სუპერლიგის ფინალი. დელტა კვლავ გვაოცებს - წაუგებელი სერია ქუთაისშიც განაგრძო

ქუთაისის სპორტის სასახლეში გამართული სუპერლიგის ფინალური სერიის პირველი მატჩი "დელტას" გამარჯვებით 90:83 დასრულდა.

შეხვედრა საინტერესო გამოდგა და ინტრიგა მატჩის ბოლომდე იყო შენარჩუნებული.

მატჩი "ქუთაისის" 5 ქულაინი გაქცევით დაიწყო, აკაკი დვალიშვილის ორი ქულაინისა და ჯონათან ლის ზუსტი სამქულიანის შედეგად მასპინძლები 5:0 დაწინაურდნენ. თუმცა, "დელტა" მალევე გაერკვა ვითარებაში და თამაში ქულა-ქულაში გაგრძელდა, ერიკ ნოთიჯისა და არტიომ შვეცის კარგი თამაშის წყალობით სტუმრები 4 ქულით დაწინაურდნენ , თუმცა ლომიძის ზუსტი საჯარიმოებისა და გიგი ბარბაქაძის სამქულიანი სროლის შემდეგ "ქუთაისმა" უპირატესობა დაიბრუნა და პირველი მეოთხედი 3 ქულიანი უპირატესობით მოიგო - 23:20.

მეორე პერიოდი სტუმრებმა აქტიურად დაიწყეს, "დელტა" სამწამიანი ზონიდან კარგად უტევდა, მაგრამ ლომიძემ და ბარბაქაძემ პერიმეტრიდან ზუსტად ისროლეს და სტუმრებს გაქცევის საშუალება არ მისცეს.

თამაში კვლავ ქულა-ქულაში გაგრძელდა. ხან ერთი გუნდი გადიოდა წინ, ხან მეორე. ორივე მხარეს ხშირი იყო შეცდომებიც. მეოთხედის ბოლოსკენ ქუთაისელთა სათადარიგოებმა ტექნიკური ჯარიმა მიიღეს, რითაც თბილისელებმა ისარგებლეს და სხვაობა მცირედით გაზარდეს 36:32, მაგრამ მასპინძლებმა დიდ შესვენებამდე 7:0 გაქცევა მოასწრეს და ტაიმი 1 ქულიანი უპირატესობით მოიგეს 39:38

მესამე პერიოდი სტუმრებმა 8:0 გაქცევით დაიწყეს და 7 ქულით დაწინაურდნენ 39:46, ქუთაისელები ვერ ახერხებდნენ დრამრაითის გაჩერებას, რომელიც იოლად შედიოდა ფარქვეშ და შეტევებს ზუსტად აგვირგვინებდა, ამას გარდა, პერიმეტრიდანაც შესანიშნავად ისროდა - ზედიზედ ორი სამქულიანი ჩააგდო, "დელტა" კი უპირატესობას თანდათან ზრდიდა, მესამე პერიოდის ბოლოსკენ სტუმრები უკვე 17 ქულით იგებდნენ 70:53.

მეოთხედის დასრულებამდე კოტე ტუღუშის შეგირდებმა მცირედით გამოასწორეს ვითარება, 12 ქულამდე დაიყვანეს სხვაობა და მატჩის გადარჩენის შანსები შეინარჩუნეს.

გადამწყვეტი მეოთხედი მასპინძლებმა დიდი მონდომებით დაიწყეს, გულშემატკივრების ყიჟინის ფონზე კარგი შეტევები განახორციელეს და აკაკი დვალიშვილის ზუსტი სამქულიანის შემდეგ სხვაობა 8 ქულამდე დაიყვანეს. ამას ლომიძის ზუსტი შესვლა მოჰყვა 70:76. შეხვედრა უკიდურესად დინამიურად და საინტერესოდ გაგრძელდა. ბარბაქაძისა და დვალიშვილის ქულებით სხვაობა 5 ქულამდე დავიდა 75:80.

თუმცა, კვლავ უხეში შეცდომა და ნოთიჯიმ "დელტა" გამოაფხიზლა. მატჩის დასრულებამდე 3:08 წუთი იყო დარჩენილი. კოტე ტუღუშის გუნდს მატჩის გადასარჩენად საკმაო დრო რჩებოდა. მაგრამ კვლავ ნოთიჯმა აიღო თამაში საკუთარ თავზე და ზუსტი სამიანით 1:55 წუთით ადრე 10 ქულამდე გაზარდა სხვაობა, რაც საბოლოოდ გადამწყვეტი აღმოჩნდა. ქუთაისელებმა კიდევ შეამცირეს სხვაობა, მაგრამ მატჩის შემოტრიალება ვეღარ შეძლეს - შეხვედრა "დელტას" გამარჯვებით 90:83 დასრულდა.

სტუმართა გუნდიდან საუკეთესო სტატისტიკა ერიკ ნოთიჯს ჰქონდა, რომელმაც 19 ქულა, 5 მოხსნა და 5 ასისტი მიითვალა. 14-14 ქულა დააგროვეს საბა ლობჯანიძემ და ბექა ბექაურმა.

მასპინძელთაგან საუკეთესო აკაკი დვალიშვილი იყო, რომელმაც 24 ქულითა და 14 მოხსნით ორმაგი დუბლი შეასრულა. 19-19 ქულა მიითვალეს ჯონათან ლიმ და გიორგი ბარბაქაძემ.

ფინალური სერიის მეორე შეხვედრა 24 მაისს ქუთაისის სპორტის სასახლეში გაიმართება. სერია სამ მოგებამდე გრძელდება.

ქუთაისი-დელტა 83:90
23:20, 16:18, 19:32, 25:20

ქუთაისი: ლი (19ქ), ბარბაქაძე (19ქ,5პ), ლომოური (3ქ), წივწივაძე, ბუსი (4ქ,7მ) დვალიშვილი (24ქ,14მ), ლომიძე (14ქ), ჭეიშვილი, შენგელია
მწვრთნელი: კოტე ტუღუში

დელტა: ნოთიჯი (19ქ), ბექაური (14ქ,8მ), დრამრაითი (16ქ), შვეცი ( 11ქ,6მ), ფხაკაძე (6ქ,6პ), ლობჯანიძე (14ქ), ბაქრაძე (4ქ), მაჩალაძე (2ქ), მეგენეიშვილი (4ქ), გაფრინდაშვილი
მწვრთნელი: ალექს ლაფანაშვილი

მსაჯები: მიკოლა ამბროსიევი, მაკა კუპატაძე, გურამ მიქელაძე

699
მკითხველის კომენტარები / 0 /
მსგავსი ამბები
რუბრიკის სხვა სიახლეები
;