კაკტუსმა ეკლები ბოლოს გამოაჩინა

ტურის მოვლენა. პირველი ოვერტაიმი.
სუპერლიგა შაბათს გაიხსნა, პირველ დღეს სამი შეხვედრა გაიმართა, თუმცა დაძაბულობით სამივეს სჯობდა კვირის მატჩი - "კაკტუსი"-"სოხუმი". გასულ ჩემპიონატში სწორედ ეს გუნდები იბრძოდნენ მეოთხე ადგილისთვის. საბოლოოდ "კაკტუსმა" იმარჯვა, მეოთხე ადგილზეც გავიდა და პლეი ოფშიც.
მართალია, გუნდები ჯერ ფორმაში არ არიან და ხარვეზიც ბევრია, მაგრამ გუშინდელი შეხვედრა საკმარისად თვალსასეირო გამოდგა. სწორედ ამ მატჩში ვიხილეთ სეზონის პირველი ოვერტაიმი. მაყურებელი მეორე დამატებითი დროის სანახავადაც ემზადებოდა, მაგრამ კოვზი ნაცარში კაკტუსელმა ჯონსონმა ჩაუგდო: გვერდითი ხაზიდან ბურთის შემოტანის შემდეგ ფარქვეშ თავისუფლად შევიდა და სირენასთან ერთად ეფექტურად ჩატენა. ეს ყველაფერი 4 წამში მოასწრო და თანაგუნდელებს 82:80 მოაგებინა.

ტურის რიცხვი. 24 ლეგიონერი.
იყო დრო, საქართველოს პირველობაზე ორადორი ლეგიონერი თამაშობდა, ისინიც უკვე გაქართველებულები იყვნენ - ჟულივეტ ტუჯანი და პლასიდე როდუმტა. მას მერე გუნდების დაფინანსება გაიზარდა და წლეულს უცხოელთა სარეკორდო რაოდენობაა: პირველ ტურში 24-მა ლეგიონერმა ითამაშა.
მათი რიცხვის ზრდას ხელი იმანაც შეუწყო, რომ გასული სეზონის შემდეგ მათზე ლიმიტი სამიდან ოთხამდე გაიზარდა. წლეულს მწვრთნელებს უფლება აქვთ მოედანზე ერთდროულად 4 უცხოელი გამოიყვანონ.

ტურის გმირი. კრისტოფერ ვორდი.
"ვორდი" ინგლისურად სიტყვაა. ჰოდა, "კაკტუსი"-"სოხუმის" მატჩში სამი პერიოდის განმავლობაში უჩუმრად მყოფმა კრისტოფერ ვორდმა მეოთხე რაუნდში ამოიღო ხმა, მაშინ, როცა "სოხუმი" გამარჯვებას უახლოვდებოდა.
...საფინალო სირენამდე 59 წამით ადრე, როცა სოხუმელები 69:63-ს იგებდნენ, ვორდმა სამქულიანით სხვაობა სამამდე შეამცირა და თან ჯარიმის ტყორცნის უფლება მოიპოვა.
...მან ოვერტაიმშიც ჩააგდო სამქულიანი და კიდევ ერთხელ დაარღვევინა მეტოქეს წესები.
...დამატებითი დროის დასრულებამდე 1:12 წუთით ადრე ვორდმა "კაკტუსი" მეორე ტაიმში პირველად დააწინაურა - 77:75.
...კრისტოფერმა თოთხმეტივე ქულა 39-ე წუთის შემდეგ ჩააგდო. 

 

 

დინამო
87
მარნეული
63
 
19:16, 26:12, 22:12, 20:23
 
დინამო: გ. რევაზაშვილი (4ქ), მაჩალაძე, ბერიშვილი (1ქ, 3პ), ლონდარიძე (12ქ, 5მ), შარაბიძე (15ქ), ფაცაცია (9ქ, 5მ, 3პ), გრძელიძე (10ქ, 4პ), გოგოძე (6ქ, 3ჩ), ტურპინი (13ქ, 5მ, 4დ), ბოიდი (6ქ, 3პ), კრნიჩი (11ქ, 4პ, 3ჩ).

