სფფ. აღმასკომის სხდომა: ხელოვნური საფარი დაივიწყეთ!

საქართველოს ფეხბურთის ფედერაციაში აღმასკომის სხდომა გაიმართა. სეზონი მალე დასრულდება და უამრავი კითხვა დაგროვდა, არაერთი თემაა განსახილველი და პრობლემა - მოსაგვარებელი. მათ შორის, ისეთები, რომელიც დაკავშირებულია ეროვნულ ნაკრებთან, საფეხბურთო ლიგასთან, კონკრეტულ კლუბებთან და ინფრასტრუქტურასთან.

აღმასკომზე კონკრეტული გადაწყვეტილება არ მიუღიათ. მაგრამ განიხილეს პროექტი, რომლის თანახმადაც, მომავალი წლიდან გუნდები ხელოვნურ საფარზე აღარ ითამაშებენ.

სფფ-ის აღმასკომის წევრი, "გაგრას" დამფუძნებელი ბესიკ ჩიხრაძე ამბობს, რომ ეროვნულ ნაკრებში ვლადიმირ ვაისის დარჩენას აღმასკომის ყველა წევრმა დაუჭირა მხარი.

"ბევრი საკითხი იყო განხილული. აღმასკომის წევრები დავეთანხმეთ, რომ ვლადიმირ ვაისთან ახალი კონტრაქტი გაფორმებულიყო. ეს სფფ-ის კომპეტენციაა, მაგრამ ჩვენი აზრითაც დაინტერესდნენ. ამას გარდა, ვიმსჯელეთ "ზესტაფონის" საკითხზე, რომელსაც ქართულ საფეხბურთო სივრცეში დაბრუნება სურს.მესამე საკითხი კი მოედნების თემა იყო. სფფ-ის სურვილია, ეროვნული ლიგისა და ლიგა 2-ის ყველა გუნდმა ბუნებრივ საფარზე ითამაშოს, ხელოვნურ მოედნებზე კი მატჩები აღარ ჩატარდება", - ამბობს ჩიხრაძე.

სერგო ფუტკარაძე: მზად ვართ, ლიცენზირება გავიაროთ, ოღონდ, ჯერ ოფიციალურად უნდა გვაცნობონ, რომელ ლიგაში ვითამაშებთ!

სხვა საკითხებთან ერთად, აღმასკომის სხდომაზე "ზესტაფონის" თემაც განიხილეს. ცოტა ხნის წინ, "ლელოსთან" ინტერვიუში საქართველოს ფეხბურთის ფედერაციის პრეზიდენტმა ლევან კობიაშვილმა განაცხადა, რომ სულ მალე "ზესტაფონის" თემა დაიხურებოდა და დაიხურებოდა ქართველი გულშემატკივრის ინტერესების გათვალისწინებით...

ამან გააჩინა ვარაუდი, რომ ქართულ საფეხბურთო სივრცეში "ზესტაფონის" დაბრუნება იგეგმებოდა. მოგვიანებით, ეს ინფორმაცია ჩვენი წყაროებით დადასტურდა და მკითხველიც საქმის კურსში ჩავაყენეთ. ჩვენი ინფორმაციის სინამდვილეს ადასტურებს ის წერილი, რომელიც კლუბმა საქართველოს ფეხბურთის ფედერაციისგან მიიღო...

რა ხდება "ზესტაფონთან" დაკავშირებით? ამ კითხვით კლუბის პრესსამსახურის ხელმძღვანელს, სერგო ფუტკარაძეს მივმართეთ:

"საქართველოს ფეხბურთის ფედერაციისგან წერილი მივიღეთ. რაც შეეხება აღმასკომის სხდომას, რაიმეს თქმა მიჭირს. პრაქტიკულად, არ ვიცი, როგორ განვითარდა იქ მოვლენები. ვცადე ფეხბურთის ფედერაციის ერთ-ერთ ხელმძღვანელ პირთან დაკავშირება, მაგრამ - უშედეგოდ.

ჩვენი კლუბის გარშემო შექმნილი სიტუაცია განსაკუთრებულია. როგორც იცით, უკვე ორ-ნახევარი წელია, "ზესტაფონი" დანაშაულებრივადაა ჩამოშორებული ქართულ ფეხბურთს. არ გვინდა, კიდევ ერთხელ მოვისმინოთ ტრაგიკულად შეფერილი პოზიცია იმასთან დაკავშირებით, რომ ფეხბურთის ფედერაცია მზად იყო კლუბის დასაბრუნებლად და ჩვენ ვერ ან არ გავიარეთ ლიცენზირების პროცესი.

ვამბობ პირდაპირ: "ზესტაფონი" მზადაა, ჩაერთოს და გაიაროს ლიცენზირების პროცესი. ოღონდ, ამისთვის საჭიროა, ვიცოდეთ, რომელ ლიგაში ვითამაშებთ მომავალ სეზონში. ყველაფერს რომ თავი დავანებოთ, მწვრთნელებს და ფეხბურთელებს კონტრაქტები ხომ უნდა გავუფორმოთ და შესაბამისი მიზანი ხომ უნდა დავუსახოთ?!

თან, მხედველობაში უნდა იქნას მიღებული ისიც, რომ ჩვენი დღევანდელი რეალობა სპეციფიკურია. საქართველოს ფეხბურთის ფედერაციის მხრიდან მივიღეთ შეთავაზება, რომ ვითამაშოთ ლიგა 2-ში, როგორც ყველა სხვა კლუბმა. იმედია, მალე ამის ოფიციალური დასტურიც გვექნება", - გვითხრა სერგო ფუტკარაძემ.

ჩვენი მხრივ კი დავძენთ - ფეხბურთის ფედერაციაში განგვიმარტეს, რომ ეს იყო მოსამზადებელი ხასიათის აღმასკომი, სადაც რაიმე გადაწყვეტილების მიღება დაგეგმილი არ ყოფილა. გვითხრეს ისიც, რომ მომავალი აღმასკომი ამ კუთხით უფრო მნიშვნელოვანი იქნება...

ყოველდღიური სპორტული გაზეთი "ლელო"
1719
მკითხველის კომენტარები / 0 /
მსგავსი ამბები
რუბრიკის სხვა სიახლეები
;