სფფ. აღმასკომმა გადაწყვეტილება მიიღო... მწვანე შუქი ზესტაფონს!

"14 თებერვალს საქართველოს ფეხბურთის ფედერაციაში აღმასრულებელი კომიტეტის სხდომა გაიმართა.

აღმასკომის წევრებმა 2018 წლის საქართველოს ეროვნული ჩემპიონატისა და დავით ყიფიანის სახელობის თასის გათამაშების დებულება დაამტკიცეს. ასევე კენჭი უყარეს კლუბების ლიცენზირების დებულებაში შესატან ცვლილებებს.

რაც შეეხება "სკ ზესტაფონის" წერილს საქართველოს რეგიონულ ლიგაში გამონაკლისის სახით დაშვების თაობაზე, აღმასკომმა საკითხს მხარი დაუჭირა და ამგვარად, 2018 წლიდან "ზესტაფონი" ეროვნულ ჩემპიონატს დაუბრუნდება", -ვკითხულობთ საქართველოს ფეხბურთის ფედერაციის ოფიციალურ საიტზე.

აღმასკომის სხდომის დასრულების შემდეგ კომენტარი გააკეთა საქართველოს ფეხბურთის ფედერაციის გენერალურმა მდივანმა დავით მუჯირმა:

"ზესტაფონის" საკითხთან დაკავშირებით ჩვენ 2016 წლიდან დაწყებული გვაქვს კლუბთან კომუნიკაცია. ბოლოს, აღმასკომის სხდომაზე შემოსული იყო წერილი საფეხბურთო კლუბ "ზესტაფონისგან" იმის შესახებ, რომ დაგვეშვა კლუბი რეგიონულ ლიგაში ვაკანტურ პოზიციაზე, რომელიც გაჩნდა მას შემდეგ, რაც "ლოკომოტივი 2-მა" უარი განაცხადა ტურნირში მონაწილეობაზე.

აღმასკომმა იმსჯელა და მიიღო გადაწყვეტილება, რომ 2018 წელს "ზესტაფონმა" რეგიონულ ლიგაში იასპარეზოს. საბოლოოდ დამტკიცდა ეროვნული ჩემპიონატისა და თასის გათამაშების ფორმატი.

შევიდა ცვლილებები ლიცენზირების დებულებაშიც. ამ ცვლილებებზე იმსჯელა აღმასკომმა და ლიცენზირების დებულება ახალი რედაქტირებით კლუბებს ხუთშაბათიდან დაეგზავნებათ".

რა თქმა უნდა, გუშინდელი აღმასკომის სხდომის მთავარი ვერდიქტი ქართულ საფეხბურთო სივრცეში "ზესტაფონის" დაბრუნებაა. მას შემდეგ, რაც საქართველოს ფეხბურთის ფედერაციის ძველი ხელმძღვანელობის გადაწყვეტილებით, გუნდი ეროვნული ჩემპიონატიდან მოიკვეთა, სხვადასხვა ასაკობრივ ჩემპიონატში მხოლოდ "ზესტაფონის" შესაბამისი ასაკის გუნდები მონაწილეობდნენ.

ახალი "ზესტაფონი" იმ გუნდის ბაზაზეა დაკომპლექტებული, რომელმაც წინა სეზონში საქართველოს 17-წლამდელთა ჩემპიონატში მეორე ადგილი დაიკავა და მხოლოდ თბილისის "დინამოს" ჩამორჩა.

გუნდს სათავეში უდგას გამოცდილი მწვრთნელი გურამ მაზმიშვილი. კლუბი მთლიანად ადგილობრივი კადრებითაა დაკომპლექტებული. ამ ვერდიქტით ერთი ძალიან კარგი საქმე გაკეთდა: დაღუპვას გადაურჩა მთელი თაობა, ძალიან კარგი თაობა, რომელსაც შეუძლია, თავისი სიტყვა თქვას ქართულ ფეხბურთში.

რა თქმა უნდა, ქართული ფეხბურთის გულშემატკივარს ძალიან აინტერესებს, რა შემადგენლობით წარსდგება "ზესტაფონი" გულშემატკივრის წინაშე მომავალ სეზონში. უკვე ვიცით, რომ გუნდი ძირითადად 17-18 წლის ფეხბურთელებითაა დაკომპლექტებული.

ეგ არის, 17-წლამდელთა გუნდის საუკეთესო ბომბარდირი შოთა შეყილაძე თბილისის "ლოკომოტივში" გადავიდა. სხვებთან ერთად, "ზესტაფონს" რამდენიმე, შედარებით გამოცდილი ფეხბურთელიც დაეხმარება.