მარნეული: ვახანია (8ქ), ანთაძე (13ქ, 5მ), ს. ლეჟავა, ელიაძე, კენჭიაშვილი (2ქ), ლობჟანიძე (6ქ, 7მ, 4ჩ), ბოჭოიძე, რეი (8ქ), ათუაშვილი (6ქ), მირზიაშვილი, ნილი (6ქ), შვეცი (14ქ, 10მ).

"დინამოს" 18 ოქტომბერს ფიბა-ევროპის თასის ჯგუფურ ეტაპზე პირველი მატჩი ელის ბულგარეთში, "აკადემიკთან". საპასუხისმგებლო შეხვედრის წინ "მარნეულთან" თამაში დინამოელთათვის სასარგებლო იყო, მით უმეტეს, რომ გუნდში ერთი ისეთი კალათბურთელია, ახლახან რომ შეუერთდა - იოვან ჩრნიჩი.
სერბული წარმოშობის უკანახაზელს ამერიკული კოლეჯების ლიგაში აქვს გამოცდილება მიღებული. ბოლოს "ებაილენის უაილდქეთსში" გამოდიოდა. მან "დინამოში" მალიკ სტორი ჩაანაცვლა. პირველადი შთაბეჭდილებით, ჩრნიჩს გუნდისთვის დიდი სარგებლის მოტანა შეუძლია.

 

 

ოლიმპი
84
ქუთაისი
78
 
21:14, 24:18, 25:23, 14:23
 
ოლიმპი: ბოქოლიშვილი (9ქ), გივი ბაქრაძე (10ქ, 4პ), ჭოჭუა (18ქ), როგავა (7ქ, 6მ, 8პ), გეგი ბაქრაძე (2ქ, 5მ), ბოლქვაძე, ჰილი (9ქ), ოგდენი (20ქ, 6ჩ), დარბაიძე (9ქ).

ქუთაისი: მათიაშვილი (4ქ, 6მ, 3პ), წივწივაძე (10ქ, 5პ), გ. ბარბაქაძე (8ქ), დვალიშვილი (18ქ), ბექაური (9ქ, 2დ), ბაბუნაშვილი (3ქ), ლომოური (14ქ), ცირეკიძე, ლი (1ქ, 5მ, 3პ), რაითი (11ქ, 3პ, 5მ).

"ოლიმპი" გასულ სეზონში ლიგაში ადგილის შენარჩუნებისთვის იბრძოდა, წლეულს კი ომახიანად დაიწყო. ჯერ დუდუ დადიანის მემორიალის ფინალში იასპარეზა, შაბათს კი სუპერლიგის ფინალისტ "ქუთაისს" მოუგო.
ოლიმპელები პირველივე პერიოდიდან დაწინაურდნენ, მომდევნო ორი ათწუთეულიც სტაბილურად ჩაატარეს და მხოლოდ მეოთხეში მისცეს მეტოქეს თამაშის გამოსწორების შანსი. თუმცა სტუმრებმა ეს შანსი ვერ გამოიყენეს.
სტატისტიკის ყველა კომპონენტში უმნიშვნელო სხვაობა დაფიქსირდა, გარდა ერთისა - "ოლიმპმა" 11 შეცდომა დაუშვა, მაშინ, როდესაც "ქუთაისმა" 24-ჯერ დაკარგა ბურთი. მეტსაც გეტყვით: მეტოქის შეცდომით ქუთათურებმა 13 ქულა მოაგროვეს, თბილისელებმა - 39.

 

მგზავრები
69
რუსთავი
97
 
10:27, 19:20, 16:24, 24:26
 
მგზავრები: სანაძე (15ქ), ალხანაიძე (3ქ), ნუცუბიძე (3ქ), დ. ბარბაქაძე (8ქ), ლომინაშვილი (6ქ), ქავთარაძე (1ქ), ჯინჭარაძე (23ქ, 6მ, 3პ), ღურწკაია, აკობია (4ქ), მობლი, ნკალი (2ქ).
 
