სუპერტრანსფერების მოლოდინში. რონალდო 'იუვენტუსი': 4 წელი და 120 მილიონი, მბაპე და 'რეალი' 272 მილიონი?

პორტუგალიური "ო ჟოგოს" ინფორმაციით, კრიშტიანო რონალდო "იუვენტუსს" შეუთანხმდა. ეს მას შემდეგ, რაც "ბებერი ქალბატონი" მსოფლიო ფეხბურთის მეგავარსკვლავის სანაცვლოდ 100 მილიონი ევროს გადახდას დათანხმდა.

"იუვენტუსში" ბევრი იფიქრეს ფეხბურთელის საკონტრაქტო დეტალებზე. საბოლოოდ ირკვევა, რომ რონალდო კლუბთან 4-წლიან ხელშეკრულებას გააფორმებს და ამ პერიოდში 120 მილიონ ევროს მიიღებს მარტო ჯამაგირის სახით.

როგორც ჩანს, გადამწყვეტი გავლენა იქონია მისმა გართულებულმა ურთიერთობამ ფლორენტინო პერესთან. სწორედ ამის გამო გადაწყვიტა მან კლუბის დატოვება. ზოგიერთი ინფორმაციით, ის ტურინში უკვე სახლსაც ეძებს...

მბაპე და რეალი: 272 მილიონი?

"მარკას" ინფორმაციით, "რეალმა" კილიან მბაპესთან ყველა საკონტრაქტო დეტალი შეათანხმა. პოპულარული გამოცემა ამტკიცებს, რომ "სამეფო კლუბი" პარიზულ გრანდს 19 წლის ფეხბურთელის სანაცვლოდ... 272(!) მილიონ ევროს გადაუხდის.

ამასობაში "რეალმა" ოფიციალური განცხადება გააკეთა. "გვინდა, გამოვეხმაუროთ ბოლო საათებში ატეხილ აჟიოტაჟს, რომლის მიხედვითაც მადრიდის "რეალს" კილიან მბაპეს უკავშირებენ. ღიად ვაცხადებთ, რომ ეს ინფორმაცია არის სრული სიცრუე და რომ ფეხბურთელის ტრანსფერთან დაკავშირებით "პარი სენ-ჟერმენისთვის" საერთოდ არ მიგვიმართავს", - ნათქვამია "რეალის" განცხადებაში.

პსჟ: კანტე პრიორიტეტია

"პარი სენ ჟერმენისთვის" ზაფხულის სატრანსფერო ბაზარზე პრიორიტეტად ნგოლო კანტეს გადაბირება იქცა. "ჩელსისა" და საფრანგეთის ნაკრების ერთ-ერთ ლიდერთან გარიგებით უშუალოდაა დაინტერესებული ფრანგული კლუბის სპორტული დირექტორი ანტერო ენრიკე.

კანტეს ტრანსფერი ფრანგულ გრანდს, სავარაუდოდ, 100 მილიონი ევრო დაუჯდება. ფრანგები ასევე დაინტერესებულები არიან ალექს სანდროსა ("იუვენტუსი") და დავიდ ალაბას ("ბაიერნი") შეძენით.

ყოველდღიური სპორტული გაზეთი "ლელო"
1968
მკითხველის კომენტარები / 0 /
მსგავსი ამბები
რუბრიკის სხვა სიახლეები
;