ტარიელ ხეჩიკაშვილი: მიხარია, რომ საბურთალო თავის ისტორიას წერს

„საბურთალოსა” და „არარატ-არმენიას” პირველი მატჩის შესახებ „ლელო” თბილისური გუნდის ხელმძღვანელობასა და მოთამაშეებს ელაპარაკა:

ტარიელ ხეჩიკაშვილი, „საბურთალოს” პრეზიდენტი: „მიხარია, რომ „საბურთალო” თავის ისტორიას წერს. კავკასიური დერბი ყოველთვის ემოციური იყო.

ერევანში თამაში კი იოლი არასოდეს ყოფილა. „არარატ-არმენიასთან” მატჩიც გამორჩეული აღმოჩნდა. ამას ის ემატებოდა, რომ თამაშს საერთაშორისო დატვირთვა ჰქონდა. მთელი გუნდი ამ პასუხისმგებლობას ვაცნობიერებდით. ეს ფეხბურთელებისთვის ფსიქოლოგიური წნეხიც იყო. მაგრამ მათ სასახელოდ უნდა ითქვას, რომ მეორე ტაიმში საუკეთესო თვისებების გამოვლენა შეძლეს, სანახაობრივი ფეხბურთი აჩვენეს და თამაში სასურველი შედეგით დაასრულეს.

ერევანში ჩამოსულ თითოეულ გულშემატკივარს მადლობას ვუხდი, რადგან გუნდი მათ მხარდაჭერას გრძნობდა. იმედი გვაქვს, რომ საპასუხო მატჩზე სტადიონი გაივსება და „საბურთალოს” წარმატებას ერთად ვიზეიმებთ”.

კახა კაშია, „საბურთალოს” აღმასრულებელი დირექტორი: „ასეთ ტურნირებში გასვლითი თამაშის მოგება ძალიან მნიშვნელოვანია. რა თქმა უნდა, ახლა მეტი შანსი გაჩნდა პლეი ოფში გასვლის, რადგან საპასუხო თამაში იქნება. მაგრამ სანამ ეს თამაში არ გაიმართება, მანამდე საერთო გამარჯვებაზე ლაპარაკი ნაადრევია.

ზოგადად, ჩვენთვის ყველა თამაში მნიშვნელოვანია და მოგება ყველა მეტოქესთან გვსურს. მაგრამ ქართულ-სომხურ შეხვედრებს მაინც გამორჩეული ხიბლი და ემოცია ახლავს. ახლა კი ქართველი გულშემატკივრისგან გამორჩეული წნეხი იყო - ყველა გამარჯვებას ითხოვდა. ჩვენი მეტოქე ძველი „არარატი” არ არის, მაგრამ ჩვენც არ ვართ ქართულ-სომხური კავკასიური დერბის ტრადიციული მონაწილე თბილისის „დინამო”. ამის მიუხედავად, მატჩის მიმართ დიდი ინტერესი იყო, რადგან ეს ყოველთვის ისტორიული დაპირისპირებებია. ამასთან, ეს „საბურთალოსთვის” ორმაგი პასუხისმგებლობა იყო - წასვლისას ფეხბურთში ჩაუხედავი ადამიანებიც კი გვთხოვდნენ, მოიგეთო. უფრო ბედნიერი ვიქნები, საპასუხო მატჩსაც თუ წარმატებით ჩავატარებთ”.

გაგი მარგველაშვილი, „საბურთალოს” კაპიტანი: „პირველი ტაიმი ძალიან ნერვული გამოდგა. თავიდან თამაში თანაბრად მიდიოდა და მერე გაგვიტანეს. მაგრამ ბიჭებმა ვიპოვეთ საკუთარ თავში ძალა, რომ თამაშის ხასიათი შეგვეცვალა. ცვლილებებმა და გადაადგილებებმაც, ჩემი აზრით, გაამართლა - სამი მცველით მეორედ ვითამაშეთ და ასე გუნდი უკეთესად გამოჩნდა.

ბედნიერები ვართ, ერთბურთიანი ჰანდიკაპით რომ დავბრუნდით. მაგრამ ეს საქმის მხოლოდ ნახევარია, ყველაფერი თბილისში გადაწყდება... რაც შეეხება ყენიას, მას მოედანზე დაბრუნება და გოლის გატანა მინდა მივულოცო. ყველამ იცის, რა დონის ფეხბურთელია. ეს გოლი მისთვის ახლა ძალიან ბევრს ნიშნავს. დიდი იმედი გვაქვს, ლევანი კიდევ უფრო მეტად დაგვეხმარება - მას საამისო გამოცდილებაც აქვს, ნიჭიც და კლასიც”.

ლუკა ლაკვეხელიანი, „საბურთალოს” მარცხენა მცველი: „დასამალი არ არის, რომ ჩვენი ორი ქვეყნის გუნდების თუ ნაკრებების დაპირისპირება ყოველთვის პრინციპულია. მიხარია, რომ პირველი მატჩის მოგება შევძელით. რთული თამაში გამოდგა, პირველი ტაიმი ცუდად დავიწყეთ, „არარატი” კი უფრო აგრესიულად უტევდა და ცოტა გაგვიჭირდა. მაგრამ მეორე ტაიმში თამაში გამოვასწორეთ, ჩვენი ფეხბურთი ვითმაშეთ და შედეგსაც მივაღწიეთ. თბილისურ შეხვედრაში ისევ ჩვენი ფეხბურთი უნდა ვაჩვენოთ - აგრესიული, პრესინგით... „საბურთალო” ასე უკეთესია. სომხებთან ცოტა იღბალიც დაგვეხმარა. ძალიან ძლიერი იყო ჩემს ფლანზე მოთამაშე ნარსინგი. ვიცოდი, რომ სწრაფი ფეხბურთელი იყო, მაგრამ უფრო სწრაფი გამოდგა და პირველ ტაიმში პრობლემები შემიქმნა. მაგრამ მერე კარგად დავფიქრდი, რასაც აკეთებდა, დისტანცია დავუჭირე და მიხარია, რომ ჩავკეტე”. 

ყოველდღიური სპორტული გაზეთი "ლელო"
1625
მკითხველის კომენტარები / 0 /
მსგავსი ამბები
რუბრიკის სხვა სიახლეები
;