ტაილანდიდან, სიამის ყურიდან, სასიამოვნო ამბებს ველით 

ტაილანდის საკურორტო ქალაქ პატაიაში, რომელიც სიამის ყურის სანაპიროზე მდებარეობს, დღეს დამთავრდება ძალოსანთა მსოფლიოს ჩემპიონატი, რომელშიც 100 ქვეყნის 606 წარმომადგენელი ჩაება, მათ შორის 10 ათლეტი - საქართველოდან. ჩვენებურთაგან თითო ოქროს და ბრინჯაოს მედალი რევაზ დავითაძემ და ანტონ პლესნოიმ მოიპოვეს. 

გუშინ ფიცარნაგზე 109 კილოგრამი წონითი კატეგორიის სპორტსმენები ცდიდნენ ძალებს. მათ შორის ქართველები არ იყვნენ. ატაცში მსოფლიოს სტანდარტი - 196 კილოგრამი სამმა სპორტსმენმა გააუმჯობესა - ჯერ ჩინელმა ჩჟი იანმა (197 კგ), შემდეგ კი ბელარუსმა ანდრეი არამნაუმ (198 კგ) და სომეხმა სიმონ მარტიროსიანმა, რომელსაც აკვრასა (240 კგ) და ორჭიდში (435 კგ) ეკუთვნოდა მსოფლიოს მიღწევები. მან ატაცში ოქროს მედალი დაიმსახურა. მერე აკვრაშიც 230 კილოგრამით პირველი იყო. ცხადია, ორჭიდშიც ის გახდა ჩემპიონი. 

109 კგ
1. სიმონ მარტიროსიანი (სომხეთი) - 429 (199+230)
2. ანდრეი არამნაუ (ბელარუსი) - 426 (198+228), 
3. ჩჟი იანი (ჩინეთი) - 420 (197+223)

დღეს ჩემპიონატის ფინიშზე მძიმე წონაში (+109 კგ) საჩხერელი გოლიათის - რიოს თამაშების გამარჯვებულის, მსოფლიოს სამგზის და ევროპის ოთხგზის ჩემპიონ ლაშა ტალახაძის გაბრწყინებას ველით. ქართველმა სპორტსმენმა შარშან აშხაბადში მსოფლიოზე ძალოსნობის საერთაშორისო ფედერაციის მიერ ყველა წონითი კატეგორიისთვის ახალი მსოფლიო სტანდარტების დაწესების შემდეგ იასპარეზა.

მძიმეწონოსნებს (+109) ატაცში - 210 კგ, აკვრაში - 250 კგ, ორჭიდში კი 453 კილოგრამი უნდა დაეძლიათ. თურქმენეთის დედაქალაქის ფიცარნაგზე ლაშამ უკვე მეორე ცდიდან შეუტია მსოფლიოს - 212 კილო აიტაცა, რაც პირველი ახალი მიღწევა იყო - სტანდარტზე 2 კილოგრამით მეტი. რამდენიმე წუთში ჩვენებურმა თავისივე რეკორდი 5 კილოგრამით გააუმჯობესა.

აკვრაში ტალახაძემ პირველ ცდაზე 245 კილოგრამი დაიმორჩილა და ორჭიდში 462 კილოს მოუყარა თავი - მსოფლიოს სტანდარტზე ცხრა კილოგრამით მეტს და მესამე მსოფლიოს რეკორდი მიითვალა. მომდევნო ორი ცდისას კი 4 რეკორდს გამოჰკრა ხელი - ორ აკვრასა (252 და 257 კგ) და ამდენივეს ოჭიდში (469 და 474 კგ).

ქართველმა მძიმეწონოსანმა წლეულს ბათუმში ევროპის ჩემპიონატზეც ფანტასტიკური შედეგი აჩვენა. „ევროსპორტის“ აღფრთოვანებული კომენტატორის თქმით, „ლაშა ტალახაძემ ტრიუმფალური ფინალი აჩუქა როგორც ქართველ, ისე ევროპელ მაყურებელს“ - მსოფლიოს სამი რეკორდი გააუმჯობესა. ატაცში მე-2 ცდაზე შარშან მსოფლიოზე დამყარებული თავისივე რეკორდი (217 კილო) კილოგრამით გააუმჯობესა. მერე 260 კილოგრამი აკრა და მსოფლიოს მიღწევას 3 კილოგრამით გადაამეტა, ორჭიდის ჯამში კი 478 კილოს მოუყარა თავი, რაც უწინდელ მსოფლიოს რეკორდს, რომელიც მასვე ეკუთვნოდა, ოთხი კილოგრამით აღემატება. 

„ამ შეჯიბრებისთვის მონდომებით ვემზადებოდი და ბედნიერი ვარ, რომ გულშემატკივრების იმედები გავამართლე. ვეცდებით, მომავალ შეჯიბრებებშიც გავახარო სრულიად საქართველო“, - თქვა მაშინ ლაშა ტალახაძემ. 

ტიტულიანმა ძალოსანმა სიტყვა საქმედ საქართველოს პირველობაზე აქცია: თბილისში ფრენბურთის სასახლის ფიცარნაგზე ტალახაძემ 219 კილოგრამი აიტაცა, რაც საქართველოს რეკორდია და მის მიერ წლეულს გაზაფხულზე ბათუმში ევროპის ჩემპიონატზე ნაჩვენებ მსოფლიოს მიღწევას კილოგრამით აღემატება, თუმცა ის პლანეტის რეკორდად არ ითვლება, რადგან საქართველოს პირველობა ძალოსნობის საერთაშორისო ფედერაციის კალენდარში არ შედის და უცხოელი არბიტრებიც არ ემსახურებოდნენ.

ჩვენთვის მნიშვნელოვანი ის არის, რომ საქართველოს რეკორდი მსოფლიოსას აღემატება, ყოველ შემთხვევაში, დღემდე მაინც, რადგან მსოფლიოს ჩემპიონატის ფინიშზე სიამის ყურიდან სასიამოვნო ამბებს ველით: მძიმე წონაში (+109) საქართველოს სპორტის ღირსებას ახალგაზრდებში მსოფლიოს და ევროპის ჩემპიონი გიორგი ჩხეიძე (B ჯგ., 8:00 სთ) და ლაშა ტალახაძე (A ჯგ., 12:55 სთ) დაიცავენ.

ყოველდღიური სპორტული გაზეთი "ლელო"
207
მკითხველის კომენტარები / 0 /
მსგავსი ამბები
რუბრიკის სხვა სიახლეები
;