ტარიელ ხეჩიკაშვილი: ილუზიას არ ვიქმნით, მაგრამ არ უნდა დავკარგოთ, რაც გავაკეთეთ!..

“საბურთალოს” პრეზიდენტი ტირასპოლის “შერიფთან” საპასუხო მატჩს იმედიანად ელის. ტარიელ ხეჩიკაშვილის აზრით, სტუმრად 3-ბურთიანი სხვაობით გამარჯვების მიუხედავად, გადამწყვეტი დღევანდელი მატჩი იქნება:

“იცით, მოლდოვაში გამარჯვების გარდა რამ გამახარა? იქ გუნდი, ჟურნალისტები და გულშემატკივრები ერთიანები ვიყავით. ერთი თამაშით შორს მიმავალი დასკვნის გამოტანა ძალიან არ მიყვარს. მაგრამ უაღრესად მნიშვნელოვანი იყო ის დადებითი შეფასებები, რაც ტირასპოლში მოვისმინეთ - ქართულ ფეხბურთზე აწმყოშიც დაიწყეს ლაპარაკი, ძველი და ახალი თაობის ქართულ ფეხბურთს შორის კავშირი გამოჩნდა. გამოჩნდა, რომ ბურთის გაგორება და გაკონტროლება შეგვიძლია. შეუძლებელია, კლუბის პრეზიდენტმა ამაზე დიდი ბედნიერება განიცადო... 

...ბევრმა დაინახა, რომ “საბურთალოში” არის კავშირი წარსულსა და მომავალს შორის. მაგრამ ამას შენარჩუნება და განმტკიცება სჭირდება. ქართული ფეხბურთისთვის რა იყო დამახასიათებელი? მოედანზე ჩვენი გუნდები მუდამ რაღაცას ქმნიდნენ. მაგრამ ბოლო წლებში ეს სახე და სტილი დაიკარგა. 3:0-ზე არანაკლებ მიხარია ის, რომ 90 წუთის განმავლობაში შევძელით და გულშემატკივარს ვაჩვენეთ - ქართველებს შექმნა დღესაც შეგვიძლია...

...ამ მატჩის შემდეგ გულშემატკივრებისგან უჩვეულო მხარდაჭერა წამოვიდა და ეს ძალიან მახარებს. მწვრთნელებს, ფეხბურთელებსა და მენეჯემენტს მადლობა მინდა გადავუხადო. ძალიან მნიშვნელოვანი იყო მატჩზე მამა ბასილის ყოფნა, რომელიც გუნდს ჭაბუკთა ლიგიდან მოჰყვება და ტირასპოლშიც დალოცა... 

...განსაკუთრებული მადლობა ტირასპოლში მომუშავე ქართველებს - შოთა მახარაძეს და ჯღარკავას მინდა გადავუხადო! ისინი “საბურთალოს” თამაშით გაოცებას ვერ მალავდნენ. მოლოდინი ჰქონდათ, რომ ღირსეულად ვითამაშებდით, მაგრამ ამდენს არავინ ელოდა...

...თუმცა ილუზიას არ ვიქმნით, თითქოს ეს ისეთი გამარჯვებაა, რომ არიქა და ყველაფერი რადიკალურად შევცვალეთ! ოქროს თაობებს საქართველოში ბევრად დიდი წარმატებებისთვის მიუღწევიათ და ამით არ უნდა დავკმაყოფილდეთ. ჩვენ ჯერ ძალიან ბევრი გვიკლია საოცნებო დონემდე. ყველაფერს თავი რომ დავანებოთ, მეორე მატჩია ჩასატარებელი და ჩემპიონთა ლიგის შესარჩევი ეტაპის მეორე წრეში უნდა გავიდეთ. ამიტომ, დამშვიდება არაფერში გვარგებს.

ისიც არ უნდა დავკარგოთ, რაც გავაკეთეთ. დღევანდელი რეალობიდან გამომდინარე, პირველად მოხდა, რომ გასვლითი თამაშის შემდეგ გულშემატკივრებმა ქართული გუნდი ტაშით გააცილეს”.

ყოველდღიური სპორტული გაზეთი "ლელო"
933
მკითხველის კომენტარები / 1 /
ზაზა
0
რამხელა სიხარული გვაჩუქეთ კიდევ არ იცით, წარმატებები.
მსგავსი ამბები
რუბრიკის სხვა სიახლეები
;