სუპერლიგა. რუსთავმა დინამო დაამარცხა - ზუროსი დააკვირდა

სანაკრებო ფანჯრის წინ, სუპერლიგის მე-19 ტურში, საინტერესო მატჩები გაიმართა. ტური დაიწყო აუტსაიდერთა მატჩით და დასრულდა ფავორიტთა რუსთავური დაპირისპირებით. 17 თებერვალი, თბილისი

სოხუმი-მარნეული 75:97
28:27, 25:27, 14:23, 18:20

სოხუმი: კვეტენაძე (11ქ), დანიელსი (18ქ), ათუაშვილი (16ქ, 9მ), ლ. რევაზაშვილი (5ქ), ვოლერი (10ქ, 5მ, 5პ), პრიმაკი (12ქ, 8მ), ბულიავა (3ქ), ზუზაძე (3ქ), მ. რევაზაშვილი.

მარნეული: ბიწაძე (2ქ), ნილი (21ქ, 6პ), ვახანია (6ქ), რეი (22ქ, 5მ), ფაცაცია (9ქ, 8პ, 11მ), ლობჟანიძე (12ქ, 5მ), ანთაძე (5ქ, 5მ), ალდერმანი (3ქ), შვეცი (17ქ, 9მ, 5პ).

სოხუმელებს მიმდინარე ჩემპიონატში მხოლოდ 1 მოგება აქვთ და სეზონის მსვლელობისას არაერთი ტრანსფერი განახორციელეს ოპტიმალური შემადგენლობის ძიებაში, მაგრამ სასურველ შედეგს ვერ მიაღწიეს.

"მარნეული" ლიდერთა რიცხვს არ განეკუთვნება და თუკი სუპერლიგაში დარჩენის ამბიცია ჰქონდა, სოხუმს "დელტა" უნდა დაემარცხებინა, მაგრამ თემურ კანკიას გაწვრთნილმა ქვემოქართლურმა გუნდმა შესანიშნავად ითამაშა, განსაკუთრებით მეორე ნახევარში და შეხვედრა 22 ქულის სხვაობით მოიგო.

- მარნეული ჩვენზე კარგი გუნდია და მათ სათანადო წინააღმდეგობა ვერ გავუწიეთ. ამ წაგებით ფაქტობრივად დავკარგეთ სუპერლიგაში დარჩენის შანსი, რაც ძალიან სამწუხაროა, თუმცა დარჩენილ მატჩებში მაქსიმუმს ვეცდებით, - განაცხადა "სოხუმის" მთავარმა მწვრთნელმა გია კაზანჯიანმა.

17 თებერვალი, თბილისი

კაკტუსი-ბათუმი 70:61
22:16, 13:15, 15:20, 20:10

კაკტუსი: პარკსი (13ქ, 3პ), ბოისა (6ქ), ტურძელაძე (7ქ), ბრიჯმენი (8ქ, 10მ), ჯონსონი (12ქ, 7მ), ლომიძე (8ქ, 5მ), მიჩელი (11ქ, 12მ), გოგალაძე (5ქ).

ბათუმი: ჩილდრესი (16ქ, 7მ, 7პ), სტეფანიშინი (7ქ, 5მ), ტომარაძე (6მ), თენიეშვილი (2ქ, 8მ), ყველაშვილი (1ქ), კოლინზი (12ქ), მაისურაძე, შემოსიუკი (10ქ, 7მ), ანდრეიევიჩი (13ქ, 19მ).

სუპერლიგის ცხრილის შუაში, მეზობლად მყოფი გუნდების მატჩი დაძაბული გამოდგა. "კაკტუსსაც" და "ბათუმსაც" გამარჯვება ძალიან სჭირდებოდათ. ბათუმელებს მოგება "კაკტუსთან" ათანაბრებდა, თუმცა ბოლო წუთებზე ძალები აღარ ეყო და შეხვედრა 9 ქულით დათმო.

"კაკტუსის" მთავარი მწვრთნელი არჩილ ჟღენტი კმაყოფილი იყო:

- ბოლო მატჩებისგან განსხვავებით, ჩვენმა გუნდმა დაცვაში კარგად ითამაშა. შეტევაში გვქონდა ბევრი შეცდომა, მაგრამ კარგია, რომ ყველაფერი მოგებით დასრულდა და სატურნირო მდგომარეობის გაუმჯობესების საშუალებაც მოგვეცა.

17 თებერვალი, თბილისი

მგზავრები-ოლიმპი 81:87
20:20, 22:22, 19:23, 20:22

მგზავრები: ბოუი (33ქ, 7მ, 4ჩ), ჯინჭარაძე (14ქ, 5მ, 3პ), სტეფორდი (7ქ, 3პ), ნუცუბიძე (9ქ), ლომინაშვილი (7ქ, 5მ), ქავთარაძე, ნკალი (1ქ, 5მ), ფხაკაძე (10ქ, 3პ).

ოლიმპი: გივი ბაქრაძე (23ქ, 6მ, 6პ), ალი (10ქ, 5პ), ბოლქვაძე, როგავა (3ქ), გეგი ბაქრაძე (12ქ, 8მ), ბოქოლიშვილი (13ქ, 3პ), დარბაიძე (9ქ), ჰილი (13ქ, 3პ), გიორგაძე, მარტინესი (4ქ).

