სუპერლიგა 1/2 ფინალი. რუსთავმა ქუთაისი ქუთაისში დაამარცხა

ქუთაისი-რუსთავი 75:81
17:16, 20:20, 14;14, 24:31
ქუთაისი: ვრაითი (23ქ.5პ), წივწივაძე (9ქ,7მ,6პ), ლომოური (2ქ), დვალიშვილი (17ქ,9მ), ბექაური (6ქ.7მ), ბაბუნაშვილი (1ქ), ცირეკიძე, ბარბაქაძე (11ქ), მათიაშვილი (6ქ),
მწვრთნელი: კოტე ტუღუში
რუსთავი: ბლეიზეკი ( 29ქ,7პ), ცეკვავა (7ქ), ჩაჩანიძე (11ქ), ნელსონი (21ქ, 6მ), ოზაიკვუვუომვანი (6ქ), გუგავა (4ქ), ლორთქიფანიძე, ბერნარდი (3ქ),
მწვრთნელი: რამაზ გოგობერიშვილი
მსაჯები: ზდრავკო რუტესიჩი (მონტენეგრო), დავით ბერეკაშვილი, მიხეილ ვართანოვი

"ქუთაისსა" და "რუსთავს" შორის გამართული პირველი ნახევარფინალური შეხვედრა რუსთაველთა გამარჯვებით დასრულდა. მატჩი საინტერესო და დრამატული გამოდგა, გამარჯვებულის ბედი კი მხოლოდ ბოლო წამებზე გაირკვა.

შეხვედრის დებიუტში "რუსთავი" უკეთ გამოიყურებოდა და ძირითადად ტაირელ ნელსონის კარგი თამაშის წყალობით 6 ქულით წინა გაიჭრა (8:14), მაგრამ ქუთაისელებმა სტუმრებს გაქცევის საშუალება არ მისცეს, სხვაობა თანდათან შეამცირეს და ბექაურის ორქულიანის შემდეგ წინაც გავიდნენ 15:14. მინიმალური სხვაობა მეოთხედის ბოლომდე შენარჩუნდა 17:16. გუნდები ამ პერიოდში ძირითადად სამწამიანი ზონიდან უტევდნენ და პერიმეტრიდან სროლებს იშვიათად იყენებდნენ.

მეორე პერიოდში თამაში ქულა-ქულაში გაგრძელდა, შემდეგ კი "რუსთავმა" 6 ქულიანი ჰანდიკაპის მოპოვება შეძლო – 28:34. თუმცა, კოტე ტუღუშის შეგირდებმა მალევე მოახერხეს მდგომარეობის გამოსწორება, დეჟუან ვრაითის ფარქვეშ შესვლისა და ზუსტი სროლის შემდეგ კი "ქუთაისმა" პირველი ტაიმი გამარჯვებამდეც მიიყვანა 37:36. სხვათა შორის, პირველ ნახევარში ორივე გუნდიდან ყველაზე შედეგიანი 16 ქულით სწორედ ვრაითი გახლდათ. 10 ქულა ჰქონდა მოგროვებული რუსთაველთა ლეგიონერს ადამ ბლეიზეკს.

საწყისი ორი პერიოდის ანალოგიური სცენარით წარიმართა მესამე მეოთხედიც. ქუთაისელები ბლეიზეკისა და ნელსონის შეჩერებას ვერ ახერხებდნენ და კვლავ "რუსთავი" გავიდა წინ, ამჯერად 4 ქულით – 43:47. სტუმრებმა 4 ქულიანი სხვაობა პერიოდის ბოლომდე შეინარჩუნეს, თუმცა, აკაკი დვალიშვილის ზედიზედ ორი ზუსტი შეტევის შემდეგ "ქუთაისმა" ანგარიში გაათანაბრა 49:49, გადამწყვეტ მეოთხედამდე კი მასპინძლები კვლავ 1 ქულიანი უპირატესობით იგებდნენ – 51:50.

გადამწყვეტი

მეოთხე 10 წუთეული რუსთაველებმა აღმაფრენით დაიწყეს, კვლავ შეუჩერებელი იყვნენ ნელსონი და ბლეიზეკი, მეტად საჭირო სამქულიანები ჩააგდეს ჩაჩანიძემ და ჰოლანდიელმა კრეივ ოზაიკვუვუომვანმა. შედეგად რუსთაველები 7 ქულით დაწინაურდნენ და რომ არა პერიმეტრიდან გიორგი ბარბაქაძის ზედიზედ ორი ზუსტი სროლა, ადრევე მოახერხებდნენ მატჩის ბედის გადაწყვეტას.

ქუთაისელებმა მატჩის დარულებამდე 50 წამით ადრე 1 ქულამდე შეამცირეს ანგარიში– 75:76, გადამწყვეტი კვლავ ბლეიზეკის 3 ქულიანი აღმოჩნდა, მატჩის დასრულებამდე 23 წამით ადრე "რუსთავი" 4 ქულით დაწინაურდა 75:79 და უპირატესობა ხელიდან აღარ გაუშვა. ქუთაისელები შეტევაში დაჯარიმდნენ, სტუმრებმა საჯარიმოები ზუსტად შეასრულეს და საბოლოო ანგარიში დააფიქსირეს –75:81

საუკეთესოები

მატჩის უდავოდ საუკეთესო მოთამაშე 27 ქულითა და 7 შედეგიანი გადაცემით ადამ ბლეიზეკი გახლდათ, რომლის კარგმა თამაშმაც რუსთაველთა გამარჯვებაში დიდი როლი ითამაშა. 21 ქულა და 6 მოხსნა ჰქონდა ტეილორ ნელსონს. 11 ქულა დააგრობა რევაზ ჩაჩანიძემ
მასპინძელტა რიგებში 23 ქულით ყველაზე შედეგიანი დეჟუან ვრაითი გახლდათ. თუმცა, ამერიკელმა პირველ ტაიმში უკეთ ითამაშა, მეორე ნახევარში კი დაღლა დაეტყო და შეცდომებსაც უხშირა. 17 ქულა და 9 მოხსნა დააგროვა აკაკი დვალიშვილმა. 11 ქულით დაასრულა შეხვედრა გიორგი ბარბაქაძემ.

292
მკითხველის კომენტარები / 0 /
მსგავსი ამბები
რუბრიკის სხვა სიახლეები