ამ დროისთვის გუნდის ყველაზე გამოცდილი წევრი ნოდარ გაჩეჩილაძეა, ვინც ადრე იმ "ზესტაფონის" წევრი გახლდათ, რომელმაც არაერთი ტიტული მოიგო საქართველოში. უნდა ვივარაუდოთ, რომ "ზესტაფონი" საქართველოს ჩემპიონატის ყველა ლიგაში ერთ-ერთი ყველაზე "ახალგაზრდა" გუნდი იქნება.

ცნობილია, რომ მაზმიშვილის კრებული საშინაო მატჩებს დავით აბაშიძის სახელობის სტადიონზე ჩაატარებს, რომელსაც "ზესტაფონის" არაერთი დაუვიწყარი გამარჯვება ახსოვს. მოკლედ, იწერება ახალი ისტორია და ამ გუნდის ჯერაც ძალიან ახალგაზრდა წევრების ზურგზე დიდზე დიდი ტვირთია.

ამის პარალელურად, კლუბს აქვს ყველანაირი საშუალება და უფლება, სამართლიანობის აღდგენისთვის ბრძოლა გააგრძელოს თუნდაც საერთაშორისო ასპარეზზე.

ამ დროისთვის მთავარი ის არის, რომ "ზესტაფონის" ქომაგი აღარ შემოიფარგლება საკუთარ სტადიონზე სხვა გუნდების თამაშის ცქერით და საშუალება ექნება, მხარი დაუჭიროს საყვარელ გუნდს.

გულშემატკივარს აუცილებლად უნდა შევახსენოთ ისიც, თუ რა ტრადიციებისა და წარსულის გუნდი დაბრუნდა ქართულ საფეხბურთო სივრცეში. "ზესტაფონი" 2004 წელს დაარსდა. მოკლე დროის განმავლობაში გუნდმა არაერთი ტიტული მოიგო.

ზედიზედ ორჯერ, 2010-11 და 2011-12 წლების სეზონში, გუნდი საქართველოს ეროვნული ჩემპიონატის გამარჯვებული გახდა. პირველ შემთხვევაში "ზესტაფონს" გია გეგუჩაძე ხელმძღვანელობდა, მეორე საჩემპიონო სეზონში კი - "საბურთალოს" ახლანდელი დამრიგებელი გიორგი ჭიაბრიშვილი.

2008 წელს, თემურ მახარაძის ხელმძღვანელობით, გუნდმა საქართველოს თასის გათამაშება მოიგო, ორჯერ იმარჯვა საქართველოს სუპერთასზე 2011 და 2012 წლებში.

"ზესტაფონს" დასამახსოვრებელი შეხვედრები ჩაუტარებია ევროთასებზეც. განსაკუთრებით უნდა გამოვარჩიოთ მატჩები ჩემპიონთა ლიგასა და ევროპის ლიგაზე "დაჩიასთან", "შტურმსა" და "ბრიუგესთან".

ახალი "ზესტაფონის" სათავეში კვლავ რჩება კლუბის მფლობელი ილია კოკაია, ვის სახელსაც უკავშირდება მისი ჩამოყალიბება და ყველა ის წარმატება, რასაც სხვადასხვა დროს გუნდმა მიაღწია.

გუშინდელ ფაქტთან დაკავშირებით კომენტარი გააკეთა "ზესტაფონის" მენეჯერმა სერგო ფუტკარაძემ:

"ძალიან კარგი, მისასალმებელი გადაწყვეტილებაა. კარგია, რომ გათვალისწინებული იქნა კონკრეტული გუნდის, კონკრეტული თაობის ინტერესები. წინააღმდეგ შემთხვევაში, ჩემი აზრით, ეს იქნებოდა ტრაგედიის ტოლფასი.

რაც შეეხება ზოგად ვითარებას, არც მე, არც მთლიანად კლუბს და არც მის გულშემატკივრებს არ აქვთ სამართლიანობის აღდგენის შეგრძნება. ამ მხრივ, ჩვენ ბრძოლას მომავალშიც აუცილებლად გავაგრძელებთ.

ისე კი, ეს გადაწყვეტილება ნებისმიერ შემთხვევაში დადებითად უნდა შეფასდეს. მაგრამ ეს არის მინიმუმი იმისთვის, რომ არ შეწყვეტილიყო კლუბის, როგორც ცოცხალი ორგანიზმის ფუნქციონირება.

ეს არის გზა იმისა, რომ არ დაიკარგოს და არ გაირიყოს თაობა, რომელმაც შარშან საქართველოს 17-წლამდელთა ჩემპიონატში ვერცხლის მედლები მოიგო", - გვითხრა ფუტკარაძემ.

ყოველდღიური სპორტული გაზეთი "ლელო"
1780
მკითხველის კომენტარები / 0 /
მსგავსი ამბები
რუბრიკის სხვა სიახლეები
;