ოლიმპელებმა სეზონი შედეგიანად დაიწყეს და ლიდერთა შორისაც იყვნენ, თუმცა შემდეგ უკრაინელი ლეონიდ ივატინის გაწვრთნილ გუნდს ტრავმებმა დარია ხელი და სატურნირო მდგომარეობა გაუუარესდა.

ბოლო მატჩებში "ოლიმპმა" რამდენიმე მნიშვნელოვანი გამარჯვება მოიპოვა და "მგზავრებთან" მატჩიც აუცილებლად მოსაგებთა რიცხვს განეკუთვნებოდა.

თავის მხრივ, "მგზავრებისთვის" არანაკლები მნიშვნელობა ჰქონდა აღნიშნულ შეხვედრას. ბუბა ბერიშვილის გუნდი ცხრილის ქვედა ნახევარშია და მიუხედავად იმისა, რომ ლიგიდან გავარდნა არ ემუქრება, იმედიანად რომ იყოს, საშუალო გაქანების გუნდების დამარცხება მართებს.

"მგზავრებმაც" ყველაფერი გააკეთეს მოსაგებად, ბოლო პერიოდამდე ტოლ-სწორად ებრძოდნენ "ოლიმპს", თუმცა საბოლოოდ მაინც დამარცხდნენ - 81:87.
ოლიმპელთა მეორე მწვრთნელმა დავით როგავამ ორი ბაქრაძე გამოარჩია:

- თანდათან ფორმაში შევდივართ, გვიბრუნდებიან ტრავმირებული მოთამაშეები. არ შეიძლება არ აღინიშნოს გეგი და გივი ბაქრაძეების გამორჩეულად კარგი თამაში. შეიძლება ითქვას, გივი ბაქრაძემ ამ სეზონში საუკეთესო თამაში ჩაატარა. ის თავის პოზიციაზე სუპერლიგაში ერთ-ერთი საუკეთესოა.

17 თებერვალი, რუსთავი

რუსთავი-დინამო 80:74
17:14, 18:26, 16:20, 29:14

რუსთავი: ხმელიძე (10ქ), ბლეიზეკი (21ქ, 7მ, 6პ, 4ჩ), ცეკვავა (12ქ, 6პ), ჩაჩანიძე (10ქ), ნელსონი (19ქ, 12მ), ბერნარდი (4ქ), კუპერი (4ქ).

დინამო: ლი (18ქ, 6მ, 3პ), შარაბიძე, ბოიდი (16ქ), გრძელიძე, ლონდარიძე (4ქ), ტურპინი (12ქ, 14მ), ბერიშვილი (16ქ, 10მ), გოგოძე (2ქ), მიტროვიჩი (6ქ).

ტურის ცენტრალური მატჩი რუსთავში გაიმართა. მას, ისევე როგორც თბილისურ შეხვედრებს, ნაკრების მთავარი მწვრთნელი ილიას ზუროსი ესწრებოდა.

მოქმედ ჩემპიონ "დინამოს" "რუსთავთან" გამარჯვება ამ გუნდთან ქულათა სხვაობის აღმოსაფხვრელად სჭირდებოდა. თავის მხრივ, რუსთაველებს მოგება ცხრილში მეორე ადგილს უმყარებდა და "დინამოსთან" სხვაობას სამ ქულამდე ზრდიდა.

მთავარი ამბები მეორე ტაიმში მოხდა. მესამე პერიოდში დინამოელებმა დაცვისა და სწრაფი, ზუსტი შეტევების შედეგად 14-ქულიან ლიდერობას მიაღწიეს. რუსთაველები დროულად გამოერკვნენ და პერიოდის ბოლომდე ჩამორჩენა 9 ქულამდე შეამცირეს.

გადამწყვეტი მეოთხედი მასპინძლებმა კიდევ უფრო შედეგიანად დაიწყეს - შორი სროლებისა და ფარქვეშ შესვლების წყალობით, ქვემოქართლელებმა ჩამორჩენა აღმოფხვრეს და საფინალო სირენამდე 6 წუთით ადრე ანგარიში გათანაბრდა - 64:64. რის შემდეგაც მასპინძლებმა ტემპი არ დააგდეს და მნიშვნელოვან გამარჯვებას მიაღწიეს.

ფიბა-ს სანაკრებო ფანჯრის გამო სუპერლიგაში მცირე შესვენება გამოცხადდება და თამაშები 1 მარტიდან განახლდება.

გუნდი თ მ წ სხ ქ
1. ქუთაისი 18 15 3 1544-1358 33
2. რუსთავი 19 14 5 1567-1449 33
3. ოლიმპი 19 11 8 1490-1424 30
4. კაკტუსი 19 11 8 1527-1549 30
5. დინამო 18 11 7 1481-1358 29
6. ბათუმი 19 9 10 1438-1369 28
7. მარნეული 19 6 13 1522-1641 25
8. მგზავრები 18 6 12 1379-1528 24
9. სოხუმი 19 1 18 1428-1700 20

ყოველდღიური სპორტული გაზეთი "ლელო"
569
მკითხველის კომენტარები / 0 /
მსგავსი ამბები
რუბრიკის სხვა სიახლეები
;