სუპერლიგა. ვინც იგებს ფარს, ის იგებს თამაშს

22 დეკემბერი

 დელტა-თსუ ჰიუნდაი     79:72

25:12, 18:15, 20:24, 16:21

დელტა: ფხაკაძე (12ქ, 6მ, 3პ), მეგენეიშვილი, ბაქრაძე (11ქ, 7მ), ანთაძე (3ქ), მაჩალაძე, ბრანდენბერგი (8ქ, 3პ), დრამრაითი (11ქ, 3პ), ლობჟანიძე (6ქ), ბექაური (15ქ, 9მ, 3პ, 5დ), შვეცი (13ქ, 5მ).

თსუ-ჰიუნდაი: მეტრეველი (10ქ, 6მ), სანაძე (11ქ, 5მ), ვოზოლა (16ქ), კორსანტია (8ქ, 19მ, 4პ, 5ჩ), ბოლქვაძე, ფევაძე (9ქ), მილიკენი (12ქ, 5მ, 4პ), პეტრიჩი (2ქ), კოკა ტომარაძე (4ქ, 3პ), ჯაფარიძე.

ოლიმპიურ სასახლეში თბილისური გუნდები - „დელტა“ და „თსუ-ჰიუნდაი“ შეხვდნენ. სუპერლიგის ერთ-ერთმა ლიდერმა „თსუ-ჰიუნდაიმ“ სუსტი მატჩი ჩაატარა და მიმდინარე სეზონში მე-2 დამარცხება განიცადა. თავის მხრივ, „დელტამ“ ჩემპიონატში მე-4 გამარჯვება მოიპოვა.

„დელტამ“ თამაში სწრაფად და რაც მთავარია, შედეგიანად დაიწყო. სამქულიანებითა თუ სწრაფი პირველი შეტევებით ლექსო ლაფანაშვილის გუნდი ქულას ქულაზე იხვეჭდა და პირველი პერიოდი 25:12 მოიგო, ხოლო დიდი შესვენებისთვის ლიდერობა 16 ქულამდე გაზარდა - 43:27.

ნიკოლოზ ჩერქეზიშვილმა რამდენჯერმე აიღო წუთშესვენება, თუმცა პირველ ნახევარში თსუ-ჰიუნდაელთა თამაში ვერ გამოასწორა. მესამე პერიოდში „დელტას“ ლიდერობამ 20 ქულას გადააჭარდა, რაც უკვე „დელტას“ გამარჯვებას ნიშნავდა. მართალია, დებიუტანტი ბენჯამინ ვოზოლასა და მის თანაგუნდელთა მონდომებით ბოლო პერიოდში „თსუ-ჰიუნდაიმ“ 5 ქულამდე შეამცირა ჩამორჩენა, თუმცა თამაშის მოსაგებად ეს საკმარისი არ აღმოჩნდა. „დელტას“ კალათბურთელებმა გააზრებულად ჩაითამაშეს მატჩის ბოლო წუთები და გამარჯვებამდე მივიდნენ  79:72.

23 დეკემბერი

 კაკტუსი-მგზავრები         88:102

19:27 29:29 20:31 20:15

კაკტუსი: ჩიკვილაძე (17ქ, 5მ), სპენსერი (23ქ, 6მ), ნილი (3ქ), ბოისა (3ქ), ზაქრაძე (7ქ, 5მ), ამონაშვილი, მაკგაუჯი (17ქ, 5მ).

მგზავრები: ბოუი (19ქ, 8მ, 8პ), არმსტრონგი (22ქ, 6მ, 3პ, 3ჩ), ჯინჭარაძე (26ქ, 9მ, 5პ), დ. ქავთარაძე, ჩაჩანიძე (12ქ), გ. ქავთარაძე (13ქ), ბეშქენაძე (2ქ), ყეინაშვილი, მუსოკო (8ქ, 9მ).

23 დეკემბერს, მე-7 ტურის მატჩში ერთმანეთს ცხრილის შუაში მყოფი „მგზავრები“ და ერთ-ერთი აუტსაიდერი „კაკტუსი“ შეხვდნენ. ბუბა ბერიშვილის გაწვრთნილმა „მგზავრებმა“ საბოლოოდ დამაჯერებელი გამარჯვება მოიპოვა.

„კაკტუსმა“ სუპერლიგა „ოლიმპის“ ძლევით დაიწყო, თუმცა შემდეგ ზედიზედ 6 მარცხი განიცადა და ამ ეტაპზე უმაღლესი ლიგიდან გავარდნის ერთ-ერთი კანდიდატია. არჩილ ჟღენტის გუნდმა ორი ამერიკელი გაუშვა და ჯერჯერობით ერთი ახალი ლეგიონერი ჩამოიყვანა - დელანო სპენსერი, რომელმაც „მგზავრებთან“ ყველაზე მეტი, 37:14 წუთი ითამაშა და 23 ქულა მოაგროვა. მისი სამქულიანების პროცენტულობა არასახარბიელო იყო - 9 ცდიდან მხოლოდ 1 ჩააგდო, თუმცა ეტყობა, რომ ყოჩაღია და კაკტუსელებს გამოადგებათ.

