ტარიელ ხეჩიკაშვილი: სამწუხაროდ, მნიშვნელოვან  პრობლემას ვაწყდებით...

მოქმედი ჩემპიონის პრეზიდენტი რეხვიაშვილს და ქოჩორაშვილს ადასტურებს 

უკვე ვწერდით, რომ გიორგი რეხვიაშვილმა ბერძნული “ლევადიაკოსი” (რომელიც საბერძნეთის სუპერლიგიდან გავარდა) დატოვა. მაგრამ გამოცდილმა მცველმა არ ისურვა გავრცელებული ინფორმაციის კომენტირება, რომლის თანახმადაც მალე “საბურთალოს” დაუბრუნდება და ყოფილ გუნდს ჩემპიონთა ლიგის საკვალიფიკაციო ეტაპზე გააძლიერებს.

31 წლის რეხვიაშვილისა და “საბურთალოს” სხვა სატრანსფერო სიახლეებზე “ლელოსთან” კლუბის პრეზიდენტმა ტარიელ ხეჩიკაშვილმა ილაპარაკა.

- შემიძლია დავადასტურო, რომ ზაფხულის სატრანსფერი პერიოდში “საბურთალოს” პირველი შენაძენი გიორგი რეხვიაშვილია. ჩემპიონთა ლიგის საკვალიფიკაციო ეტაპზე თამაში მოგვიწევს და სასურველი იყო, ისეთი მოთამაშე დაგვემატებინა, რომლის შესაძლებლობებიც ვიცით, ვენდობით და ადაპტაცია არ დასჭირდებოდა. რეხვიაშვილი ამისთვის ზედგამოჭრილი კანდიდატია.

- მან კონტრაქტი უკვე გააფორმა?

- დიახ, ეს საკითხი გადაწყვეტილია.

- მართალია, თითქოს მეკარე ლაზარე კუპატაძის დაბრუნებასაც აპირებთ?

- მისი საკითხი გარკვევის პროცესშია. მან ძველ კლუბთან იურიდიული საკითხები უნდა მოაგვაროს და როცა ეს მოხდება, ყველაფერი ამის მერე გადაწყდება.

- ევროსეზონამდე სხვა ტრანსფერებსაც გეგმავთ?

- გაძლიერებაზე ვმუშაობთ, მაგრამ სამწუხაროდ, ერთ მნიშვნელოვან პრობლემას ვაწყდებით - ბევრს არ სურს აქ ჩამოსვლა. ეს სერიოზულ ბარიერებს გვიქმნის. ეროვნულ ჩემპიონატში პროგრესია, მაგრამ მეტია საჭირო, რომ აქეთ გამოხედვა მოინდომონ. ახლა ისე გამოდის, რომ კარგ მოთამაშეს საკმაოდ კარგი პირობებიც რომ შესთავაზო, ჩამოსვლაზე მაინც თავს იკავებს.

- ასეთ დროს გამოსავალი რა არის?

- იმავეს ვიტყვი, რაც რეხვიაშვილის შემთხვევაში - გვირჩევნია, დავიმატოთ ფეხბურთელები, რომელთაც კარგად ვიცნობთ და ვენდობით. ვფიქრობ, ამ კუთხით საინტერესო იქნება, რომ კიდევ ერთ მოთამაშეს დავიბრუნებთ, რომელიც ჩვენი გაზრდილია და ორი წელი იჯარით ესპანური ლა ლიგის კლუბ “ჟირონაში” თამაშობდა - ვგულისხმობ გიორგი ქოჩორაშვილს, რომელიც საქართველოს ახალგაზრდული ნაკრების ნახევარმცველია.

“საბურთალოს” საყრდენი ნახევარმცველი სჭირდებოდა და მიმაჩნია, რომ გიორგი კარგი კანდიდატურაა. ბოლოს და ბოლოს, ლა ლიგის გუნდთან ერთად ვარჯიშობდა, რამდენჯერმე განაცხადშიც მოხვდა და შარშან “ტოტენჰემთან” ამხანაგურ შეხვედრაშიც ითამაშა. ფეხბურთელებს, რომელთა არც შესაძლებლობა ვიცით და არც პოტენციალი, სწორედ ასეთი მოთამაშეები გვირჩევნია. მაგრამ ძლიერი ფეხბურთელების დამატებაზეც ხელი არ აგვიღია და ამაზე ვმუშაობთ.

შეგახსენეთ, რომ გიორგი რეხვიაშვილი “საბურთალოში” 2018 წელს ჩაირიცხა და გუნდის ჩემპიონობაში დიდი როლი ითამაშა. 31 წლის მცველი საბერძნეთის “ლევადიაკოსში” ზამთარში გადავიდა და ბერძნული კლუბის მაისურით 10 თამაში ჩაატარა, მათგან 9 - ძირითად შემადგენლობაში. ეს გუნდი ახლახან დასრულებულ სეზონში საბერძნეთის სუპერლიგიდან გავარდა და რეხვიაშვილმა კონტრაქტი აღარ გაახანგრძლივა. 

გიორგი ქოჩორაშვილი კი “ჟირონაში” 2017 წლის ზაფხულში გადავიდა. მაშინ მან საქართველოს 19-წლამდელთა ნაკრების შემადგენლობაში ევროპის ჩემპიონტზე ითამაშა და კარგი შთაბეჭდილებაც დატოვა. ის “ჟირონას” მთავარ გუნდში ვარჯიშობდა და 19-წლამდელებში გამოდიოდა. 

საინტერესოა, რომ გიორგიმ შარშან, აგვისტოში “ჟირონას” მთავარი გუნდის ფორმით, მოსამზადებელ ეტაპზე ითამაშა ჯერ “საბადელის” წინააღმდეგ, ხოლო შემდეგ - “ტოტენჰემთან”. ლონდონურ გრანდთან ესპანელებმა 4:1 მოიგეს. 84-ე წუთზე ქოჩორაშვილმა ალეიშ გარსია შეცვალა. აღმოჩნდა, რომ “საბადელთან” თამაშში ყველაზე მეტი მანძილი სწორედ მან დაფარა და სპრინტებიც საკმაო რაოდენობით დაუგროვდა.

ყოველდღიური სპორტული გაზეთი "ლელო"
2043
მკითხველის კომენტარები / 1 /
ასევე
2
იცი რა მიკვირს?! ამას რო გაიძახით ძლიერი ფეხბურთელები აქ არ ჩამოდიანო?! აბა აქ არ თამაშობდნენ ჩისკო და გორის დილა ში რო გამოდიოდა რა გვარი იყო ,მოლდავეთში რო გაყიდეს.,ფლამარეონი აქ არ თამაშობს,ფორტესი რამოსი და რამდენს ასეთ კარგ ფეხბურთელს უთამაშია...ალბათ არ გინდა ფული გადაუხადო ნორმალური და მაგიტომაც არ მოდიან..
მსგავსი ამბები
რუბრიკის სხვა სიახლეები
;