ტარიელ ხეჩიკაშვილი: რჩება თუ არა ჭიაბრიშვილი? ყველამ თავისი წილი პასუხისმგებლობა უნდა აიღოს!.. უეფას იქით ვთხოვთ, გამოიძიონ ეს თამაში

"საბურთალოს" პრეზიდენტმა ტარიელ ხეჩიკაშვილმა "არარატ-არამენიასთან" თბილისურ მატჩში მტკივნეულ წაგებასა და მატჩის შემდგომ რეაქციებზე ილაპარაკა:

"ცხოვრებაში არასოდეს დამავიწყდება ეს დღე, მაგრამ მერე თურმე უარესი მელოდა... გუნდს ნამდვილად არ ჰქონდა უფლება, ეს იმედი არ გაემართლებინა. მესმის კრიტიკა, კითხვები შემადგენლობაზე, რატომ არ გავძლიერდით...

ეს ყველაფერი გასათვალისწინებელია, რომ შემდგომში მსგავსი რამ არ განმეორდეს. მაგრამ რაც მოხდა, ამისთვის გულშემატკივრებს და საქართველოს ბოდიშს ვუხდით. ეს, უპირველეს ყოვლისა, ჩვენთვის იყო დიდი დარტყმა", - ამბობს ტარიელ ხეჩიკაშვილი.

მან თამაშის წინ აგორებულ ჭორებზეც ილაპარაკა, თითქოსდა, საპასუხო შეხვედრა ჩაწყობილი იყო:

"ათასი ჭორი გავრცელდა და მათ შორის ვარ მეც, ვისზეც კითხვები დაისვა. ყველაზე მეტად გული იმ ცილისწამებებმა მატკინა, თითქოს, საპასუხო თამაში ჩაწყობილი იყო.

თან ამას ისეთი ხალხი გვაბრალებს, ეტყობა, მსგავსი რამ თავად რომ მიაჩნიათ დასაშვებად. ჩვენ ამ კლუბში არავის დავუნიშნივართ და არც ფულის საკეთებლად მოვსულვართ. მეორე ათეული წელია, პარტნიორებთან ერთად, კლუბში ფული მომაქვს და როგორც ვენახს უვლიან, ისე ვუვლი და ვაშენებ. პრაგმატულად რომ ავიღოთ, ერთ მხარესაა უეფას უდიდესი ბონუსები, რაც ჩვენ წაგვადგებოდა, და მეორე მხრივ - ჩაწყობილი თამაშები.

რომელ ჭკუადმყოფელს მოუვა თავში აზრად, 20 წლის შრომა წყალში ჩაყაროს? ჩვენ კი ერთ დღეში ხაზი გადაგვისვეს. ყველა კითხვა რომ მოიხსნას, მე, როგორც კლუბის პრეზიდენტი, გამოვდივარ ინიციატივით - ხვალვე უეფას შესაბამის ორგანოებს მივმართვათ, დაიწყონ ამ მატჩის შესწავლა და გადაამოწმონ იმ უკრაინული საიტის ინფორმაცია, სადაც ჩვენ, ფაქტობრივად, გარიგებულ თამაშში მონაწილეობა დაგვაბრალეს.

გადაამოწმონ წყარო. ისინი თავად სწავლობენ მსგავს ფაქტებს, ჩვენ კი ახლა თავად ვთხოვთ გამოძიებას, რათა ყველა კითხვას პასუხი გაეცეს. ფედერაციის ძველ ხელმძღვანელობასთან კარგი ურთიერთობა არ გვქონია, მაგრამ მათაც კი არ დაუყენებიათ ეჭვქვეშ ჩვენი პატიოსნება". 

რჩება თუ არა მთავარი მწვრთნელის პოსტზე გიორგი ჭიაბრიშვილი? ხეჩიკაშვილმა ამაზეც ილაპარაკა: "ხვალ შევიკრიბებით და ყველამ ჩვენი წილი პასუხისმგებლობა უნდა ავიღოთ, მათ შორის, პრეზიდენტმაც, იმის მიიუხედავად, რომ დამფუძნებელი ვარ და მეტი უფლებები მაქვს.

მრცხვენია, თბილისში სამიდან ერთი მატჩიც რომ ვერ მოვიგეთ! ჩვენ მხოლოდ საკუთარ თავს არ ვეკუთვნით, ხალხს გული ვატკინეთ და მათთან ვალში ვართ. აქედან ყველამ დასკვნები უნდა გამოვიტანოთ, ცვლილებები ყველა დონეს შეეხება. ეს საჭიროა იმისთვის, რომ კლუბი უფრო წარმატებული იყოს. მეც ვფიქრობ - ღირს თუ არა დარჩენა, რადგან 20 წლის შრომა, შეიძლება, ერთ დღეში წყალში ჩაგვეყაროს. ამ ვალის გადახდა ხალხისთვის დიდი ხნის განმავლობაში მოგვიწევს და რა ცვლილებებიც საჭიროა, განვახორციელებთ".

3591
მკითხველის კომენტარები / 0 /
მსგავსი ამბები
რუბრიკის სხვა სიახლეები
;