სუპერლიგა: დინამო-ქუთაისი, ფაცაციას ბენეფისი

თბილისის ოლიმპიურ სასახლეში მოქმედი ჩემპიონი "დინამო" და თასის მფლობელი "ქუთაისი" დაუპირისპირდნენ. როგორც მოსალოდნელი იყო, შეხვედრა თავიდან ბოლომდე თანაბარი გამოდგა.

სტუმართა მხრიდან გამოირჩეოდნენ ლი (14 ქულა), რაითი (17) და წივწივაძე (11), ხოლო "დინამოს" წინ გაუძღვა ლევან ფაცაცია, რომელმაც საბოლოოდ 25 ქულა ჩააგდო.

საინტერესო მომენტი დაფიქსირდა მეოთხე პერიოდის დასაწყისში: ბექა წივწივაძის სამქულიანის შემდეგ "ქუთაისმა" ჩამორჩენა 5 ქულამდე შეამცირა (62:67), თუმცა საპასუხო შეტევაში, ასევე აუღელვებლად სტყორცნა სამიანი დინამოელმა ლევან ფაცაციამ, თავისი გუნდის უპირატესობა 8 ქულამდე გაზარდა.

შემდეგ იყო გიგი ბარბაქაძის სამქულიანი და 75:71, მაგრამ საფინალო სირენამდე 3 წუთით ადრე იმავე ფაცაციას საშუალო ტყორცნის შედეგად მასპინძლები 79:71 დაწინაურდნენ. ირაკლი ხოშტარიას შეგირდებმა ბრძოლის ფასად მიღწეულის შენარჩუნება მოახერხეს.

84:76 "დინამოს" სასარგებლოდ. მას ექვსი მატჩიდან ექვსივე მოგებული აქვს. რაც შეეხება "ქუთაისს", მისთვის ეს მეორე მარცხი იყო მიმდინარე სუპერლიგაში (7 მატჩი), პირველ შემთხვევაშიც "დინამოსთან" დათმო.

1085
მკითხველის კომენტარები / 0 /
მსგავსი ამბები
რუბრიკის სხვა სიახლეები