელიძის ხსოვნის ტურნირის ფინალში ითამაშა, ხოლო თასის გათამაშებაში ნახევარფინალამდე მივიდა.

„დელტამ“ მიმდინარე სუპერლიგის რეგულარულ ჩემპიონატში მესამე ადგილი დაიკავა და ფინალურ სერიაში პირველადგილოსან „ქუთაისთან“ მოედნის უპირატესობით ვერ ისარგებლებს.

სერიის პირველ და მეორე მატჩებს ქუთაისელები უმასპინძლებენ, მესამე შეხვედრა კი 27 მაისს, თბილისში გაიმართება, სადაც მასპინძელი „დელტა“ იქნება. საჭიროების შემთხვევაში, სერიის მე-4 შეხვედრა 28 მაისს თბილისში, ხოლო მე-5, გადამწყვეტი მატჩი 30 მაისს, ქუთაისში გაიმართება.

ყოველდღიური სპორტული გაზეთი "ლელო"
352
მკითხველის კომენტარები / 0 /
მსგავსი ამბები
რუბრიკის სხვა სიახლეები
;