რუსთავი: გუგავა, ცეკვავა (17ქ, 5მ), ხმელიძე (6ქ), ჩაჩანიძე (9ქ, 3ჩ), ლორთქიფანიძე (6ქ), წიქარიშვილი, გოგობერიშვილი (7ქ), ტაბაღუა (2ქ), ვაშაკიძე (5ქ), ბლაჟეკი (12ქ, 9მ, 8პ), ნელსონი (24ქ, 9მ), კრუკი (9ქ, 14მ).

 "მგზავრებმა" დუდუ დადიანის მემორიალი დაიწყეს, მაგრამ ვერ დაამთავრეს - გუნდს ტრავმების გამო ექვსი კალათბურთელი გამოაკლდა. ზოგი კვლავაც აკლია, ზოგმა ტრავმა კი მოიშუშა, მაგრამ გუნდთან შესათამაშებელია.

ამასობაში, "რუსთავი" ცდილობს, წინა სეზონის შეცდომები აღარ გაიმეორეს, ქულები თავიდანვე არ დაკარგოს, რათა პლეი ოფში კარგი პოზიციით გავიდეს.
კლუბის ხელმძღვანელობამ ლეგიონერებიც კარგი ჩამოიყვანა, რომელთაგან ერთი - ნელსონი მატჩის ბომბარდირი გახდა (24 ქულა), მეორე - ბლაჟეკი კინაღამ სამმაგ დუბლს გამორჩა - 12 ქულა, 9 მოხსნა, 8 პასი.

 

კაკტუსი
82
სოხუმი
80
 
13:22, 22:17, 11:19, 23:11, 13:11
 
კაკტუსი: ლოლიშვილი (6ქ, 5მ), ლომიძე (13ქ, 8მ, ბოისა (3ქ, 5მ, 5პ), ტურძელაძე (4ქ), გოგალაძე, პარკსი (16ქ), ჯონსონი (24ქ, 9მ, 6ჩ), როჯერსი (2ქ, 6მ), ვორდი (14ქ).
 
სოხუმი: მ. რევაზაშვილი (6ქ, 5მ), კვეტენაძე (6ქ), ლ. რევაზაშვილი, ჩელოვანი (22ქ, 10მ), ლუცენკო (15ქ, 9მ, 3ჩ), ბაიდა (14ქ, 7მ, 9პ), ვოლერი (13ქ, 8მ, 6პ), პრიმაკი (4ქ).

 დასაწყისში ამ შეხვედრაზე ბევრი დავწერეთ, მოგახსენეთ, როგორ გააბათილა "კაკტუსმა" 6-ქულიანი ჩამორჩენა ძირითადი დროის ბოლო წუთზე. როგორ ჩატენა ოვერტაიმის უკანასკნელ წამზე ჯონსონმა... აქვე ერთ ეპიზოდზე უნდა გავამახვილოთ ყურადღება: დამატებითი დროის დასრულებამდე 4 წამით ადრე "სოხუმელმა" ბაიდამ შორი დისტანციიდან სამქულიანი სტყორცნა და ბურთი ფარიდან ასხლეტით ჩაეშვა კალათში, რის შემდეგაც ტაბლოზე საყაიმო ანგარიში აციმციმდა - 80:80. ბოლო ოთხ წამზე უკვე მოგახსენეთ.
კაკტუსელმა ჯონსონმაც 24 ქულა ჩააგდო და ამ მაჩვენებლით ტურის სნაიპერ რუსთაველ ნელსონს გაუთანაბრდა.
მომდევნო ტური 19 ოქტომბერს ქვემოქართლური დერბით ("რუსთავი"-"მარნეული") გაიხსნება.

 

ყოველდღიური სპორტული გაზეთი "ლელო"

963
მკითხველის კომენტარები / 0 /
მსგავსი ამბები
რუბრიკის სხვა სიახლეები