მატჩის ბედი მესამე პერიოდში გადაწყდა. დიდი შესვენებისთვის „მგზავრები“ 8 ქულით იგებდნენ, მომდევნო პერიოდში კი 31:20 იმარჯვეს და გადამწყვეტი ათწუთეულის წინ 19 ქულით გალიდერდნენ. თამაში ისე ჩამთავრდა, „მგზავრების“ მოგებას საფრთხე არ დამუქრებია.

23 დეკემბერი

 რუსთავი-ტიტები 81:86

21:24, 22:21, 24:22, 14:19

რუსთავი: ჰემილტონი (10ქ, 5მ), ლორთქიფანიძე (3ქ), ტაბაღუა, ხმელიძე (6ქ), გოგობერიშვილი, ბენქსი (17ქ, 6მ), ბრაიანტი (34ქ, 8პ, 3ჩ), მოავადი (7ქ, 5მ), გოგალაძე (4ქ).

შსს აკადემია-ტიტები: ბაბუნაშვილი (3ქ, 3პ, 5მ), მილსი (9ქ), ლეჟავა (11ქ, 6მ), ლონდარიძე (25ქ, 8მ, 3პ), აფჩერჩი (7ქ, 8პ), ალმეიდა (14ქ, 13მ), შარაბიძე (17ქ, 6მ).

„რუსთავმა“ ვერც „ტიტები“ დაამარცხა. ქვემოქართლურმა კლუბმა სეზონი არადამაჯერებლად დაიწყო, რის გამოც ხელმძღვანელობამ რამდენიმე ლეგიონერი გამოცვალა. ახალ კალათბურთელს კი ნებისმიერ გუნდში ადაპტაცია სჭირდება, რაც ჯერ სრულყოფილად ვერ გაიარეს რუსთაველთა ახალწვეულებმა და სეზონში მეექვსედ დამარცხდნენ.

„ტიტებს“ რუსთაველთა ყოფილი დამრიგებელი დავით უსტიაშვილი წვრთნის, რომელსაც ეროვნულ ნაკრებში (იგორ კოკოშკოვის ასისტენტად) მუშაობის მრავალწლიანი გამოცდილება აქვს. მისი ხელმძღვანელობით „ტიტები“ საინტერესო კალათბურთს უჩვენებს და 3-3 მოგება-წაგებით სატურნირო ცხრილის შუაშია. თუმცა მას სხვა გუნდებთან შედარებით ნაკლები მატჩი აქვს გამართული. შეგახსენებთ, რომ მე-6 ტურის მატჩი, „დელტა“-“ტიტები“ გუნდების ურთიერთშეთანხმების საფუძველზე გადაიდო.

რუსთაველებმა სტუმრებს 11 სამქულიანი ჩაუგდეს (30 მცდელობიდან). ამ ციფრებიდან ჩანს, რომ ქვემოქართლელებმა აქცენტი პერიმეტრზე გადაიტანეს. ამის ერთ-ერთი მიზეზი შეიძლება ისიც იყო, რომ „ტიტებმა“ საკუთარი ფარქვეშეთი კარგად გაამაგრა - მასპინძლებს მოხსნებში 48:29 აჯობა. მატჩის ბომბარდირი კი თბილისელთა მეფარე ილია ლონდარიძე გახდა - 25 ქულა.

მეშვიდე ტურის დარჩენილი ორი მატჩი 24 დეკემბერს გაიმართება: „ოლიმპი“ „ქუთაისს“ უმასპინძლებს, ხოლო „ბათუმი“ - „დინამოს“.

          გუნდი                    თ         მ          წ          ქ

  1. თსუ-ჰიუნდაი           7          5          2          12
  2. მგზავრები                7          4          3          11
  3. ქუთაისი                  6          5           1          11
  4. დელტა                    6          4           2          10
  5. დინამო                    6          4           2          10
  6. ოლიმპი                   6          3           3           9
  7. ტიტები                   6           3           3           9
  8. ბათუმი                   6           2           4           8
  9. რუსთავი                 7            1          6           8
  10. კაკტუსი                  7            1          6           8
ყოველდღიური სპორტული გაზეთი "ლელო"
795
მკითხველის კომენტარები / 0 /
მსგავსი ამბები
რუბრიკის სხვა სიახლეები
;